SALAMO.
65.
Dirava e, Siona ai bae imodaimu; bona gwauhamata anidia na oi bae henimu. 
Ḡuriḡuri ikamonaina Diravana e, taunimanima iboudiai na bae vasi, 
kara dika daidiai Emai kara dika ese e hadareremaimu negadia ai na oi ese o gwaudia taomu. 
Emu maḡu ai baine noho totona o abia hidimu bona o hakaua kahimu tauna be namo; emu ruma ena namo ai ese baia moalelaia, emu dubu helaḡana bunai. 
Ai ihamaurimai Diravana e, hahegari karadia amo o haere henimaimu bona o hamaurimaimu; oi na tanobada dokodia iboudiai edia helaro, bona davara daudau-hereadia edia danu. 
Oi ese emu goada amo ororo o hadaidia, oi na siahu o hariolaiamu; 
oi na davara reḡedia o gwaudia taomu, edia hurehure reḡedia bona taunimanima edia heloḡo-heloḡo danu. 
Taunabunai tanobada hetoadia daudau-hereadia ai e nohomu taudia ese oiemu toa e gari henidiamu; oi ese dina dae tanodia bona dina diho tanodia o hamoalediamu. bena e moale hisi daemu. 
Tanobada o vadivadi heniamu, o haparipariamu, uma tanodia o hanamodiamu; Dirava ena sinavai na ranu ai e honumu, uma anidia o henidiamu, vada o haheḡaeḡaedia tanodia lalodiai. 
E ruadia tanodia o hapariparidia badamu, tano latalatadia o hataoradiamu, medumedu amo o hamanokadiamu, lalodiai e tubumu ḡaudia o hanamodiamu. 
Emu herahia ese laḡani ihanamona e haḡuḡuruamu, aemu gabudia amo digara e dihomu, 
tano ḡaḡaena reidia ai e dihomu, ororo ese edia moale e rioamu. 
Rei gabudia ese mamoe seridia na e hadabuadiamu, koura ese uit e hadokiamu, ane e abimu, e moale hisi daemu.