KOHELETE.
3.
Ḡau iboudiai na mai edia nega korikori, bona ḡaukara iboudiai guba henunai e karamu be mai negadia: 
vara mai negana, mase mai negana; hadohado mai negana, ḡeiḡei mai negana; 
ala-ala mai negana, hahemauri mai negana; ruma irohona mai negana, ruma ihadaina mai negana; 
taitai mai negana, kiri mai negana; lalo-hisihisi mai negana, mavaru mai negana; 
nadi inegedia mai negana, nadi ihaboudia mai negana; haherahu mai negana, basie haherahu na mai negana; 
itahuna mai negana, ihaboiona mai negana; ikahu-taona mai negana, ikahu-negena mai negana; 
dabua idarena mai negana, dabua iturina mai negana; asi reḡereḡeda baita noho na mai negana, baita herevahereva na mai negana; 
heura-heheni mai negana, heinai-heheni mai negana; tuari mai negana, maino mai negana. 
Ḡaukara tauna ena hekwarahi anina be dahaka baine abia? 
Dirava ese taunimanima natudia vada e henidia bae hekwarahilai ḡaukaradia vada na itadia. 
Ia ese ḡau iboudiai vada e hahairaidia, ta ta ena nega ena nega ai; a taunimanima lalodia vada e haduhudia, idia ese Dirava ena ḡaukara, matamana ela bona dokona, basie davaria diba. 
Lau dibagu taunimanima edia dala namona tamona binai: bae moale, edia mauri dinadia iboudiai lalodiai bae hahemoale. 
Ina danu, iboudiai bae aniani bona bae inuinu, bona edia hekwarahi idoinai bae moalelaia; una na Dirava ena harihari ḡauna taunimanima ediai. 
Lau dibagu Dirava ena kara Iboudiai na bae mia hanaihanai; ḡau ta ma basie atoa kau eiava basie abia oho; Dirava ese unu vada e karaia toma, taunimanima na ia vairanai bae gari helaoreana. 
Harihari e miamu ḡaudia na gunaguna e miava, bona do bae vara ḡaudia danu gunaguna e miava; bona Dirava ese vada e heabi oho ḡaudia na e tahudiamu. 
Dina henunai ma na itaia, hahemaoro ḡoevaḡoeva gabuna ai kara dika e miava, bona kara maoromaoro gabuna ai kara gageva-gagevadia danu e miava. 
Lalogu ai nato: Dirava ese kara maoromaoro taudia bona kara dika taudia baine hahemaoro henidia; badina be ia ese bae vara ḡaudia iboudiai bona ḡaukara iboudiai edia nega vada e gwaurai. 
Lalogu ai ma nato: Dirava ese taunimanima natudia e tohodiamu, baine hahedinarai henidia idia na boroma mo. 
Badina be taunimanima natudia ediai e varamu bona boroma ediai e varamu dalana be tamona; ta e masemu heḡereḡerena, ma ta danu e masemu. Iboudiai laḡadia na heḡereḡere, taunimanima ese boroma asie hereadiamu; badina be iboudiai na asi anidia. 
Iboudiai na gabu tamona e laomu; iboudiai na ḡahu amo, bona iboudiai na ḡahu ai ma baela. 
Daika dibana taunimanima laumana na e daemu bona boroma laumana na tano ai e dihomu eiava? 
Taunabunai vada na diba, taunimanima ena dala namo-hereana binai, ena ḡaukara baine moalelaia, badina be ia ahuna bunai. Ia murinai bae vara ḡaudia na daika ese baine haheitalaia.