SALAMO.
112.
Iehova ba imodaia. Iehova garina e garimu tauna be namo, ena haheḡani e moalelaidiamu tauna danu. 
Ia garana bae goada edia tano ai; kara maoromaoro taudia edia uru baine hanamo. 
Moni bona kohu na ena ruma ai, bona ena kara maoromaoro e hesinu hanaihanaimu. 
Diari na dibura ai e taramu, kara maoromaoro taudia edia; Iehova na mai ena harihari-bada bona mai ena hebogahisi bona mai ena kara maoromaoro. 
E hariharimu bona e heni torehaimu bona ena kara e karamu mai maoromaorona ida tauna be namo; 
badina be kara maoromaoro tauna na nega ta basine mareremarere; bae laloa hanaihanai. 
Ia na hari dikadia garidia se garimu; lalona na auka, Iehova e abidadama heniamu. 
Lalona na auka, basine gari, ela bona ena ura baine hedinarai, ana inai taudia latadiai. 
Vada e harihari momo, ogoḡami taudia vada e harihari henidia; ena kara maoromaoro e hesiriu hanaihanaimu, ena doa na mai hairaina ida e heabi isimu. 
Kara dika tauna ese e itaiamu, bena e badumu, gadigadina a hahedaimu, bena e veve ohomu; kara dika tauna ena ura na anina basine vara.