SALAMO.
110.
Iehova ese egu lohia e hamaoroamu, e tomu “Lau idibagu kahana ai ba helai, ela bona oi inaimu na aemu ihadaidia ḡaudia ai baina halaodia”. 
Iehova ese ena siahu dagina auna na Siona amo vada e siaia, oi inaimu bogaragidiai ba lohia. 
Emu tuari oreana na ororo helagadia ai ba hakaua lao dinana ai, emu orea taudia ese kunudia bae rahu pou; Daba matana ai, hunu na heto, emu goada matamatana bainema. 
Iehova vada e gwau hamata, bona lalona basine ha-idaua: oi na hahelaḡa tauna hanaihanai, Melkisedek ena orea tauna. 
Ḡaubada na oi idibamu kahana ai; ena badu dinana ai pavapava baine huaridia. 
Bese idau idau bogaragidiai hahemaoro baine karaia, edia gabu na mase tau-anidia ai baine hahonudia; ia ese ikwaradia taudia baine huaridia, tanobada heḡeḡemadai ai. 
Dala ai ia na sinavai ranuna baine inua; taunabunai ia na baine gaga dae.