SALAMO.
62.
Lau laumagu ese Dirava mo e nariamu, asi reḡereḡegu; ihamaurigu na iena amo e maimu. 
Ia mo sibona na egu nadi-gini bona egu hahemauri, egu kohoro; lau na basina marere-marere. 
Iboumui ai ese tau tamona bavala-ala henia ela bona edena nega ai? e gini sehemu maḡuna eiava e marere-mareremu arana na heto? 
Edia lalo-hadai tamona be ena dagi amo bae doria dobi; hereva koikoidia e moalelaimu; ududia amo hahenamo herevadia e gwauraimu, a lalodia ai e heuduguirai. (Selah) 
Lau laumagu ese Dirava mo e nariamu, asi reḡereḡegu; badina be egu helaro na ienai. 
Ia mo sibona na egu nadi-gini bona egu hahemauri, egu kohoro; lau na basina marere. 
Egu mauri bona ihamomokanigu na Dirava enai; egu nadi-gini badana na Dirava, egu roho-mauri gabuna na Dirava. 
Taunimanima e, nega iboudiai ia bavabidadama henia; lalomui anidia na ia vairanai ba hahedinarai; eda roho-mauri gabuna na Dirava enai. (Selah) 
Dagi maraḡi taudia na hahodi ta na heto; dagi bada taudia na asi anidia; metau hahetoho ḡauna ai e haraḡamu, metaudia idoinai na maraḡi, hahodi tamona metauna ida asie heḡereḡere. 
Dadidadi karadia basio abidadama henidia, henao karadia basio larodia kava; emui taḡa bema bada, basio lalokau henia. 
Nega hata Dirava vada e hereva, nega harua ini vada o kamonai toma: siahu na Dirava ena. 
Ḡaubada e, hebogahisi na oi mo emu; badina be taunimanima ta ta ena ḡaukara ena ḡaukara heḡereḡeredia, davadia o henidiamu.