LUKA.
20.
Dina ta, ia na Dubu Helaḡa lalonai e hahedibava bona sivarai namo e harorolaiava; bena hahelaḡa taudia bona itorena taudia bona hanua tau-badadia dekena ela, 
e nanadaia, eto, Edena siahu ai ini ḡau o karamu? 
Ia e haere, eto, Lau danu hereva ta aina nanadailaimui: a hamaorogu, 
Ioane ena bapatiso be guba amo eiava taunimanima edia amo; 
Idia na sibodia e hereva heheni, eto, Ita baitato “Guba amo”, ia baineto “Matona asio kamonai heniava”. 
A baitato “Taunimanima edia amo”, taunimanima iboudiai ese nadi amo bae hododa; badina be idia na e tomamu Ioane na peroveta tauna. 
Taunabunai idia ese e haere henia, eto, Ia na ede amo ai asi dibamai. 
Bena Iesu eto, Lau danu ini ḡau na karalaimu siahuna na basina hamaorolaimui. 
Bena ia ese taunimanima e hereva henidia matama, ina sivarai heḡereḡerena e hamaorolaidia, eto, Tau ta, ese vine imeana e hadoa, bena imea ireḡuna taudia e habadinalaidia. Bena idau hanua ela, nega daudau unuseni ai eha noho. 
Huahua negana ai, ia ese ena hesiai tauna ta e siaia lao, imea ireḡuna taudia dekediai vine anidia baine abi. To imea ireḡuna taudia ese e dadabaia, ima kavakavana e haloua. 
Bena hesiai tauna ma ta e siaia, to idia ese e dadabaia, e hahemaraia, ma Ima kavakavana e haloua. 
Ihatatoina danu e siaia, to ia na e haberoa, bona murimuri ai e tahoa lasi. 
Bena imea biaguna eto, Lau na ede baina kara toma? Lau natugu, egu lalokau, hari baina siaia, bae itaia, reana bae matauraia. 
To imea ireḡuna taudia ese e itaia, e hereva heheni, eto, Dihina binai; baitama alaia mase, bena imea na baita abia iseda; 
Bena imea murimurinai e veria lasi e alaia mase. Imea biaguna be ede baine karadia toma? 
Ia na do bainema, imea ireḡuna taudia baine aladia ore, imea na idaudia haida baine henidia. E kamonai taudia eto, Ia! Lasi! Dia unuheto! 
A ia ese e raraidia, eto, Buka ai e torea herevana anina be dahaka? Ruma ikarana taudia ese e dadaraia nadina na Daiguna nadina ai vada ela. 
Una nadi latanai baine moru tauna na baine makohi; a una nadi ese baine kurea tao tauna baine pata rohoroho, ḡahu na heto. 
Una hora ai itorena taudia bona hahelaḡa taudia ese idabai-taona e ura, to aru taudia garidia e gariva; badina be idia dibadia una sivarai heḡereḡerena matana be idia ediai. 
Bena e itaia tao, bona dibaka taudia e siaidia, bae nanadaia kara maoromaoro taudia na heheto, ena hereva amo bae idoaia, bena gavana imana ai bona siahuna ai bae henia eto. 
Idia ese e nanadaia, eto, Hahediba taumu e, ai dibamai emu hereva bona emu hahediba na mamaoromamaoro, bona taunimanima oromadia to lalomu, a Dirava ena dala o hahedibalaia ḡoevaḡoevamu. 
Kaisara ena tax monina baita henia na maoro eiava? 
A ia be edia koikoi dibana, bena e haere, eto, 
Silver monina ta ba haheitalaigu. Daika laulauna bona daika ladana bini? Idia eto, Kaisara. 
Bena ia eto, Kaisara ena, Kaisara ba henia; Dirava ena, Dirava ba henia. 
Bena aru taudia vairadiai ena hereva amo asie idoaia; ena haere e hoalaia, asi edia hereva ta. 
Una murinai Sadukea taudia haida ia dekena ela: una orea e tomava mase na basie tore isi lou. Bena e nanadaia, eto, 
Hahediba taumu e, Mose ese emai taravatu e henimai, eto, Tau ta baine mase bona vabuna baine noho asi natuna, vabu na ihana ese baine adavaia, natuna baine havaraia mase tauna ena. 
Benaini, tadikaka hahitu e nohova, tau guna ese hahine ta e adavaia, to asi natuna vada e mase. 
Ihararuana bona ihatatoina ese una hahine e adavaia, 
ela bona hahituosi ese vada e abia. To iboudiai e mase, asi natudia. 
Gabeamo hahine danu vada e mase. 
Tore-isi-lou negana ai, una hahine na daika adavana? Badina be hahituosi ese e adavaia. 
Iesu e haere, eto, Ina tanobada taudia ese hahine e abidiamu, bona e headavamu. 
A do bainema basileiana ai kara maoromaoro taudia na bae tore isi lou, bena basie headava, 
bona basie mase lou; idia na aneru ida bae heḡereḡere bona Dirava natuna ai baela, badina be idia na toreisi-lou taudia. 
A mase amo e tore isi lou herevana na Mose ese au ḡiniḡini sivaraina lalonai vada e hamaoroda, Lohiabada vada e gwauraia: Abramham ena Dirava, Iakob ena Dirava. 
Banaini, ia na dia mase taudia edia Dirava, to mauri taudia edia; badina be taunimanima iboudiai na ia dainai e maurimu. 
Itorena taudia haida eto, Hahediba taumu e, hereva maorona benai. 
Bena unu amo asie nanadaia lou; vada e gari. 
A ia ese e nanadaidia, eto, Badina be dahaka taunimanima e tomamu Keriso na David natuna a? 
David na Salamo lalonai eto, Lohiabada ese egu Lohia e hamaoroa, eto, Lau idibagu kallana ai ba helai, 
Ela bona inaimu iboudiai na Oi aemu ihadaidia ḡaudia ai baina halaodia. 
O David sibona ese “lohiabada” e gwauraia be edeheto ia na ia natuna? 
Bena taunimallima iboudiai vairadiai ia ese ena hahediba e hamaorodia, eto, 
Itorena taudia nahuadia ba toho: idia na e uramu dabua latadia bae rio, bae loaloa, hoihoi gabudia ai taunimanima ese bae hanamodia, bona dubu ai bona anibou ai gabu hereadia ai bae helai. 
A idia ese vabu edia ruma e ha-ogoḡamidiamu; bena edia ḡuriḡuri e hadaudaumu, taunimanima ikoilaidia. Idia na dava metauna do bae abia.