HEREVA LADA-ISIDIA. 12. Mata-hakani e ura heniamu tauna ese aonega e ura heniamu, a sisiba e inai heniamu tauna na kavakava. Tau namona ese harihari-bada na Iehova ena amo e abiamu, a lalo-hadai dikadia tauna na Iehova ese dikana e gwauraimu. Kara dika ese tau ta se haginia tutukamu, a kara maoromaoro tauna na ramuna basine heraḡa. Hahine namona na adavana kwarana ihavavalaina, a adavana e hahemaraiamu hahinena na ia turiana ihamanokana gorerena na heto. Kara maoromaoro taudia edia lalo-hadai na mamaoro-mamaoro; kara dika taudia edia hahealo na mai hedibaḡanidia. Kara dika taudia edia hereva na rara ihahebubuna totona e banimu, a kara maoromaoro taudia ududia ese taunimanima e hamauridiamu. Kara dika taudia na e dareremu bena e pukimu, a kara maoromaoro tauna ena ruma na baine hedai. Tau ta bae hanamoa ena lalo-maoromaoro dainai, a lalo-gagevagageva tauna na bae dadaraia. Dagi maraḡi tauna sibona dainai e hekwarahimu na namo, a sibona lohia e hegwauraimu to e hitoloamu tauna na dia namo. Kara maoromaoro tauna ese ena boromakau e bogaia hisimu, a kara dika tauna ena hebogahisi na mai daḡedaḡena. Ena tano e ruaiamu tauna ese aniani momo baine abia, a kara asi anidia e karamu tauna na asi darana. Kara dika tauna ena kohoro aukana e heḡiḡi dobimu, a kara maoromaoro tauna ramuna e hedaimu. Kara dika tauna na bibinana edia kerere ese bae idoaia, a kara maoromaoro tauna na hekwakwanai amo e roho maurimu. Ena hereva anidia amo tau ta e namo ḡuḡurumu, bona tau ta imana ḡaukarana ese e lou heniamu. Kavakava tauna ena dala na maoro, ia sibona ena ita-ita ai, a aonega tauna ese hahealo herevadia e hakala henidiamu. Kavakava tauna ena badu e hedinarai haraḡamu, a lalo-parara tauna ese heiri-heiri herevadia se lalodiamu. E hereva momokanimu tauna ese hereva maoromaorodia e gwaurai hedinaraiamu, a gwaurai-hedinarai koikoi tauna ese hereva koikoidia mo e gwauraimu. E hereva haraḡa-haraḡamu tauna ena hereva na dare e hegwadamuna heto, a aonega tauna malana ese hahemauri e mailaiamu. Momokani bibinadia na e mia hanaihanaimu, a koikoi malana na asine mia vanahamu. Koikoi na dala dikana, e laloa hatamu taudia lalodia ai; a namo e laloa hatamu taudia ese moale e davariamu. Hahedika ta se kaumu, kara maoromaoro taudia ediai, a kara dika taudia e hekwakwanai momomu. Hereva koikoidia e gwauraimu bibinadia na Iehova ese e inai henidia badamu, a e kara momokanimu taudia na ia ese e moalelaidiamu. Lalo-parara tauna ese ena diba e huniamu, a kavakava taudia ese edia kavakava e gwauraia hedinaraimu. E ḡaukara malaka-malakamu tauna baine lohia, a lahedo tauna na bae haḡaukaraia. Lalo-hekwarahi ese tau ta e hametauamu, a hereva namona ese e hamoaleamu. Kara maoromaoro tauna na dika ena amo e raka sirimu, a kara dika taudia na edia dala ese e hakaudia kereremu. Lahedo tauna ese dinana basine abia, a e ḡaukara malaka-malakamu tauna ese taḡa namo-hereana baine abia. Kara maoromaoro dalana na mauri, a kerere dalana na mase e lao heniamu dalana.