SALAMO.
140.
Iehova e, kara dika taudia edia amo ba harohogu mauri; daḡedaḡe taudia edia amo ba hamaurigu. 
Idia ese kara dikadia e lalo hadailaimu, bona tuari e havaradia louloumu. 
Maladia na e hamatakamu, gaigai malana na heto; bibinadia henudiai na hekori gaigaidia edia mase muramurana. (Selah) 
Iehova e, kara dika taudia imadia amo ba gimagu, daḡedaḡe taudia edia amo ba hamaurigu; idia ese aegu ihahetutuhidia dalana vada e haeroa. 
Heaḡi taudia ese rikiriki vada e hunia, iabigu totona, huo vada e otoa, dala isena ai idoalaigu ḡaudia vada e kara. (Selah) 
Iehova na hamaoroamu, na tomu “Oi na egu Dirava”; Iehova e, egu noinoi herevadia ba hakala heni. 
Iehova e, egu Ḡaubada, ihamaurigu tauna mai goadamu, tuari dinana ai kwaragu vada o laoa ahu. 
Iehova e, kara dika tauna ena ura basio henia; ena lalo-hadai dikana basio durua. (Selah) 
E ḡeḡegu daemu taudia na kwaradia e abidia isimu; bibinadia herevadia dikadia ese bae hadareredia; 
lahi gidadia na latadiai bae moru, guri ai bae tahodia dobi, basie tore isi lou, 
Taunimanima ihadikadia herevadia e gwauraimu tauna na tano ai basine noho taritari; dika ese daḡedaḡe tauna na baine lasia tao haraḡa. 
Lau dibagu Iehova ese hisi e animu tauna ena dala baine hamiaia, bona e dabumu tauna na ahuna maorona baine henia. 
Momokani, kara maoromaoro taudia ese oi ladamu bae hanamoa, kara ḡoevaḡoeva taudia na oi vairamu ai bae noho.