SALAMO.
18.
Iehova e, egu goada, na lalokau henimumu! 
Iehova na egu nadi-gini, egu maḡu, egu hahemauri tauna; egu Dirava, egu nadi-gini, na abidadama heniamu tauna; egu kesi, egu mauri doana, bona egu kohoro. 
Iehova, e imodaiamu Diravana, na tai heniamu, bena inaigu edia amo e hamaurigumu. 
Mase iḡuidia ese e ḡeḡegu ahuva, hahedika abatadia ese e hagariguva; 
Mase Gabuna ena iḡui varodia ese e idoagu, mase huodia ida na tata hedavari. 
Egu hisihisi ai Iehova na boi henia; egu Dirava na tai henia, baine durugu nato. Ena dubu ai lau gadogu e kamonai; egu taitai na ia taiana ai e kau. 
Una negana ai tanobada e laga, e heude-heude, ororo badidia danu e heude-heude, e marere-marere, badina be ia vada e badu. 
Kwalahu na ia uduna matudia amo e dae, Iahi siahuna na ia uduna amo e lasi, lahi hururu-hururudia na iena amo ema. 
Guba e beua tari, bena e diho; dibura badana na ia aena henudiai. 
Kerubi ai e gui, e roho lao; lai hanina amo e roho haraḡa-haraḡa. 
Dibura na e hekoulaia, dagadaga dubana e hetarulaia. 
Hururu-hururu na ia vairanai, unu amo medu-hetari bona lahi-hururuhururu na ena dagadaga amo e diho. 
Iehova ese guba-rahua ai e hereva, Herea Mikamika na e gwau isi, bena medu-hetari bona lahi-hururuhururu na e diho. 
Ena diba e kino, e hakarohodia; ena kevaru e hakevarua isi, e hadareredia. 
Bena davara dobudobudia e heita, bona tanobada badidia e hedinarai, oi Iehova ese o gwau henidia negana ai, oi udumu matudia amo o hahodi lasi negana ai. 
Atai amo e dau dobi, e abigu, ranu momo amo e verigu lasi. 
Lau inaigu goadana ena amo e hamaurigu, e inai henigu taudia imadia amo e hamaurigu, badina be idia ese bema hadareregu diba. 
Egu hisihisi dinana ai e davarigu, a Iehova na egu imuda. 
Ia ese taora bada gabuna ai e hakaugu lasi; ia ese e hamaurigu, e moalelaigu dainai. 
Iehova ese davagu vada e henigu, egu kara maoromaoro heḡereḡerena, vada e hanamogu, imagu edia ḡoevaḡoeva heḡereḡeredia. 
Badina be Iehova ena dala vada na badinadia; lalo-hadai dikadia daidiai egu Dirava asina rakatania. 
Badina be ena haheḡani iboudiai na lau vairagu ai; ena taravatu asina negedia daure. 
Ia vairanai lau na asi egu kerere; kara dika amo na raka oho. 
Taunabunai, Iehova ese vada e hanamogu, ena kara maoromaoro heḡereḡerena ai; imagu na ia vairanai vada e ḡoevaḡoeva heḡereḡerena vada e hanamogu. 
Hebogahisi tauna oi ese o bogaia hisimu; kara maoromaoro tauna oi ese o kara maoromaoro heniamu. 
Lalo-ḡoevaḡoeva tauna enai oi lalomu danu baine ḡoevaḡoeva; a kara gageva-gageva tauna enai oiemu kara danu bae gageva-gageva. 
Badina be lalo-manau taudia na oi ese o hamauridiamu; a hekokoroku taudia na oi ese matadia o ha-igodia dihomu. 
Momokani, oi ese egu lamepa o haraiamu; Iehova, egu Dirava, ese egu dibura e hadiariamu. 
Momokani, oi bagumu ai orea badana baina hadarerea diba; egu Dirava bagunai maḡu ta baina rohoa hanai diba. 
Ina Dirava ena dala na herea dae; Iehova ena gwauhamata vada e momokani; ia na e abidadama heniamu taudia edia kesi. 
Dirava be daika? Iehova mo. Nadi-gini be daika? Iseda Dirava mo. 
Ia na goada e hariolaigu Diravana; ia na egu dala e halailaia Diravana. 
Ia ese lau aegu na dia aedia heḡereḡeredia ai e halaodia; ia ese atai gabudia ai e haginigu kau. 
Ia ese lau imagu e hadibadiamu, tuari karadia ai, bena ima u na mai goadadia auri-laboralabora pevana baina marea. 
Emu hahemauri kesina vada o henigu; oi imamu idibana ese vada e dogogu tao, emu kara manada-manada ese vada e imodaigu. 
Taora bada gabuna vada o lailaia, lau aegu bae moia tao; aegu na asie dedi. 
Lau inaigu na havadia, na lasidia tao; lau asina gini kerehai ela bona idia na e bua tari. 
Na gwadadia uru, asie tore diba; e keto, aegu henudiai. 
Oi ese goada o hariolaigu, baina tuari totona; lau inaigu o tahodia dobi henugu ai. 
Lau inaigu o hakerehaidia lau vairagu ai; e ina heniguva taudia na na habuadia tari. 
Hekaha e noilaia, a ta ese se hamauridia; Iehova e tai henia, a ia ese se haere henidia. 
Lau na botadia patapata, ḡahu lai vairanai na heto; lau na negedia lasi murimuri ai, ariara mirona na heto. 
Taunimanima edia tuari amo o hamaurigu; bese idau-idau ikwaradia ai o halaogu; asi dibagu taudia ese isiaigu e lao heniva. 
Lau harigu e kamonai, bena e kamonai henigu; idau bese taudia na lau vairagu ai e igo diho. 
Idau bese taudia na kudoudia e hetaha; edia komu gabudia amo e raka lasi mai heude-heudedia ida. 
Iehova na e maurimu; egu nadi-gini na hanamoamu; egu hahemauri Diravana bae imodaia. 
Dirava ese lau inaigu davadia e henidiamu; ia ese taunimanima na lau henugu ai e atodiamu; 
ia ese lau inaigu edia amo e hamaurigu. Momokani, oi ese o imodaigu, lau inaigu daediai; daḡedaḡe taudia edia amo o hamaurigu. 
Ina dainai, Iehova e, lau baina imodaimu bese idau-idau bogaragidiai; oi ladamu baina hanamoa egu ane ai. 
Kwalimu badana ia ese ena pavapava e heniamu; e horoa tauna ia ese e bogaia hisimu; David mai garana ida baine bogadia hisi ela bona hanaihanai.