88
Suŋuuŋ to tamtoghon tau ineep ila pataŋani tiina lolo
Mbouŋ to yes Kora
Heman, to paghu to Ezra itoor mbouŋ tonene
1 Yoova, yom Maaron tiou ve Volaaŋa tiou.
Ndag to naol ne, nataŋtaŋ, ve taŋiiz tiou iŋaŋarua ghom naghaze uul ghou.
Ve mboŋ paam, nanim naneep ila naghom, ve nasuŋsuŋ payom.
2 Ulooŋ suŋuuŋ tiou tonene.
Ughur taliŋam pa taŋiiz tiou, ve uul ghou.
3 Pasa, pataŋani naol titatan ghou,
ve naghita naghaze naneep ila naal avo wa.
4 Tamtoghon tighita ghou tighaze paam namaat ve nazila ndug to mateeŋa.
Pasa, tapirig isob kat wa.
5 Tamtoghon tighita ghou nanimale namaat wa. Tauto lolodi imaagh payou, ve eŋgengou naneep.
You nanimale ndiran to tirab di timatmaat, ve tisuruuv patudi tizila naal.
Ve nanimale yes mateeŋa to yom irau uul di muul maau, ve lolom imaagh padi.
6 Yom ughur ghou nazila saambu to mateeŋa to izila le izila kat.
Naneep sila kat ila ndoroom lolo.
7 Mbalmbali tiom itatan ghou kat,
inimale dibom tintina tipolpol izala poghog ve titatab ghou.
8 Yom ugham nditag tipul ghou.
Lolodi pa tighita ghou maau. Pasa, ŋgar to ugham payou ne, igham di tighita ghou nanimale mbeb samia.
Nepooŋ tiou, nene inimale naneep ila ruum to yabyabuuŋ lolo, ve leg ataam pa navot maau.
9 Yoova, ndag to naol ne, you nakaak nimag iza,
ve nataŋtaŋ roran ghom pa uul ghou.
Lolog ipataŋan kat, ve nataŋ tiina le matag isarsar.
10 Laak, yom ugham mbeb gharatooŋa eta pa yes mateeŋa leso uul di?
Ma mateeŋa irau timundig, ve tipait izam? Maau.
11 Ve yes to tineep ila naal lolo, tisasavia ŋgar tiom to lolom ineep tuŋia ila to tamtoghon tiom ve uluul di?
Ma yes to tineep izi ndug to mbeb tisamsami pani, tisavsaav pa ŋgar tiom to utataghon saveeŋ mbuaaŋ tiom? Maau.
12 Ve yes to tineep ila ndoroom lolo, tiwatag mbeb gharatooŋadi to ughamgham di ne?
Ma mateeŋa to tamtoghon lolodi imaagh padi, matadi iŋgalŋgal ŋgar tiom deŋia? Maau kat!
13 Eemoghon you, ghoro nataŋtaŋ payom naghaze uul ghou.
Yoova, mboŋmaagh to naol ne, suŋuuŋ tiou iŋaŋarua ghom.
14 Yoova, vena to upul murim payou, ve uŋgooz matam payou?
15 Sawa to pain ghou ve inim, nambadbaad pataŋani tiina, ve nanepneep ila naal avo.
Yom ughur pataŋani payou, ve upamatughezan ghou inimale koiam you.
Tauto lolog ipataŋan kat, ve naghita naghaze narau mbeb eta muul maau.
16 Pasa, mbalmbali tiom itatan ghou kat.
Yom uwaghamun ghou le namatughez kat.
17 Ndag to naol ne, mboŋmaagh ila le rabrab izi, nepooŋ tiou, nene inimale dibom inim toman tapiri, ve rismoghon tone izugua ghou nalaleg.
Pataŋani naol tiluvut ghou, ve leg ataam pa napaghau taug maau.
18 Yom ugham nditag ve toŋvetaz tiou tipul ghou.
Yes to muuŋ yeiŋa lupuuŋ tiei ee moghon, tigharau ghou muul maau.
Aazne, ndoroom tiina ikau ghou.