HEREVA LADA-ISIDIA.
27.
Kerukeru ḡaudia basio heaḡilaidia; badina be asi dibamu dina ta ai dahaka baine vara. 
Ta ese baine hanamomu, dia oi sibomu udumu; idau tauna ta ese, dia oi sibomu bibinamu. 
Nadi na metau, miri danu metau; a kavakava tauna ena hahebadu daladia na metau herea. 
Badu na mai dagedaḡena; ia na abata na heto; a vaḡeḡe na daika ese baine ginia ahu? 
Sisiba baine hedinarai na namo; lalokau baine hehuni na dika. 
Hetura ai e henimu berodia na mai heabidadamadia ida, a inai tauna ena haherahu momo na mai koikoidia. 
Boga-kunu tauna ese bada-ranuna e dadaraiamu, a hitolo tauna enai ḡau iditadia iboudiai na mai gaihodia. 
Ena noho gabuna e rakataniamu tauna na ena ruma e rohotaniamu manuna na heto. 
Dehoro bona muramura mai bonana ese lalo e hamoaleamu; a hekwakwanai ese lalo e hadikaiamu. 
Turamu bona tamamu turana basio rakatanidia; bona hahehisi karana emu ai e kaumu dinana ai tadikakamu ena ruma basiola. Dekemu tauna ena noho kahi ese tadikakamu ena noho daudau e hereaiamu. 
Natugu e, ba aonega, lalogu na ba hamoalea, e gwau henigumu tauna baina haere henia totona. 
Lalo-parara tauna ese hahedika e itaiamu, bena e komumu; a lalo-duhu taudia na e raka laomu, unu amo e hisihisimu. 
Idau tauna dainai e gwau hamatamu tauna na ena dabua bavabia; bona idau taudia daidiai e gwau hamatamu negana ai, iena amo gwauhamata toana do bavabia. 
Daba matana ai e tore isimu, dekena tauna e hanamoa badabadamu, tauna na heuduguirai tauna bae gwauraia. 
Ḡadeḡade hahinena na medu e hetuturumu na heto; 
ia igwau-taona na lai igwau-taona na heto, eiava ima idibana ai dehoro ikahu-taona na heto. 
Auri ese auri e segeamu; bona tau ta ese ma tau ta e segeamu. 
Suke auna e reḡuamu tauna ese huahuana baine ania, bona biaguna e gimaiamu tauna na bae imodaia. 
Tau ta lalona na tau ta lalona ai e heitamu, ia vairana laulauna na ranu ai e heitamu na heto. 
Mase gabuna bona dobu masemase gabuna asie honumu; bona tau ta matana ese ḡau se ita davanamu. 
Uro na silver ena, lahi gold ena, a tau ta itohona na heimodai ai e hedinaraimu. 
Kavakava tauna na uit ida ba gwadaia hebou, to ena kavakava na iena amo basine hekoki oho. 
Emu mamoe seridia ede e noho tomamu na ba diba, bona emu nani seridia ba reḡudia; 
badina be taḡa na se mia hanaihanaimu. Kwara ivavalaina ḡau na uru iboudiai lalodiai baine mia a? 
Rei baine marai, ma rei matamata baine vara, bona ororo avadia bae habou; 
una negana ai mamoe natudia amo emu hahedoki ḡaudia bavabi, bona nani na emu tano davana ai baela; 
nani ratana na baine davana oi amu, bona emu ruma taudia adia, bona emu hesiai kekenidia adia.