HEREVA LADA-ISIDIA.
17.
Aniani kakorona asi reḡereḡe gabuna ai ese aria badana mai heiri-heirina na e hereaiamu. 
Hesiai tauna e kara aonegamu ese ruma biaguna natuna hemarai karadia e karamu na baine biagua, bona ahuna baine abia, tadikaka ta na heto. 
Keikei na silver ena, bona lahi na gold ena, bona Iehova ese taunimanima lalodia e tohodiamu. 
Kara dika tauna ese dika bibinadia e kamonai henidiamu; bona koikoi tauna ese mala gageva-gagevana e hakala heniamu. 
Ogoḡami taudia e ḡonaḡonalaidiamu tauna ese ia ikarana Diravana na e ihi-ihiraiamu; hahehisi karadia e moalelaiamu tauna ese mata-hakani amo basine roho mauri. 
lahu kwaradia ihavavalaidia na tubudia; bona memero ihahairaidia na tamadia. 
Hereva ḡoevadia na asie heḡeregere kavakava tauna uduna ai, bona koikoi herevadia danu lohia uduna ai. 
Koikoi henitaona na mea nadina na heto, e henimu tauna ese unu e laloa tomamu; ena kara iboudiai anidia e varamu. 
Dika e gwau taomu tauna ese lalokau e tahuamu, a sivarai e piuamu tauna ese hetura e hadikaiamu. 
Sisiba herevana tamona ese lalo-parara tauna lalona e gwadaia dobumu, a hekwadi sinahu-ta ese kavakava tauna asie haberoamu. 
Kara dika tauna ese daḡedaḡe e tahuamu; gwaukau tauna mai daḡedaḡena ida na ia bae siai henia. 
Tau ta ese bea hahinena, natuna vada e dadidia ḡauna, ida bae hedavari na sisina namo, a kavakava tauna ida bae hedavari na dika herea. 
Tau ta ese dika bema haloua, namo davana, dika ese iena ruma basine rakatania. 
Heatu matamana na ranu ikehona na heto; taunabunai heai do basine vara ai ba raka oho. 
Kara dika tauna maorona baine gwauraia tauna bona kara maoromaoro tauna dikana baine gwauraia tauna raruosi na Iehova ese e inai henidia badamu. 
Badina be dahaka kavakava tauna imana ai aonega ihoilaina davana baine mia, a ia be asi darana? 
Tau ta turana ese nega iboudiai e lalokau heniamu; bona tadikakana ena lalokau na dika negana ai e hedinaraimu. 
Asi darana tauna ese gwauhamata ḡauna e henimu; ia dekena tauna vairanai gwauhamata toana ai e laomu. 
Kara dika e ura heniamu tauna ese heiri-heiri danu e ura heniamu; bona ena iduara atai ai e karaiamu tauna ese hahebua-tari e tahuamu. 
Lalo-gagevagageva tauna na ena ḡaukara anidia asie varamu, bona malana mai koikoina tauna na hahehisi ai e morumu. 
Lalo-duhu merona ese tamana lalona e hahisihisiamu; kavakava merona tamana na se moalemu. 
Lalo-moale na muramura namona, a lalo-metau ese turia e hamanokadiamu. 
Kara dika tauna ese koikoi henitaona e abia hehunimu, hahemaoro ihagagevana totona. 
Lalo-parara tauna ese aonega e haḡereamu, a kavakava tauna ese tanobada dokodia e roha henia laomu. 
Kavakava merona ese tamana lalona e hahisihisiamu, bona e havaraia hahinena lalona e hadikaiamu. 
Kara maoromaoro tauna matana ihakanina na dia namo; lalo-ihunu taudia bae dadabadia na dika. 
Se hereva momomu tauna na mai aonegana; se badu-haraḡamu tauna na mai ena lalo-parara. 
Kavakava tauna basine hereva negana ai, bae laloa ia na aonega tauna; uduna baine hakapua negana ai, baeto ia na lalo-parara tauna.