77
Suŋuuŋ to tamtoghon to ighita ighaze Maaron ipul muri pa yes Israela
Mbouŋ to Asap
Ŋgeu to imuuŋ pa mbouŋ, irau isaav pa tamtoghon timbou mbouŋ tonene itaghon aliŋa ‘Yedutun’
1 You nataŋ roran Maaron.
Taŋiiz tiou iŋarua naghaze ighur taliŋa pa suŋuuŋ tiou tonene, ve iuul ghou.
2 Sawa to naneep ila pataŋani tiina lolo, you nazuaria ghou naghaze le nagham ulaaŋ ila to Maaron.
Mboŋ ve ndag, nakaak nimag iza, ve nasuŋ pani. Irau ateg izi maau.
Eemoghon mbeb eta irau irab ateg maau.
3 You matag iŋgalŋgal Maaron, ve lolog isami ve nataŋ.
Nagham ŋgar naol. Tauto lolog ipataŋan ve tapirig isob.
4 Mboŋ to naol ne, Maaron ipul ghou nagheen pooi maau.
Lolog ipataŋan kat le irau nasavia saveeŋ eta maau. Neneeŋag moghon.
5 Pasa, matag iŋgal imuul ila pa ndaman katindi to ila wa.
Ve naŋazuuv ŋgar to muuŋ Maaron ighamgham pa tamtoghon toni.
6 Tovenen mboŋ to naol ne, nagham ŋgar tiina ila lolog,
ve matag iŋgalŋgal naghaze:
7 “Vena, pale Maaron ipul muri payei, ve ipul ghei nineep sami itaghoni taghoni gha ila?
Irau lolo poia payei muul maau?
8 Ŋgar to lolo ineep tuŋia ila to tamtoghon toni ve iuluul di, nene isob wa?
Ve saveeŋ to ye imbua toman ghei, pale izi inim mbeb sorok itaghoni taghoni gha ila?
9 Ma Maaron ate yabyab kat, le ighami lolo imaagh pa poia toni? Tauto lolo isamin ghei muul maau ne?”
10 Nagham ŋgar tovene, tauto nasaav pa taug naghaze: “Lolog ipataŋan kat pasa, Maaron to ineep sala le sala kat ne, itoor ŋgar toni wa.
Taghita tapiri inim inim le aazne, taghita muul maau.”
11 Yoova, you pale matag iŋgal imuul ila pa uraat tiom tintina, ve mbeb gharatooŋadi to muuŋ ughamgham di.
12 Pale matag iŋgal uraat tiom ariaŋadi to naol ne, ve nagham ŋgar padi pooi.
13 O Maaron, yom ughamgham ŋgar patabuaŋ moghon. Ŋgar tiom ve gabuam, nene ite kat.
Maaron ite paam iza tiina inimale yom ne maau. Igham 15:11
14 Yom Maaron to ughamgham mbeb gharatooŋadi tintina.
Upatooŋ tapirim ivot ighazooŋ ila ndug ndug matadi ve tighita katini wa.
15 Yakop ve Yosep papaghu todi, yes tamtoghon tiom.
Muuŋ, ila taum tapirim, yom upas yes Israela tivot pa pataŋani todi. Igham 6:6
16 O Maaron, sawa to ya tintina tighita ghom, matughezaaŋ tiina igham di.
Ve te to ineep izila sila we, imatughez paam, ve imbeluuta izaza. Igham 14:21
17 Sawa tonenen, yaghur tae iyasosooŋ, ve uman tiina izi.
Ve ndug ighani milia, ve lalaav kiliŋia.
18 Yom ugham yaghur uti ililiit, ve lalaav kiliŋkiliŋia.
Ndug milia, le ndug ighazooŋ.
Ve yoŋgyoog itok taan katkatia.
19 Ataam tiom imbut te ivool ila pa dige ite.
Yom uvalag mazovan, le pida ila pa ŋas, ve pida ila pa waan, ve ulaagh ila bodbodaaŋ.
Eemoghon tighita aghem muri maau. Igham 14:22
20 Yom umuuŋ pa tamtoghon tiom unumale ŋginiiŋ to sipsip.
Ve ughur Mose yesuru Aron tigham naghom, ve tighereb di tila.