83
Yes Israela tighason Maaron to itatan koiazŋa
Mbouŋ to Asap
1 O Maaron, mindai ta avom luutu mako ve uneneeŋ mon?
Mindai ta uput nimam ve ulepleep sorok?
2 Ughita. Koiamŋa tighe tipaburigin malmal.
Yes tau tighurghur koi payo na, tipakur tauzi ve tighamgham aghezi payo. * Mbo 2:1
3 Tamtamon tsio tau lolom pazi kat na,
koiamŋa tawe tilup zi, ve tiil eez to tivaghamun zi.
4 Tighe: “Alam tala ve tapasov yes Israela le tisov kat.
Leso ezazi igheen muul sov, ve tamtamon lolozi iveegh pazi.”
5 Onoon kat, koiamŋa tawe tilup lolozi ve ŋgar toozi imin eemon,
ve timbu saveeŋ tighe tigham malmal payo ve tivaghamunia tamtamon tsio.
Yes tamtamon to nugh tane:
6 Yes Edoma tomania Ismael paaghu tooni,
ve yes Moapa tomania yes Agri,
7 ve yes to taan sirivu to Gebal tomania yes Amona ve Amaleka,
ve yes Pilistia ve tamtamon to nugh Tiro.
8 Ve yes Asiria paam tau zeran ariaŋazi to malmal na, tivool to yes Amona ve Moapa tau Lot paaghu tooni na, leso tiuul zi pa malmal. * Gnp 19:37+
9 Tauvene yei nitaŋ rarai ghom nighe ugham ŋgar raraate pa yes tawe imin tau muuŋ ugham pa yes Midiana,
ve murei ugham pa Sisera yesuru Yabin izi yaa Kison na.
10 Saawe tana, yo urav zi timataar izi nugh Endor,
ve patazi tivaghengheen taghon taan paavo gha timbuzaar.
11 Yes daaba to koiamaiŋa, ugham ŋgar raraate pazi imin tau muuŋ ugham pa Oreb yesuru Zeeb na.
Ve yes pooza toozi tauvene paam. Utatan zi imin tau muuŋ utatan Zeba yesuru Zalmuna na.
12 Zeran ru tawe, muuŋ tisaav tighe: “Maaron taan tooni, le kikiliiŋ popoia. Tala taghamu imin leen.”
13 Maaron tsiau, ureu zi le timbiriis imin ŋgaupup ve rabrab tau yaghur ivuvuura gha ilale.
14 Uvaghamun zi imin yav tau ighan suvinia regh,
ve imin yav tau ighan izala loloz, le ipasov su.
15 Ugham uman tiina izi, ve yaghur tiina izaa, leso tiroi ve tighau.
16 O Yoova, utatan zi. Leso mayazi kat, ve tighilaal tighe yo ezam tiina, ve tisuŋ payo.
17 Ugham zi tivaghamgham, ve tileep toman mayazi taghon taghon gha ila.
Upamayaŋin zi, ve upasov zi.
18 Leso tighilaal tighe: Yoova, yo mon ta ezam tiina.
Yo Maaron Tiina Tau Uliiv Zimaronŋa Tisov, ve uŋgin taan isov.