SOLOMON ENA ANE.
1.
Ane Herea-daena, Solomon ena. 
Udumu haherahuna amo boma harahugu, badina be emu uraheni ese vine ranuna e hereaiamu. 
Emu hedahu muramuradia bonadia na nanamo heherea; oi ladamu na dehoro e seiamu na heto. Una dainai ulato ese e ura henimumu. 
Murimu ai a verigu kau! Aitala haraḡa; hanua pavapavana ese ena ruma ai vada e hakaugu vareai. Baia heatolaimu, baia moalelaimu; emu uraheni baia imodaia bada, vine ranuna baia imodaia maraḡi. Mai badina idia ese e ura henimumu. 
Ierusalem kekenimui e, kopigu na korema-korema, to ita-itagu na namo, Kedara dabua rumadia na heheto, Solomon ena seseahu na heheto. 
Kopigu na korema-korema dainai basio raraigu; badina be dina ese vada e raragu. Taihugu ese e badu heniguva, vine imeadia ireḡudia ai e halaogu; a lauegu imea na asina reḡua. 
Egu lalokau taumu e, ba hadibagu, emu mamoe na edeseni ai o ubudiamu? Dina tubua ai edeseni ai o hahekurediamu? Bamomu edia seri badidiai baina loa eva-eva anina be dahaka? ***** 
Hane namo e, bema asi dibamu, mamoe vatagadia ba ḡavadia; emu nani natudia na mamoe ireḡudia taudia edia kalaga badidiai ba ubudia. ***** 
Egu lalokau e, Farao ena kariota hosina ta ida aina haheḡereḡeremu. 
Vahamu mai heraheradia ita-itadia na nanamo heherea, bona aiomu mai agevana danu. 
Ihaheralaimu ḡaudia baia kara, gold heraheradia mai silver-dia. ***** 
Hanua pavapavana na e ege dihova negana ai, egu muramura bonana namona e daeva. 
Egu lalokau na muro modana ta, ratagu padadiai e miamu. 
Egu lalokau na kofere buredia idabubuna ta, En-gedi vine-imeadia ai. ***** 
Egu lalokau e, oi na hane namo, momokani, oi na hane namo. Matamu na pune. ***** 
Egu lalokau e, oi na raho namo taumu; momokani, oi na mai hairaimu. Eda mahuta patana na gadoka-gadoka, 
eda ruma audia na sida, eda ruma toidaedia na beroso audia.