NUMERA.
21.
Arada pavapavana, tau Kanaan, diho kahana ai e nohova, vada e kamonai Israel na Atarim dalana amo e maiva, bena ia ese e tuari henidia bona haida e abidia mauri. 
Bena Israel taudia ese Iehova e gwau henia hamata, eto, Ina bese be ai imamai ai ba henimai, bena ai ese edia hanua baia habuadia tari. 
Bena Iehova ese Israel taudia edia noinoi e abia dae, Kanaan taudia na idia imadia ai e henidia; bena idia ese una bese taudia e aladia ore bona edia hanua e habuadia tari. Taunabunai una gabu ladana e hatoa Horoma. 
Bena Horo ororona amo ma e laolao, Davara Kakakakana dalana amo e laova, Edom tanona murimurina amo bae raka hanai eto. A dala ai e hesiku, 
Iehova bona Mose e maumauraidia, eto, Dahaka dainai Aigupto amo o hakaumai lasi, tano ḡaḡaena ai baia mase helaoreana? Badina be asi amai; ranu danu lasi. A ina aniani ḡauna dikana ianina vada ame hesiku. 
Bena Iehova ese hekori gaigaidia e siaidia, idia bogaragidiai; gaigai ese e koridia, bena Israel taudia hutuma e mase. 
Bena idia na Mose dekena ela, eto, Ai na vada a kara havara, Iehova vada a maumauraia, oi danu vada a maumauraimu: Iehova ba noia, ia ese ini gaigai na ai emai amo baine abidia oho. Taunabunai Mose na e ḡuriḡuri, taunimanima daidiai. 
Bena Iehova ese Mose e hamaoroa, eto, Gaigai laulauna ta ba koroa, au-tubua dorina ai ba kapaia kau; bena gaigai ese bae koridia taudia ese bae raraia tao ai na vada bae mauri. 
Taunabunai, Mose ese gaigai laulauna ta, auri labora-labora amo e koroa, bona au-tubua dorina ai e kapaia kau, bena gaigai ese e koridia taudia ese una auri labora-labora gaigaina e raraiatao, bena vada e mauri. 
Israel taudia ma e laolao, Oboto ai e taruha. 
Oboto ma e toretania, ela, Ie-abarim ai e taruha, tano ḡaḡaena ai. Una tano ḡaḡaenana Moab e hevaira henia, mairiveina kahana ai. 
Ma e tore isi, ela, Serede kourana ai e tatuha. 
Unu amo ma ela, Aranon sinavaina unukahana ai e taruha; una na tano ḡaḡaena ai, Amoro taudia edia tano isena ai. Hari Aranon sinavaina na Moab bona Amoro taudia edia tano hetoana. 
Una dainai Iehova ena tuari bukana ai vada e tore, eto, Wahebe Sufa ai, Bona Aranon kouradia ai; 
Koura ege-egedia Ela bona Ara ena noho gabuna, Bona Moab tanona hetoana. 
Unu amo ma e laolao ela bona Bere: ranu gurina bunai Iehova ese e gwauraia, Mose na e hamaorolaia, eto, Taunirnanima ba haboudia, lau ese ranu baina henidia. 
Bena Israel ese ina ane e abia: Ranu e, a lohi lohi dae! Ane avabia! 
Hanua pavapavadia ese guri e ḡeia, Hanua lohiadia ese e hadobua, Dagi auna amo bona itotohi amo. Una tano ḡaḡaena amo ma e laolao, ela bona gabu ladana Matana; 
Matana amo ela bona Nahaliele; Nahaliele amo ela bona Bamoto; 
Bamoto amo ela bona koura ta Moab kahana ai; ma unu amo ela bona Pisga ororona dorina: unu amo tano ḡaḡaena e roha tari lao. 
Israel ese gwaukau taudia e siaidia, Sihon, Amoro pavapavana, dekenai, eto, 
Mani emu kara emu tano amo baia raka hanai. Basia raka siri, uma ai eiava vine imeana ai basia raka vareai; guri ranudia danu basia inu. Pavapava Dalana amo baia raka, ela bona emu tano amo baia raka lasi. 
A Sihon ese Israel taudia e gwaudia tao, ena tano amo basie raka hanai eto. Ena orea taudia iboudiai e haboudia, tano ḡaḡaena ela, Israel taudia ilao-henidia totona; bena Iahasa ai e tuari henidia. 
A Israel taudia ese dare amo e alaia mase, ena tano idoinai e abia, Aranon sinavaina amo ela bona Iabok sinavaina ela bona Amono taudia edia tano; a Amono taudia ese edia tano hetoana e ginia ahu auka masemase. 
Bena Israel taudia ese edia hanua iboudiai e abidia; bena Hesebon bona Amoro hanuadia maraḡidia iboudiai e noholaidia. 
Badina be Hesebon na Sihon, Amoro pavapavana, ena hanua; ia ese gunaguna Moab pavapavana gunana e tuari henia, bona ena tano idoinai e abia ela bona Aranon sinavaina. 
Una dainai ane isisibana taudia eto: Aoma Hesebon. Sihon ena hanua baita hadaia, Bona baita ha-aukaia. 
Badina be lahi Hesebon amo e tubu, Lahi hururu-hururuna Sihon ena hanua amo e dae; Ara Moab ai e araia, Aranon ororodia lohiadia e aradia ore. 
Moab e, madi, ihabaimu! Kemoso o toma henia dihomu taumui e, vada o baia! Natuna mamaruanedia vada e luludia oho, Natuna hahinedia vada e abidia mauri, Sihon, Amoro pavapavana, ese. 
Emai diba amo vada a haberodia; Hesebon vada e hebua tari ela bona Dibon, Tano vada a havahua ela bona Nofa, ela bona Medeba. 
Unuhetomana Israel na Amoro tanona e noho henia. 
Bena Mose ese hasinadoa taudia e siaidia, lasere ela; bona lasere hanuadia e abidia, Amoro taudia unuseni ai e nohova na e luludia lasi. 
Bena idia na e raka Iasi, Basan dalana amo ela. Bena Og, Basan pavapavana, mai ena orea taudia iboudiai ida, e raka Iasi, Edrei ai e tuari henidia. 
A Iehova ese Mose e hamaoroa, eto, Basio gari henia; oi imamu ai vada na atoa kau: ia, bona ena orea taudia iboudiai, bona ena tano idoinai. Sihon, Amoro pavapavana, Hesebon ai o kara henia heḡereḡerena, ina tau danu unu ba kara henia toma. 
Taunabunai idia ese ia bona natuna bona ena orea taudia iboudiai e hadareredia bona e luludia lasi; bena ena tano e abia, edia tano ai e halaoa.