SALAMO.
2.
Badina be dahaka lalo-dibura taudia na e heloḡo-heloḡomu? Badina be dahaka taunimanima edia lalo-hadai na kavakava? 
Tanobada pavapavadia e gini toremu, bona lohia taudia na e henega boumu; Iehova bona ia ese e horoa tauna na idia ese e inai henidiamu. Idia na e tomu: 
Edia gadea baita hamotudia, e ḡuilaida varodia baita negedia. 
Guba ai e nohomu Diravana ese baine kirikirilaidia; Ḡaubada ese baine hevasehalaidia. 
Ia ese baine gwau henidia mai baduna ida, ena badu-ḡaraḡara ese baine hahisihisidia. Baineto: 
Egu pavapava vada na atoa, egu ororo Siona dorina ai. 
Iehova ena hereva baina harorolaia, ia ese vada e hadibagu heḡereḡerena, eto: Oi na lau natugu, hari dina ai vada na havaramu. 
Ba noigu, bena bese idau-idau baina henimu, oi ahumu, tanobada dokodia do baina henimu, emu. 
Auri itotohina amo ba hamakohidia, uro na heto ba huaridia. 
Pavapava e, ba aonega; tanobada lohiamui e, ba diba. 
Iehova ba toma henia diho mai garimui, bona mai heude-heudemui ida. 
Ia aena palapaladia ba harahudia, baine badu henimui bena dala ai ba mase na garina; badina be ena badu e vara haraḡamu. Ia e abidadama heniamu taudia be nanamo.