HEREVA LADA-ISIDIA.
11.
Metau ihahetohona e hakoikoiamu ḡauna na ḡau dika-hereana Iehova enai, a hahetoho aurina mai momokanina na ia ese e moalelaiamu. 
Hekokoroku e kaumu negana ai, hemarai danu e kaumu, aonega na manau taudia ediai. 
Kara maoromaoro taudia na edia lalo-maoromaoro ese ehakaudiamu, a kara heḡuiheḡui taudia na edia lalo-gagevagageva ese e habuadia tarimu 
Badu dinana ai taḡa na asi hahenamona, a kara maoromaoro ese mase amo e hahemaurimu. 
Asi ena kerere tauna na ena kara maoromaoro ese ena dala e hamaoromaoroamu, a kara dika tauna na sibona ena dika ese e hahekwakwanaiamu. 
Kara maoromaoro taudia na edia kara maoromaoro ese e hamauridiamu, a kara heḡuihegui taudia na edia ura dikadia ese e dabaidia taomu. 
Kara dika tauna e masemu negana ai, ena helaro danu e masemu, bona Dirava asie matauraiamu taudia na edia helaro ai e baiamu. 
Kara maoromaoro tauna na ena hekwakwanai amo e roho maurimu, bena ia gabuna ai kara dika tauna na hekwakwanai lalonai e vareaimu. 
Dirava se matauraiamu tauna ese ia uduna amo ia dekena tauna bema habuaia tari; a aonega dainai kara maoromaoro taudia na e roho maurimu. 
Kara maoromaoro taudia e noho namonamomu negadia ai, hanua na e moalemu; a kara dika taudia e masemu negadia ai, hanua na e moale hisi daemu. 
Kara maoromaoro tauna ena hahenamo herevadia ese hanua e hanamoamu, a kara dika tauna uduna ese e haheḡiḡia dobimu. 
Ia dekena tauna e ihi-ihiraiamu tauna na asi darana, a lalo-parara tauna na asi reḡereḡerena. 
Hesivarai loaloa tauna ese hereva hehunidia e hahedinaraimu, a lalo-ihunu tauna ese ḡau e moia taomu. 
Bema asi ihakaudia, taunimanima na bae keto, a hahealo taudia bema hoho, taunimanima edia noho baine namo. 
Idau tauna dainai e gwau hamatamu tauna ese hisina baine ani, a gwauhamata unuhetomadia e inai henimu tauna na basine dika. 
Harihari-bada hahinena na bae matauraia; daḡedaḡe taudia na bae taḡa. 
Hebogahisi tauna na sibona ena namo e havaraiamu, a daḡedaḡe tauna na sibona e hahehisimu. 
Kara dika tauna ese dava koikoina e abiamu, a kara maoromaoro e hadoamu tauna ese dava momokanina e davariamu. 
Kara maoromaoro ai e gini tutuka-tutukamu tauna na baine mauri, a kara dika e ḡavaiamu tauna na baine mase. 
Lalo-gagevagageva taudia na Iehova ese e inai henidia hereamu, a asi edia kerere taudia na ia ese e moalelaidiamu. 
Ba diba momokani, kara dika tauna na mata-hakani amo basineroho mauri diba; a kara maoromaoro taudia hari bae roho mauri. 
Hane-namo asi lalona na gold gadeina boroma kurukuruna ai na heto. 
Kara maoromaoro tauna ena ura na namo ai e ḡuḡurumu, a kara dika tauna ena helaro ese badu e havaraiamu. 
Tau ta ese e heni dudukaumu, to ena taḡa na e bada e laomu; ma ta ese bema heni ḡaudia na se henimu, to ia na e ogoḡamimu. 
Harihari-bada tauna na ena taḡa ma e badamu, bona e dairi-dairimu tauna na bae dairia. 
Uit e ruamu tauna na taunimanima ese e uduguiraiamu, a e hoiamu tauna latanai hahenamo herevadia bae gwaurai. 
Namo e tahua malaka-malakamu tauna ese harihari-bada danu etahuamu, a dika e tahuamu tauna ese dika e davariamu. 
Ena taḡa e abidadama heniamu tauna na baine marai, a kara maoromaoro tauna na baine tubu, rau matamatana na heto. 
Ena ruma taudia e hahekwarahidiamu tauna ahuna na lai; kavakava tauna na aonega tauna ena hesiai tauna ai bainela. 
Kara maoromaoro huahuana na mauri auna, a taravatu itata-utuna ese mauri e abia ohomu. 
Kara maoromaoro tauna ese davana baine abia ina tanobada ai; benaini, kara dika tauna bona kara havara tauna edia kara davadia na daka bada.