ISAIA.
21.
Maduna metauna tano ḡaḡaena, davara kahana ḡauna, latanai; Koe-hirihiri na diho kahana amo e daro e maimu na heto, ia na tano ḡaḡaena amo e maimu, tano dika amo e maimu. 
Mata-hanai aukana vada e hahedinarai henigu: dadidadi tauna ese e dadidadimu, hahebua-tari tauna ese e hahebua tarimu. Elam e, a dae lao! Media e, a hahegegea ahu! Ḡanaḡana idoinai ia ese vada e havaraia na lau ese na hadokoamu. 
Taunabunai, koekoegu e hisihisi hereamu; hisi ese e gugubagumu, hahine ena hekamonai hisidia na heheto. Lau na e ha-igogu dihomu dainai asina kamonaimu; kudougu e hahetahaiamu dainai asina heitamu. 
Daragu e dokomu, gari ese e butugu taomu; adorahi vaburana na hekise-hekise henia, to ia na egu heude-heude negana ai vada ela. 
Pata e dabaraiamu, geda e tahomu; e anianimu bona e muinumu. kesi na ba dehorodia. 
Badina be Ḡaubada ese ini e hamaorogu toma: Aola, gima tauna bavatoa; e itaiamu ḡauna na baine gwauraia hedinarai. 
Gui taudia baine itadia, hosi-gui taudia rarua rarua amo, bona doniki-gui taudia bona kamelo-gui taudia danu; una negana ai baine hakala balaheni, baine hakala balaheni-balaheni. 
Bena e roharoha tauna na e boi lolo, eto: Ḡaubada e, gima kohorona ai na ginimu, dina idoinai; bona egu gima gabuna ai na hegimamu, hanuaboi idoidiai. 
A itaia, gui taudia na e maimu, hosi-gui taudia, rarua rarua amo. Bena ia na e haere, eto: Babulono vada e moru, vada e moru; ena dirava laulaudia iboudiai na ia ese vada e huaridia kohi tano ai. 
Bamogu e, e kwadimu bona e tapomu taumu e, Iehova Sabaota, Israel Diravana, ena amo vada na kamonai ḡauna na oi na hahedinarai henimumu. 
Maduna metauna Duma latanai: Ta ese Seiri amo e boi henigumu, e tomu: Gima taumu, hanuaboi be edeheto? Gima taumu, hanuaboi be edeheto? 
Gima tauna e tomu: Daba na e maimu, a hanuaboi danu ma bainema; bema henanadai o uramu, vada ba henanadai, ma ba lou mai. 
Maduna metauna Arabia latanai: Dedan laolao hebou oreana taumui e, Arabia uda hedoma-hedomadia lalodiai ba taruha. 
Ranu ba mailaia, ranu-mase tauna ba henia; Tema tanona inoholaina taumui e, flaoa bavabia kau, heau-mauri tauna ba hedavarilai henia. 
Badina be dare amo vada e heau, e veria lasi darena amo, e marea pevana amo, bona tuari siahuna amo. 
Badina be Ḡaubada ese ini e hamaorogu toma: Laḡani tamona lalonai, ḡaukara tauna ena gwauhamata laḡanina na heto, Kedara hairaina idoinai baine ore: 
bona Kedara garana bogaragidiai goada taudia edia peva taudia oredia bae gadoi; badina be Iehova, Israel Diravana, vada e hereva.