NAHUMU.
2.
Ihamakohimu tauna ese vada e tuari henimumu, maḡu ba gimadia, dala ba itaia tao; emu rami ba hekasilaia, goadamu idoinai ba heḡaeḡaelaia. 
(Badina be Iehova ese Iakob siahuna e havaraia loumu, Israel siahuna heḡereḡerena; badina be dadidadi taudia ese vada e dadihaidia, bona rigidia na vada e hadihakia vaitani.) 
Iena goada taudia edia kesi na kakakaka, ena tuari taudia ese dabua kakakakadia vada e hahedokilai. Kariota e haboudia hegaeḡaemu negana ai idia na e hwuru-hururumu, lahi na heto; hosi na e hare loamu. 
Kariota na ariara ai e heau lalo-dikamu, hanua ariaradia ai e heau laomu e heau maimu; e kiama-kiamamu kede na heheto, e kinoa laomu kevaru na heto. 
Tuari biagudia na e boiridiamu, laodia ai e hetutuhimu; maḡu e heau heniamu, vaḡoma vada e haheḡaeḡaea. 
Sinavai ihadai-ahudia vada e kehodia, pavapava ena ruma ai kudoudia e hetahamu; 
pavapava hahinena na ena dabua vada e hahedokidia oho, vada e laohaia, ena hesiai kekenidia na e rohe ahumu, e taimu pune na heheto, e tai hevalemu. 
Nineve na ranuna e aru ohomu gohuna na heto; e boi lolomu, e tomu “A gini, a gini”, a ta se gini kerehaimu. 
Silver ba dadia! Gold ba dadia! Kohu namodia na asi dokodia, ḡau herea-daedia na momo herea. 
Hahevahu! Haheḡagae! Hahebua-tari! Kudou e hetahamu; tui e tabubu-tabubumu; koekoe iboudia e hisihisimu; vaira iboudiai e laboramu. 
Leona ena guri na edeseni ai? leona natuna edia kohua na edeseni ai? leona ese damuna e vareailaia gabuna, natuna e noholaiamu bena ta ese se hamarerediamu gabuna, be edeseni ai? 
Leona ese vamu e darea sisisisi, natuna adia, bona damuna gadona e koria, advana adia; ena kohua na damuna amo bona ena guri na vamu amo e hahonudia. 
Iehova Sabaota na e tomu: A itaia, lau ese na tuari henimumu; emu kariota na baina doudia, kwalahu ai baela; dare ese emu leona natudia baine ha-oredia; oi damumu na tanobada amo baina negea daure, bona emu gwaukau taudia eredia na basie hekamonai lou.