17
Yoova igham ya ivot ila yaam
1 Ghoro ival tiina to Israel tipamundigin laghooŋ todi muul. Tipul ndug balim to iza ‘Siin,’ ve tilaghlaagh titaghon Yoova aliŋa. Tighamgham tovene le tila tivot ndug eez, iza Repidim. Ghoro atedi izi tonowe. Eemoghon ndug tonowen, ya maau.
2 Tovenen tiŋooŋ pa Mose tighaze: “Ughita amai ya ve nighun lak!”
Mose ipamuul aliŋadi ighaze: “Pughu vena to atemim yabyab ve aŋooŋ payou? Yam aghaze atoov Yoova tapiri?” Nam 20:2+
3 Eemoghon Israela murun di le tisami kat. Tovenen tiyou avodi pa Mose tighaze: “Pughu vena to ugham ghei nipul Isip, ve ughereb ghei ninim sualen? Ughaze yeiŋa ndinatumai ve ŋgai tiei nisob nimatmaat pa ya izi sualen?”
4 Tovenen Mose itaŋ roran Yoova ighaze: “O Yoova, ughita. Paam tamtoghon tonene tirab ghou pa yaam! Pale nagham vena padi?”
5-6 Yoova ipamuul Mose aliŋa ighaze: “Ugham ndolman pida to yes Israela, ve yamŋa amuuŋ anim tiou izi lolooz Sinai pughu. Sawa to unum, matam iŋgal titi tiom to ulos ya Nil pani, ve ukisi. You pale naneep izala yaam tiina eez pogho, ve nasaŋan gham. Yam anim avot, ghoro ugham titi tiom ve ulos yaam to nanepneep izala pogho. Ya pale ireer ivot pani, leso ival tiina to Israel tighun.” Tovenen Mose igham ndolman pida ve yesŋa tila, ve tighita Mose ilos yaam tiina tonowen pa titi toni itaghon Yoova aliŋa, ve ya ireer ivot. Yo 4:14; 1Kor 10:4
7 Ndug tonowen, Mose iwaat iza ighaze ‘Masa’ ve ‘Meriba.’ * Saveeŋ ‘Masa’ pughu: ‘tovaaŋ.’ Ve saveeŋ ‘Meriba’ pughu, nene ‘ŋoŋaaŋ.’
Pasa, sawa to yes Israela tineep tonowe, tiŋooŋ pani, ve titoov Yoova tighaze: “Ye ineep toman ghiit onoon, ma maau?” Hib 3:8
Yes Israela tiparab toman yes Amaleka
8 Yes Israela tinepneep izi ndug Repidim, ve yes Amaleka tinim tighaze tiparab toman di. 9 Tovenen Mose isaav pa Yosua ighaze: “Uvureer tamtoghon toit pida to tiraua kat pa malmal, ve yamŋa agharaat gham. Leso bozo ala aparab toman yes Amaleka. You pale nakis titi to Maaron, ve nazala nayoon izala ndug mbuŋa tonowen.”
10 Tovenen Yosua itaghon Mose aliŋa, ve igham yes Israela ve tila tiparab toman yes Amaleka. Ve Mose yesuru Aron ve ŋgeu ite, iza Hur, yes tol tizala tiyoon ila ndug mbuŋa. 11 Sawa to Mose ikaak nima ru iza, yes Israela tilib pa yes Amaleka. Eemoghon sawa to nima ipaspas ve izi, ghoro yes Amaleka anadi tilib pa yes Israela. 12 Mose ikaak nima iza ila ila le nima ipaspas kat. Tovenen Aron yesuru Hur tighita yaam eez, ve tighur Mose mbole izala. Ghoro tiit nima ru iza, ve eez ipalot nima waan, ve ite ipalot nima ŋas. Tipaloti tuŋia ve nima inepneep sala tovene le ndag izila. 13 Tauto Yosua yesŋa yes Israela tiparab ariaŋa pa buza todi le tilib pa yes Amaleka.
14 Ghoro Yoova isaav pa Mose ighaze: “Ulooŋ. Muri, you pale napasob yes Amaleka pa taan, le irau tamtoghon matadi iŋgal di muul maau. Aliŋag tonene, umbooda ila rau. Leso yes Israela matadi iŋgali itaghoni taghoni gha ila. Ve usaav ariaŋa pa Yosua, leso mata kisini paam.”
15 Yoova isavsaav le isob, ghoro Mose igharaat artaal eez, ve iwaat iza ighaze: “Yoova, ye pilak tiou.” † Ndaaba, yes ledi uli bodeeŋa (o pilak) to inim ghilalooŋ padi. Sawa to tila pa malmal, tikis pilak todi tonowen, ve tilaagh tomani. Ighaze tiparab toman koiadi le tilib padi, ve timuul tinim, nene titirtir pilak todi toman tinidi iza, leso ival tiina tiwatag tighaze tilib pa koiadi wa.
16 Ve Mose isaav muul ighaze: “Yes Amaleka tigham tinidi ve tipatooŋ nimadi pa Yoova. Tovenen ye tau pale iparab toman di itaghoni taghoni gha ila.”
*17:7: Saveeŋ ‘Masa’ pughu: ‘tovaaŋ.’ Ve saveeŋ ‘Meriba’ pughu, nene ‘ŋoŋaaŋ.’
†17:15: Ndaaba, yes ledi uli bodeeŋa (o pilak) to inim ghilalooŋ padi. Sawa to tila pa malmal, tikis pilak todi tonowen, ve tilaagh tomani. Ighaze tiparab toman koiadi le tilib padi, ve timuul tinim, nene titirtir pilak todi toman tinidi iza, leso ival tiina tiwatag tighaze tilib pa koiadi wa.