SALAMO.
39.
Lau nato “Egu dala nahuadia baina toho, malagu amo kara dika baina havaraia na garina; udugu baina hakapua, kara dika taudia na dekegu ai e nohomu negadia iboudiai”. 
Lau na asi reḡereḡegu, asi egu hereva, hereva ta asina gwauraia, to se heḡereḡere; 
egu lalo-hisihisi vada e bada e laova, lalogu na e siahu e laova; na haeroava lalonai lahi e arava, bena malagu amo na hereva. 
Iehova e, egu doko negana boma hadibagu, egu dina na ede hohodia; egu mauri ede e heau tomamu bama diba. 
A itaia, egu dina vada o kara, ima lababadia hida hodia na heto; egu mauri na dia ḡau ta oi vairamu ai. Momokani, taunimanima iboudiai edia mauri na hahodi tamona na heto; (Selah) 
momokani, taunimanima na e loaloamu, vabura na heto. Momokani, edia hekwarahi na asi anina; idia ese taḡa e habouamu, a asi dibadia daika ese baine abia. 
Ḡaubada e, dahaka na nariamu? Egu helaro na oi. 
Egu kara dika iboudiai lalodia amo ba harohogu mauri; kavakava taudia na ba laodia ahu, basie ihi-ihiraigu. 
Lau na asi reḡereḡegu, udugu asina haḡaia; badina be oi ese o karaia. 
Emu hekwadi na egu amo bavabia oho; oi imamu ena hedadaba ese vada e alagu. 
Taunimanima na edia kara dika daidiai o gwau henidiamu negedia ai na idia hairaidia o ha-oreamu, kaubebe na heto. Momokani, taunimanima iboudiai na hahodi tamona na heto. (Selah) 
Iehova e, egu ḡuriḡuri ba kamonai; egu taitai ba hakala henia; iruru-matagu ba itadia negana ai, udumu basio hakapua. Badina be lau na emu vadivadi; lau na noho-hedoa taugu, senegu iboudiai heḡereḡeredia. 
Egu amo ba mede kerehai, bena moale baina diba, ini amo do basina raka oho basina lao bubuni negana ai.