HEREVA LADA-ISIDIA.
14.
Aonega ese ena ruma e haginiamu, a kavakava ese sibona imana amo e veria garimu. 
Kara maoromaoro ai e rakamu tauna ese Iehova garina egarimu, a e raka gageva-gagevamu tauna ese e dadaraiamu. 
Kavakava tauna ena hereva na ia sibona doruna ikwadilaina auna, a aonega taudia bibinadia ese bae hamauridia. 
Asi boromakauna gabuna ai, roge na asi anina; a boromakau maruanena ena goada ese uma anidia e hahohodiamu. 
Sivarai momokanina e gwauraia hedinaraimu tauna na se koikoimu, a sivarai koikoina e gwauraia hedinaraimu tauna na e koikoi momomu. 
Ḡonaḡona tauna ese aonega e tahua kavamu, a lalo-parara tauna enai aonega idavarina na haraḡa. 
Kavakava tauna vairana amo ba raka oho, badina be unuseni ai aonega herevadia basio davaridia. 
Lalo-parara tauna ena aonega ese ena dala e hahedinarai heniamu, a kavakava taudia edia kavakava na e hekoimu. 
Dirava ese kara dika taudia e dadaraidiamu, a kara maoromaoro taudia ese ena lalo-namo e moalelaiamu. 
Lalo sibona ese ena idita mamina e dibaiamu, bona idau tauna ta na ia ida basie moale hebou. 
Kara dika tauna ena ruma baine heḡiḡi dobi, a kara maoromaoro tauna ena kalaga baine namo bada. 
Tau ta vairanai dala ita-itana na maoro, a dokona na mase e lao heniamu dalana. 
Kiri lalonai tau ta lalona e hisihisimu, bona moale dokona na lalo-hisihisi. 
Raka-muri tauna na sibona ena kara hualIuadia amo bogana baine kunu, bona tau namona na ena kara huahuadia amo danu. 
Lalo-duhu tauna ese hereva iboudiai e abi daemu, alalo-parara tauna ese e rakalaiamu dalana na e raraia taomu. 
Aonega tauna na sibona nahuana e tohoamu, bona kara dika amo e raka sirimu; a kavakava tauna ese haheauka e negeamu, bona e mata lahuimu. 
Badu haraḡa tauna na e kara kava kara kavamu, a mai darana tauna na e haheaukamu. 
Lalo-duhu taudia ahudia na kavakava, a lalo-parara taudia kwaradia na aonega ai e havavalaidiamu. 
Kara dika taudia ese kara namo taudia vairadiai e igo dihomu; bona kara havara taudia danu, kara maoromaoro taudia ikoukou ai. 
Ogoḡami tauna na ia dekena tauna ese danu se ura heniamu, a taḡa tauna turana na hutuma. 
Ia dekena tauna e dadaraiamu tauna na tau dikana, a ogoḡami taudia e bogadia hisimu tauna na e moalemu. 
Kara dika e lalo hatamu taudia na kekerere ani? Kara namo e lalo hatamu taudia ese hebogahisi bona heabidadama bae davari. 
Hekwarahi iboudiai na mai ahudia, a hereva kava ese dabu e havaraiamu. 
Aonega na aonega taudia kwaradia ivavalaidia ḡauna, a kavakava na kavakava taudia ihaheralaidia ḡauna. 
Hereva momokani e gwaurai hedinaraimu tauna ese mauri e havaraiamu, a hereva koikoi e gwauraimu tauna na tao-tore tauna. 
Iehova igari-henina ese kamonai lava-dae e havaraiamu; bona kamonai lava-dae tauna natuna ese roho-mauri gabuna baedavaria. 
Iehova igari-henina na e lohilohimu maurina; unu amo masc ena idoa ai basita kau. 
Taunimanima hutuma na pavapava hairaina, a lohia asi ena orea taudia na vada e baia. 
Ena badu e halahemu tauna na lalo-parara hereana tauna, a badu haraḡa tauna cse kavakava e habadaiamu. 
Lalo-manau ese tau-anina e hamauriamu, a vaḡeḡe ese turia e hamanokaiamu. 
Ogoḡami tauna e hahisiamu tauna ese ia ikarana Diravana e ḡonaḡonalaiamu, a dabu tauna e bogaia hisimu tauna ese Dirava e matauraiamu. 
Kara dika tauna na ena kara dika ese e hahekwakwanaiamu, a kara maoromaoro tauna na ena lalo-maoromaoro ese baineharohoa mauri. 
Aonega na lalo-parara tauna lalonai e miamu, a kavakava taudia lalodia ese asie dibaiamu. 
Kara maoromaoro ese bese ta e hanamoamu, a kara dika ese orea ta e hahemaraiamu. 
E kara aonegamu hesiai tauna na hanua pavapavana ese e lalo-namo heniamu; a ena badu na hemarai karadia e karamu tauna latanai e kaumu.