SALAMO.
95.
Aoma, ita ane baita abia, Iehova ena; hamaurida nadi-ginina baita moale hisi dae henia. 
Ia vairanai baita hebou, ia baita hanamoa; baita moale hisi dae henia mai ihanamolaina anedia ida. 
Badina be Iehova na Dirava badana, Ḡaubada hereana, dirava iboudiai e hereadiamu. 
Tanobada ena dobu gabudia na ia imana ai, ororo doridia danu iena. 
Davara danu iena, badina be ia ese e karaia; tano danu ia imana ese e karaia. 
Aoma, baita toma diho, baita igo diho, Iehova, ita ikarada Diravana, vairanai tuida baita hadai; 
badina be ia na iseda Dirava; ita na iena heubu taudia, bona h imana mamoedia. Hari dina ai gadona boma kamonai bema namo. 
Lalomui basio ha-aukadia, Meriba ai heḡereḡerena, eiava Masa tano-ḡagaena ai o nohova dinana ai na heto. 
Una negana ai senemui ese e tohogu; ena be egu ḡaukara vada e itaia, to e dibaḡanigu. 
Laḡani hari-ahui una uru na inai heniava, nato: Idia na lalo-kerere besena, egu dala asie badinaiamu. 
Taunabunai egu badu ai na gwau hamata, idia na egu laḡa-ani ai basie vareai nato.