35
Ŋgeu eez isuŋ pa Maaron ighaze igham mulini ila koia nimadi
Mbouŋ to David
1 O Yoova, uul ghou ve utatan koiagŋa to aazne yeiŋa niwazoran ghei ve tiŋoŋooŋ payou ne.
Yes to tighaze tigham malmal payou, uvool tiou ve uparab toman di.
2 Undud ghom pa mburuguuŋ tiom to malmal, ve ukis sigeu tiom, ve umundig unum uul ghou.
3 Upas iiz ve ndaab tiom, ve upoon ghou pa yes to tigham lilin ghou.
You naghaze nalooŋ ghom usaav payou ughaze: “You Volaaŋa tiom. You pale nauul ghom.”
4 Yoova, yes to tighaze tirab ghou namaat, utatan tapiridi,
ve ugham di mayadi ve tighau tila.
Yes to tikaal ataam pa tiwaghamun ghou, ugham ŋgar todi iwaghamgham, ve timuul tila toman mayadi.
5 Yoova, naghaze aŋela tiom inaan di ve tighau tila,
inimale yaghur iviviir ghavuur.
6 Aŋela tiom igham taghon di, ve tilaan ila ndoroom lolo taghon ataam to kirikirikia, ghoro poia.
7 Pasa, you nagham sosor eta padi maau.
Eemoghon yes tiraar malum tighaze tisavag ghou.
Ve titai saambu to izila kat, leso natap nazila.
8 Yoova, ukarmotin di pa pataŋani tiina eta.
Ugham di tiŋgud malum to tiraara payou ne.
Ve ugham di titaptap tizila saambu to titaii payou. Leso tigham samia!
9 Yoova, ighaze ugham tovene, nene pale lolog poia kat payom, ve tinig iza pa ulaaŋ to ugham payou.
10 You pale napakur izam toman lolog, ve naghaze: “Yoova, sei to inimale yom? Eta maau!
Pasa, yes to tapiridi maau, yom ugham mulin di ila yes to tapiridi tintina ne nimadi.
Yes mbolaaŋa ve yes to tineep ila pataŋani lolo, yom pale uvool todi, ve ugham mulin di ila yes yubyubŋa nimadi.” Igham 9:14
11 Tamtoghon naol timundig ve tiŋgal saveeŋ kaarom payou tighaze tiwaghamun ghou.
Eemoghon saveeŋ ŋgaliiŋ to tinoknok ghasoniiŋ ghou pani, you nakankaan pani. Mt 26:60
12 You nagham ŋgar poia padi. Eemoghon yes tipamuul ŋgar samia payou.
Tauto lolog ipataŋan kat.
13-14 Eemoghon sawa to yes timorooŋ le tisami, lolog ipataŋan padi, ve nagharaat taug maau.
Ve naŋgun taug pa ghaniiŋ aniiŋ, ve naghur di tila suŋuuŋ tiou.
Eemoghon suŋuuŋ tiou tonene, yom ugham anoŋa ivot maau.
Tauto lolog ipataŋan kat, ve nataŋ padi inimale nditag, ma toŋvetaz tiou kat.
Ve nalaagh matag iza maau. Natudtud ve nataŋtaŋ nanimale ŋgeu to lolo ipataŋan pa tiina imaat.
15 Eemoghon sawa to pataŋani igham ghou ve naneep sami, yes lolodi poia, ve tilup di pa tiwaghamun ghou.
Yes to tighaze tigham malmal payou ne, you nawatag di maau. Nakankaan pa ŋgar todi.
Yes tinoknok ŋgaliiŋ saveeŋ payou.
16 Ve tipiyaav saveeŋ velegiiŋ naol payou.
Atedi yabyab payou kat, ve tiŋaaŋ mareer tighaze le tiwaghamun ghou. Mbaŋ 7:54
17 Yoova, pughu vena to umbabatut di, ve tighamgham ŋgar tovene payou? Pale ŋeez o uul ghou?
Yes tinimale laion to tisasaŋan pa tisaas ghou.
Tovenen ugham mulin ghou ila nimadi, leso naneep pooi.
18 Ighaze uul ghou, sawa to tamtoghon tiom tilup di pa suŋuuŋ, you pale nala toman di, ve napait ghom toman lolog poia.
Pale napait varum ila ival tiina tonowen naghodi.
19 Koiagŋa, muuŋ yeiŋa lupuuŋ tiei ee moghon. Eemoghon aazne, tighur koi payou sorok.
Tovenen uul ghou lak! Pa vene, tilib payou ve tipakur di.
Yes tighan matadi payou, ve tighaze: “Aa, ŋgeu to iwaghamgham wa!”
O Yoova, ŋgar tovene ivot malep! Yo 15:25
20 Yes tisavia saveeŋ luuma eta pa tilup tamtoghon ve tineep pooi ne maau.
Tiŋgalŋgal saveeŋ naol pa tamtoghon to orodi maate to tineep izi taan tonene.
21 Ve aliŋadi izaza sorok, ve tisavsaav ila matag tighaze:
“Aa, ghara nighita ghom!”
22 Yoova, ŋgar todi samsamia to naol ne, yom ughita di wa.
Neneeŋam padi malep! Tiina tiou, uneep saguan payou malep.
23 Maaron, yom Tiina tiou. Umundig ve uvool tiou.
Uyoon payou, ve utatan di.
24 Yoova, Maaron tiou, ŋgar tiom deŋia moghon.
Tovenen uyoon payou, ve upaghazoŋan ghou ila tamtoghon matadi ughaze you leg sosor eta maau.
Uul ghou. Pa vene, koiagŋa tipakur di pa pataŋani to igham ghou ne.
25 Ghoro lolodi poia, ve tisaav tighaze: “Aa, isob! Ŋgar to taghaze tagham pani, tauto ivot pani ve isami wa!”
26 Yoova, yes to tipakur di pa pataŋani to igham ghou ne,
ugham di tiwaghamgham, ve tighau tila toman mayadi.
Yes to tipapait taudi ve tiveleg ghou, upamayaŋin di le mayadi kat.
27 Eemoghon yes to tighaze yom uul ghou ve upaghazoŋan ghou ila tamtoghon matadi ughaze you leg sosor eta maau,
yes pale lolodi poia ve tinidi iza, ve tilool ve tipait izam.
Ve tisavsaav tighaze: “Yoova iza tiina kat! Ighaze mbesooŋa toni ineep pooi, pale ye paam lolo poia.”
28 Tovenen mboŋmaagh ila le rabrab izi, avog pale ivotia ŋgar deŋia to yom ughamghami, ve napait ghom.