SALAMO.
24.
Tanobada mai anidia iboudiai ida, Iehova ena, tanobada idoinai mai inoho-henina taudia ida; 
badina be ia sibona ese vada e hadaia, davara latadiai, ia ese vada e haginia utu-utu latadiai. 
Daika ese Iehova ena ororo baine dara dae? Daika ese ena gabu helaḡana ai baine gini? 
Ima-ḡoevaḡoeva bona lalo-ḡoevaḡoeva tauna ese; kara havara se ura henimu bona se gwau hamata koikoimu tauna ese. 
Hahenamo na Iehova ena amo baine abia, ena kara igwaurai-maorona danu ia ihamaurina Diravana ena amo baine abia. 
Ia e tahuamu taudia edia uru bunai; idia na oi vairamu e tahuamu, Iakob ena Dirava e! (Selah) 
Ikoukoumui e, umui kwaramui avabi isi! Idau nega iduaradia, umui na sibomui a heabi isi! Hanua Pavapavana diaḡau namona baine raka vareai. 
Hari Hanua Pavapavana diaḡau namona be daika? Iehova bunai, mai goadana ida bona mai siahuna ida; Iehova bunai, tuari ai e kwalimumu. 
Ikoukoumui e, umui kwaramui avabi isi! Oibe, idau nega iduaradia, umui na sibomui a heabi isi! Hanua Pavapavana diaḡau namona baine raka vareai. 
Hari Hanua Pavapavana diaḡau namona be daika? Iehova Sabaota, ia bunai Hanua Pavapavana diaḡau namona. (Selah)