IOBU.
15.
Bena Elifasa, tau Teman, e haere, eto: 
Aonega tauna na hereva hepui-hepui amo baine haere, bona sibona laurabada dobirina amo baine hahehonu, a? 
Hepapahuahu herevadia asi anidia, eiava namo basie havaraia diba herevadia, baine gwaurai a? 
A oi na Dirava igari-henina o abia ohomu, bona helalo Dirava vairanai na o laoa ahumu. 
Badina be emu kara havara ese udumu e hadibaiamu, bona dibaka tauna malana vada o abia hidi. 
Oi sibomu udumu ese e gwau henimumu, dia lau ese; oi sibomu udumu bibinadia ese e habadelaimumu. 
Taunimanima gini-gunana na oi a? Ororo do asie hekara oi o vara a? 
Dirava ena henega-hebouna ai oi o hakala lao a? Oi na o tomu oi sibomu mai aonegamu a? 
Dahaka ḡau oi mai dibamu a ai asi dibamai? Edena ḡau ai oi lalomu vada e parara a ai lalomai asie pararamu? 
Ai bogaragimai ai na hui-buruka bona laḡanidia hoho taudia; idia be guna, oi tamamu na gabe tauna. 
Dirava ena tau-halo herevadia emu ai na mamaraḡi, eiava ena hereva manadadia emu ai na dia heḡereḡere, a? 
Dahaka dainai lalomu na e siahumu, bona matamu na o hahururumu, 
bena laumamu na Dirava ena amo e raka murimu, bona hereva enehetomadia na udumu amo o halasidiamu? 
Taunimanima be dahaka, bena baine ḡoevaḡoeva diba? Hahine bogana amo e vara tauna be dahaka, bena baine maoromaoro diba? 
A itaia, Dirava ese ena helaḡa taudia se abidadama henidiamu, bona guba na dia ḡoevaḡoeva ia vairanai; 
matona, kara dika bona kara bodaga tauna, kara havara e inumu ranu na heto tauna, ia be edeheto? 
Aina hamaoromu, a kamonai; vada na ita ḡaudia baina gwaurai hedinarai: 
aonega taudia ese vada e gwaurai bona tamadia ese asie hunidia ḡaudia. 
(Tano na idia sibodia e henidia, bona idau tauna ta na bogaragidia amo se raka laova.) 
Kara dika tauna na hisi ese e gugubaiamu ena mauri dinadia iboudiai lalodiai, asi ena hebogahisi tauna ahuna na vada e heḡaeḡaelai laḡanidia iboudiai lalodiai. 
Reḡe mai garidia na taiana lalodiai; ena noho namo ai hahebua-tari tauna na enai baine kau. 
Se abia daemu ia na dibura amo ma baine raka lasi, bona ia ahuna na dare. 
Aniani itahuna e loa eva-evamu, e tomu, Ḡauna na edeseni ai? Ia dibana dibura dinana vada eme heḡaeḡae ia ena. 
Lalo-hisihisi bona dara-doko ese e hagariamu; idia ese e hadarereamu, pavapava ese tuari dalana e lailaia gunamu na heto. 
Badina be imana vada e toia roro, Dirava ihadikana; Siahu-idoinai Diravana na vada e hare henia. 
Ituari-henina totona vada e heau henia, mai ena kesi aukana ida. 
Badina be digarana ese vahana e hapouta-poutaiamu, bona koekoena e habadika-badikaiamu. 
Ia na hanua ahutudia ai e nohomu, taunimanima basiema noholaidia rumadia ai, do bae heḡiḡi dobi rumadia ai. 
Ia na basine taḡa, ena taḡa kohudia basie mia; bona ia ramuna na tano ai basie diho. 
Ia na dibura amo basine roho mauri; Iahi hururuna ese ia tuhutuhuna baine aradia, bona lai ese ia burena baine hodaia oho. 
Ḡau asi anina basine abidadama henia, sibona basine hekoi; badina be ahuna na ḡau asi anina. 
Ena nega do basine ore ai dava baine abia, ia rigina na basine mauri. 
Vine na heto, huahuana na kasiridia ai bae hehuhu; olive auna na heto, ia burena bae hehuhu. 
Badina be Dirava asie matauraiamu taudia ibamodia na asi anina, bona kara gageva-gageva davana e abiamu taudia edia kalaga na lahi ese e aradiamu. 
Idia ese kara dika e lalo-hadailaia matamamu, bena anina dikana e havaraiamu, bona lalodia ese koikoi daladia e heḡaeḡaelaimu.