ISAIA.
57.
Kara maoromaoro tauna e masemu negana ai, ta ese se laloamu; Dirava e matauraiamu taudia na e heabi ohomu negana ai, ta lalona se pararamu. Badina be kara maoromaoro tauna na hahehisi ḡaudia amo e heabi ohomu, 
bona maino ai e vareaimu; edia kara maoromaoro ai e rakamu taudia na edia mahuta patadia latadiai laḡadia e animu. 
A umui, mea hahinena natuna mamaruanemui, heuda-hanai tauna bona ariara hahinena ese e havaramui taumui, ini a raka mai. 
Daidia o hevasehalaidiamu? Daidia ihadikadia totona udumui o hahaḡa henidiamu, bona malamui o toi lasimu? Umui na dia kara kerere taudia natudia a? Umui na dia kara koikoi ese e havaradia taudia a? 
Umui na oak imeadia ai o mata bodagamu, bona au mauridia iboudiai henudiai danu, ani? Umui ese natumui na koura ai o aladia masemu, bona nadi kohuadia ai danu, ani? 
Oi ahumu na koura nadidia manada-manadadia bogaragidiai; momokani, idia na oi ahumu; inuinu boubou ḡauna vada o seia ediai, bona flaoa boubou ḡauna vada o mailaia. Lalogu na baine keru unu ḡau daidiai a? 
Ororo badana bona ḡaulatalatana dorinai emu mahuta patana vada o atoa; unu o dara dae lao, emu boubou ḡauna ihahelaḡana totona. 
Iduara bona iduara ihua-ihuana muridiai, emu toa ḡauna vada o haginia; badina be vada o rakatanigu, emu mahuta ḡauna vada o lailaia, vada o dae henia, lababana vada o habadaia; idia ida vada o gwau hamata, edia mahuta patana vada o ura henia, ḡaḡaedia ai vada o itadia. 
Dehoro o abia kau, Molek dekena ola, emu muramura mai bonadia danu o hahohodia; emu gwaukau taudia na dauha o siaidia lao, oibe, o siaidia diho, mase taudia edia dirava ediai. 
Emu dala na daudau dainai o hesiku, to asioto “Asi helarona”; emu goada o hamatamataia, taunabunai taumu se manori. 
Daika o gari henia? Daika garina o gari bena o koikoi, bona so lalogu tao, so lalogu une? Nega daudau lau asina hereva, taunabunai lau garigu so gari, a? 
Emu lalo-maoromaoro bona emu kara baina herevalaidia, to idia ese basie durumu. 
Ba tai lolololo negana ai, emu kaivakuku iboudiai ese bema hamaurimu; a idia na lai ese baine odadia oho, hodahoda ta ese baine abidia oho dauhai. A egu ai baine roho mauri tauna ese tano baine ḡaunaia, bona egu ororo helaḡana baine abia, ia ahuna. 
Baeto: A larebaia, a larebaia; dala avabia heḡaeḡae; helao-ahu ḡaudia iboudiai na egu orea taudia edia dala amo avabi oho. 
Badina be Atai bona Herea-dae Diravana, e noho hanaihanaimu bona ladana na helaḡa Diravana, ini e gwau tomamu: Lau na atai bona helaḡa gabuna ai na nohomu, bona e helalo kerehaimu bona e lalo manaumu tauna ida danu, lalo-manau tauna laumana baina haloua bona e helalo kerehaimu tauna lalona baina haloua helaoreana. 
Badina be basina heai hanaihanai, bona basina badu hanaihanai; badina be lauma na lauegu amo e lasimu, bona mauri laḡana na lau ese vada na havaraia. 
Ena mata-ḡaniḡani ai e kara havara dainai na badu, na rahua mase, vairagu na hunia, na badu; a ia na e roha muri havara-havara, ia sibona lalona ena ura heḡereḡerena. 
Ena kara vada na itadia, to baina hanamoa lou, baina hakaua bona tauhalo baina henia; e tailaiamu taudia ediai udu bibinadia anidia baina havaradia. 
Iehova na e tomu: Maino, maino, gabu daudau taudia bona gabu kahikahi taudia ediai; bona lau ese baina hanamoa lou. 
A kara dika taudia na davara hurehurena na heto, ia na basine laḡa ani diba, bona ena hurehure ese e hanurika-nurikaiamu bona e haduhuamu. 
Egu Dirava na e tomu: Kara dika taudia ediai maino se miamu.