SALAMO.
66.
Tanobada idoinai, Dirava ba hisi dae henia; 
ia ladana hairaina anedia bavabi, ba imodaia badabada. 
Dirava ba hanamoa, baoto: Emu kara na hahegari karadia. emu siahu na bada herea, oi inaimu na vairamu ai e gari igo dihomu. 
Tanobada idoinai ese oi e toma henimu dihomu, oi ihanamolaimu anedia e abimu, oi ladamu iheatolaina anedia. 
Aoma, Dirava ena kara ba itaia; ena kara taunimanima bogaragidiai na hahegari karadia. 
Davara na tano kaukauna ai e halaoa, taunimanima na aedia amo sinavai e rakaia hanai, unuseni ai ia ta moalelaiava. 
lena siahu amo e lohia hanaihanaiamu, ia matana ese bese idau-idau e nenediamu; gwau-hemuri taudia na sibodia basie heaḡi. (Selah) 
Bese idau-idau e, emui Dirava ba hanamoa, ia iheatolaina reḡedia bae dae. 
Ia ese mauri ai vada e dogomai tao, aemai vada e naridia dainai asie dedi. 
Badina be, Dirava e, oi ese vada o tohomai; silver e tohoamu na heto vada o tohomai. 
Huo ai vada o abimai, koekoemai vada o hahisidia. 
Edia hosi aedia amo e moimai tao taudia na so rudia; lahi amo a raka hanai, bona ranu amo danu. A oi ese gabu namona ai vada o hakaumai lasi. 
Lau be ḡole-oho bouboudia na emu dubu ai baina rakalai vareai, egu gwauhamata anidia na oiemu ai baina kara, 
hisi na ani negana ai bibinagu ese e gwauraia heḡereḡerena, udugu ese e gwauraia hamata na heto. 
Ubu-ubu ḡaudia baina hahelaḡadia, emu ḡole-oho bouboudia ḡaudia, bona mamoe mamaruanedia iḡole-ohodia kwalahuna danu; boromakau mamaruanedia bona nani danu ba hahelaḡadia oiemu. (Selah) 
Dirava garina o garimu taumui iboumui ai, aoma, ba kamonai. Ia ese ede vada e karagu toma na baina gwauraia hedinarai. 
Lau ese ia na boi henia, lau malagu ese ia e imodaia. 
Lalo-hadai dikadia na lalogu ai bema mia, Ḡaubada ese basinema kamonai henigu. 
A momokani Dirava ese vada e kamonai, ia ese egu noinoi herevadia vada e abi dae. 
Dirava aina hanamoa, badina be egu ḡuriḡuri se dadaraia, ena hebogahisi egu amo na se abia oho.