SALAMO.
19.
Guba ese Dirava hairaina e gwauraia hedinaraiamu; guba ḡaudia ese ia imana gaukaradia e hahedinaraiamu. 
Dina ta ese dina ta e herevalai heniamu; hanuaboi ta ese hanuaboi ta enai iena aonega e gwauraimu. 
Asi hereva ta, asi gado ta; eredia na se hekamonaimu. 
A reḡedia na tanobada idoinai vada ela; edia hereva na tanobada dokona ai vada e kau. Idia ediai ia ese dina ena kalaga vada e atoa, 
dina na e raka lasimu, headava matamata tauna na ena ruma amo e raka lasimu na heto; goada tauna na heto ia na ena dala ai e heaumu mai moalena ida. 
Guba dokona ta amo e daemu, e hanaimu bona guba dokona ta; ḡau ta na ia siahuna amo basine komu diba. 
Iehova ena taravatu vada e namo ḡuḡuru; ia ese lauma e hamauria loumu. Iehova ena hahediba herevana vada e momokani; ia ese asi aonegana tauna na e ha-aonegaiamu. 
Iehova ena hahedua herevadia vada e maoromaoro; ia ese taunimanima lalodia e hamoalediamu. Iehova ena haheḡani vada e ḡoevaḡoeva; ia ese taunimanima matadia e hapapadiamu. 
Iehova imatauraina vada e ḡoevaḡoeva, e mia hanaihanaimu. Iehova ena hahemaoro vada e momokani, bona vada e maoromaoro. 
Edia namo ese gold ena namo e hereaiamu, gold ḡoevaḡoevadia momo edia namo e hereadiamu. Edia gaiho ese bada ranuna e hereaiamu, labolabo edia ruma amo e hetuturu dobimu ḡauna. 
Idia ese oiemu hesiai tauna e sisiba heniamu; ibadinadia ahuna na bada. 
To daika ese ena kara kerere-kereredia baine diba; Egu kara dika hehuni-hehunidia amo ba haḡoevagu. 
Oiemu hesiai tauna ba rua, ena hekokoroku ai basine kara dika; egu kara dika basie hadareregu. bena basina kerere; kara dika badana ta basina karaia. 
Iehova e, egu nadi-gini, egu hahemauri tauna, ba durugu; udugu herevadia bona lalogu ena lalo-hadai bae ḡoeva oi vairamu ai.