HEREVA LADA-ISIDIA.
4.
Natu e, tama ena hahediba herevadia ba kamonai; ba hakede henia, bena lalomui bae parara; 
badina be hahediba herevadia namodia vada na henimui; egu hahediba na basio rakatania. 
Merogu ai lau danu mai tamagu, maraḡigu ai sinagu ese e lalokau henigu bada; 
una negana ai tamagu ese e hadibagu, eto: Egu hereva na lalomu ai ba dogodia tao tarika-tarika; egu haheḡani ba badinadia, bena ba mauri. 
Basio helalo boio; udugu herevadia amo basio raka muri. Aonega bavabia, lalo-parara bavabia; 
basio rakatania, bena ia ese baine narimu; ba ura henia, bena ia ese baine gimamu. 
Aonega matamana binai: aonega bavabia; dahaka dahaka bavabi, to lalo-parara basio reaia. 
Ba laloa bada, bena ia ese baine heatolaimu; ba rosia, bena ia ese baine imodaimu. 
Herahera ḡauna namona na oi kwaramu baine havavalaia; havava ḡauna mai hairaina baine henimu. 
Natugu e, a kamonai; egu hereva bavabi dae, bena emu mauri laḡanidia bae hoho. 
Aonega dalana vada na hadibalaimu; kara maoromaoro daladia ai vada na hakaumu. 
Ba raka negana ai aemu basine hekwakwanai; boma heau, basioma hetutuhi. 
Hahediba ba dogoa tao, basio kahua nege; ba gimaia, badina be ia na emu mauri. 
Kara dika taudia edia dala ai basio raka vareai, kara havara taudia edia dala ai basio raka; 
ena amo ba siri, basio rakalaia; ena amo ba raka oho, ba rakaia hanai. 
Badina be basie mahuta diba ela bona kara kerere tavada bae karaia; mahuta ai bae dabu ela bona tau ta vada bae hahekwakwanaia. 
Badina be e aniamu ḡauna na kara dika, bona e inuamu ḡauna na daḡedaḡe. 
A kara maoromaoro taudia edia dala na daba matana na heto; diarina na e bada e laomu ela bona dina e taramu. 
Kara dika taudia edia dala na dibura masemase na heto, asi dibadia dahaka ḡau ai e hetutuhimu. 
Natugu e, egu hereva ba hakede henidia; taiamu a hakala, egu hereva ba kamonai. 
Oi vairamu amo basie boio, oi lalomu ai ba baladia heni. 
Badina be idia na mauri, e davaridiamu tauna enai; idia na ia hidiona idoinai ihamaurina. 
Lalomu ba gimaia tarika-tarika, badina be iena amo mauri e lohilohiamu. 
Hereva gageva-gagevadia na emu amo bavato siri; hereva koikoidia na emu amo ba nege daure. 
Matamu na vairamu kahana bae roha henia; vairamu kahana do ba raraia tao. 
Aemu daladia nahuadia ba toho, bena emu dala iboudiai bae momokani. 
Basio heau mageva, idiba kahana amo eiava lauri kahana amo; aemu na kara dika amo bae raka siri.