SALAMO.
33.
Kara namo taumui e, Iehova ba moalelaia; badina be heimodai be ḡau namona, kara maoromaoro taudia ududia ai. 
Hatai-hatai ḡauna maraḡina amo Iehova ba hanamoa, ma badana, varo gwauta ḡauna, ba hataia, ia ihanamolaina. 
Ane matamatana avabia iena; varo ḡaudia ba hatai, ba hatai balaheni, mai lolomui ida. 
Badina be Iehova ena hereva na maoromaoro; ena ḡaukara idoinai e karaiamu mai momokanina ida. 
Ia ese kara maoromaoro bona hahemaoro e ura henidiamu, tanobada na Iehova ena hebogahisi ai e honu honu daemu. 
Iehova ena hereva ese guba e karaia, ia uduna amo e hahodi, bena guba taudia iboudiai e vara. 
Ia ese davara ranudia e haboudia, kavabu ai bema haboudia na heto; bona gadobada na e haboudia, roge ai bema haboudia na heto. 
Tanobada idoinai ese Iehova garina baine gari, tanobada taudia iboudiai ese ia bae matauraia. 
Badina be ia e hereva, bena e hekara; ia e hahedua, bena e gini tutuka-tutuka. 
Iehova ese bese idau-idau edia henega e hakarohodiamu, orea idau-idau edia lalo-hadai ia ese e laodia ahumu. 
Iehova ena henega e gini hanaihanaimu, bona ena lalo-hadai ela bona uru iboudiai. 
Iehova na ena Dirava ai e halaoamu besena be namo; vada e abidia hidi ia dihina ai baela taudia be nanamo. 
Iehova na guba amo e roha dobimu, taunimanima natudia iboudiai e nenediamu; 
terono ai e helaimu gabuna amo e roha laomu. tanobada taudia iboudiai e itadiamu; 
ia ese idia iboudiai lalodia e karadiamu, edia kara iboudiai danu e itadia taomu. 
Hanua pavapavana na dia ena tuari oreana badana dainai basine roho mauri; tuari tauna na dia ena goada badana dainai basine mauri. 
Tuari hosina na mauri e tahuamu tauna ese basine abidadama henia; dia ena goada badana ese tau ta basine hamauria diba. 
A itaia, Iehova ese ia garina e garimu taudia na e itadiamu; iena hebogahisi e laroamu taudia ia ese e itadia taomu; 
idia laumadia na mase amo baine harohodia mauri totona, bona doe negana ai baine hamaundia totona. 
Ita laumada ese Iehova e nariamu; ia na ita ikahada, bona eda kesi. 
Oibe, ita laloda ese ia e moalelaiamu, badina be ia ladana helaḡana ta abidadama heniamu. 
Iehova e, emu hebogahisi na ai latamai ai baine mia, ai emai helaro na oiemu ai e miamu heḡereḡerena.