144
Kinik to yes Israela ighason Maaron pa iuuli leso ilib pa malmal
Mbouŋ to David
1 You napait Yoova pa poia toni. Ye Volaaŋa tiou ariaŋa to iponpoon ghou inimale yaam tiina.
Ye ipatooŋ ghou pa ataam to ghamuuŋ malmal, ve igham nimag mamaan pa parabuuz. Mbo 18:34
2 Ye lolo ineep tuŋia inim tiou ve iuluul ghou.
Ye inim ruum ariaŋa pa nayooŋ ila lolo, ve iponpoon ghou inimale raŋ to izala kat.
Ye ighamgham mulin ghou ila koiagŋa nimadi, ve inim sigeu payou, leso nayooŋ ila toni.
Ye itatan tamtoghon to ndug ndug, tauto tineep ila sambag.
3 Yei tamtoghon to taan, ninim sa mbeb poia, to matam iŋgalŋgal ghei?
4 Yei tamtoghon nineep ris ve nisob, ninimale yaghuramai to ivotvot ila avomai.
Nepooŋamai tuku inimale ai yavyaava to ighaze ndag izila, nene irau tighita muul maau. Yems 4:14
5 O Yoova, ukaak sambam paroŋania ve uzi unum.
Utut lolooz, ve ugham yab imundig toman mbuasa.
6 Ugham lalaav iŋgal koiagŋa, ve ireu di.
Uvaneg pane tiom ndinatu tiŋarua di, leso tighau tila.
7 Pataŋani to aazne igham ghou, nene inimale yawaaŋa ivot toman tapiri ve ighaze izugua ghou nalaleg.
Tovenen uzuzuun nimam izi, ve uit ghou naza.
Uul ghou, ve ugham mulin ghou ila ndug ndug to tighur koi payou ne nimadi.
8 Ndiran tonowen, avodi kaarom.
Yes tiit nimadi waan iza, ve tipariaaŋ saveeŋ mbuaaŋ todi tighaze: “Onoon sambam.”
Eemoghon titaghon saveeŋ todi maau.
9 O Maaron, you pale nambou mbouŋ paghu payom.
Pale narab gita, ve nambou pa napait ghom.
10 Pasa, yom uluul yes kinik to yei Israela. Tauto tilib pa malmal.
Muuŋ, yom ugham mulin mbesooŋa tiom David pa buza to mateeŋ.
11 Upaghau buza mata payou, ve ugham mulin ghou ila yes ndug ndug to tighur koi payou ne nimadi.
Ndiran tonowen, avodi kaarom.
Yes tiit nimadi waan iza, ve tipariaaŋ saveeŋ mbuaaŋ todi tighaze: “Onoon sambam.”
Eemoghon titaghon saveeŋ todi maau.
12 Maaron, ughur poia tiom iza tiei. Leso ndinatumai papaghu titub pooi tinimale ai to itub pooi iza iza le inim tiina kat.
Ve ugham ndinatumai ndiliva paghunadi kat tinimale gungun to kinik ruum toni to ŋgeretuŋadi popoia.
13 Ugham aniiŋ katindi tivot ila uum tiei, leso ruum tiei to ghuruuŋ aniiŋ tivon pa aniiŋ naol naol.
Ve ugham sipsip ve mekmek tiei timasa tinim ndiŋndiŋ ndiŋndiŋ.
14 Ve makau tiei paam. Moroghooŋ eta igham di malep.
Ugham di titub pooi ve tipoop poia, leso tinim naol.
Taum uŋgin ndug tiei.
Leso tamtoghon tireu sirsiir tiei, ve tiŋguaaz tamtoghon tiei sob.
Ve nilooŋ taŋiiz eta izi maran tiei malep.
15 Tamtoghon to ighaze ŋgar tovene ivot padi, nene pale lolodi poia kat.
Onoon kat, tamtoghon to timbesmbees pa Maaron todi Yoova, yes pale lolodi poia. Pasa, poia toni pale iza todi tovene. Mbo 33:12