11
Uraata ru to Maaron tipariaaŋ saveeŋ toni
1 Muri ghoro, tigham leg ai eez to tovaaŋ mbeb, ve tisaav payou tighaze: “Ula utoov Rumai Tiina toman artaal, ve unin yes to tisuŋsuŋ ila lolo.* Tovaaŋ Rumai Tiina ŋgara, nene vene: Maaron tau pale iŋgin tamtoghon toni, ve mata padi. Ughita Sek 2:1-5. Ezek 40:3+; Sek 2:1-5
2-3 Eemoghon didiiŋ tiina to iluvut rumai dige, yom utoova malep. Pasa, Maaron ipul soso tonowen pa ndug ndug to Yuda maau ne, leso tiŋgini irau kaiyo tamoot ru avua ru (42). Mboŋ 1260 tonenen, yes pale tivazag ndug patabuaŋ Yerusalem. Sawa tonenen, you pale nambaaŋ uraata tiou ru pa tivotia aliŋag pa tamtoghon, leso tighur inim tiou. Yesuru pale tindud di pa nonogiiŋa asosooŋa to moŋiiŋ.” Dan 7:24+; Lu 21:24; Syg 12:6, 13:5
4 Yesuru tinimale ai oliv ru ve lam aia ru to tiyoon izi Ŋgeu Tiina to iŋgin taan isob ne nagho.† Yes to tivotia Maaron aliŋa pa tamtoghon, tighamgham tapiridi ila to Maaron Avuvu, ve tipatooŋ ghazooŋa toni padi tinimale lam. Sek 4:1-4,11-14; Mt 5:14
5 Ighaze koiadi eta itoova pa iwaghamun yesuru, nene pale yab ivot ila yesuru avodi ve ighani. Tovenen tamtoghon to ighaze itoova pa iwaghamun yesuru, nene pale imaat pa ataam tonene. Yer 5:14
6 Maaron tapiri ineep to yesuru. Tovenen sawa to tineep izi taan ve tivotia Maaron aliŋa pa tamtoghon, yes irau tigham pataŋani naol tivot izi taan. Yesuru irau tipoon tata, leso uman izi sob. Ve irau titoor ya inim siŋ paam. Sawa sine to tighaze tigham tovene, yesuru irau tighami. Igham 7:17+; 1King 17:1; Yems 5:17
7 Tovenen yesuru pale tipariaaŋ tamtoghon pa tighur ila to Maaron aliŋa. Ve sawa to tipasob uraat todi tonowen, nene pale mbeb samia ipul saambu to le pughu maau ne, ve iza iparab toman di. Ghoro ilib padi ve irab di timaat. Dan 7:21; Syg 13:1-7
8 Ve tamtoghon pale tipul yesuru patudi tigheen sorok izi ataam dige to ineep ila ndug tiina‡ Ndug tiina tonene, avaat iza to Yerusalem, Rom, Babilon, ma ndug tiina sine to titaghon ŋgar samsamia to taan ve tighur koi pa uraata to Maaron.
lolo. Ndug tonowen to tirab Tiina todi izala ai pambarooŋ ve imaat. Ve tipaleel pa ndug tonowen iza tighaze Sodom ve Isip. Is 1:10+; Mk 10:33+; Lu 13:34
9 Ival tiina pale tila timarar yesuru patudi irau mboŋ tol ve suruvu. Yes to ndug ndug. Ve tinidi toman aliŋadi ve gabuadi, naol naol. Ve yes irau tiyok pa tamtoghon eta pa itavia patudi maau. 10 Pasa muuŋ, propet ru tonowen tighur pataŋani tintina tizaza to tamtoghon to taan. Tovenen sawa to yesuru timaat, tamtoghon to taan pale lolodi poia ve tinidi iza, ve tiwarein mbeb pa taudi. Yo 16:20
11 Eemoghon mboŋ tol ve pida tonenen isob, ghoro Maaron ivib Avuvu mata yaryaara ilooŋ ila yesuru patudi, ve timundig tiyoon. Tovenen yes to tighita di, matughezaaŋ tiina igham di. Ezek 37:5+
12 Mala maau ve tilooŋ bobaaŋ tiina ineep sambam ve izi inim ighaze: “Yamru aza anim sualen!” Ghoro ndiran ru tonowen koiadi timarar di, ve yaghur tae indae di tizala pa ndug sambam. 2King 2:1+; Mbaŋ 1:9; 1Tes 4:17
13 Rikia moghon, yoŋgyoog tiina kat itok ndug tiina tonowen, le ruum katindi tipolpol ve timbiriis. Ndug eŋaeŋa eŋaeŋa to ruum saaŋgul tineep ila, todi eez ipol, ve liim ve paaŋ popoiadi. Yoŋgyoog tonowen irab tamtoghon ndiŋndiŋ liim ve ru 7000 timatmaat. Ve yes to popoiadi, matughezaaŋ tiina kat igham di, ve tipait Maaron to sambam iza.
14 Nene pataŋani tiina to inim ru. Ve ite inim tol pani, ighaze ivot tonene.
Tavuur inim liim ve ru itaŋ
15 Ghoro aŋela ite to inim liim ve ru pani, ana ivib tavuur toni, ve nalooŋ ival tiina to tineep izi sambam, tisaav aliŋadi tiina tighaze: “Aa, ghara ŋgar samia to muuŋ igham pooz pa taan ne tapiri isob, ve mbeb to naol ne titaghon pooz to Maaron toit ve Mesia toni. Ve ye pale igham pooz tovene itaghoni taghoni gha ila!” Igham 15:18; Mbo 10:16; Syg 10:7
16 Ghoro yes ŋginiiŋa tamoot ee ve paaŋ (24) tipul inadi to ghamuuŋ pooz to tiyoon izi Maaron mata, ve titap tizi ve tipait iza tighaze:
17 “O Maaron, Tiina tiei, tapirim ilib pa mbeb to naol ne. Yom uneep muuŋ ve inim.
Yei lolomai poia payom, ve nipait ghom. Pasa, tapirim tiina toman pooz tiom, tauto upatooŋa ivot ighazooŋ wa. Mbo 93:1, 97:1+, 99:1; Syg 1:4,8
18 Ndug ndug to tiwatag ghom maau ne, atedi yabyab payom. Eemoghon aazne, nene sawa to upatooŋ mbalmbali tiom ivot ighazooŋ, ve uŋgabiiz yes mateeŋa ve ughur atia padi.
Tovenen yes propeta to muuŋ timbesmbees payom, toman tamtoghon tiom patabuaŋa to timatughez payom ve titaghon ŋgar tiom, yom pale ugham ledi atia poia. Yes to izadi tintina, ve yes to ledi izadi maau ne paam.
Eemoghon ndiran to tiwaghamun mbeb izi taan, yom pale uwaghamun di paam.” Mbo 2:1+, 46:6, 110:5, Mbo 115:13; Mt 20:8; Ro 2:5+
19 Tisavsaav le isob, ghoro ataam to Rumai Tiina to ineep izi sambam ikaak, ve Bokis to Saveeŋ Mbuaaŋ ineep ighazooŋ. Ghoro ndug milia, lalaav irabrabi, yoŋgyoog itoktok, ve ais patu patu tintina titaptap sambam ve tizizi. Igham 9:24, 19:16; Hib 9:4; Syg 8:5
*11:1: Tovaaŋ Rumai Tiina ŋgara, nene vene: Maaron tau pale iŋgin tamtoghon toni, ve mata padi. Ughita Sek 2:1-5.
†11:4: Yes to tivotia Maaron aliŋa pa tamtoghon, tighamgham tapiridi ila to Maaron Avuvu, ve tipatooŋ ghazooŋa toni padi tinimale lam.
‡11:8: Ndug tiina tonene, avaat iza to Yerusalem, Rom, Babilon, ma ndug tiina sine to titaghon ŋgar samsamia to taan ve tighur koi pa uraata to Maaron.