Mbouŋ to Yes Israela.
47.
Yam tamtoghon to ndug ndug, tinimim iza ve apambar nimamim! Yam asob alool, ve ambou tapirimim pa Maaron. 
Pasa Yoova, ye Maaron Tiina To Ilib Pa Ndimaronŋa Tisob. Amatughez pani ve ataghon ŋgar toni. Onoon kat, ye kinik tiina. Tamtoghon tisob to taan tineep ila samba. 
Ye itatan ndug ndug, ve ighur di tineep ila sambamai. Yes to tiwatagi maau ne, ye irab di tizi, ve nivazag di ila aghemai samba. 
Iit siŋ to Yakop, Yoova lolo ineep toit kat. Tauto irab motin taan suruvu eez, ve igham pait. Iit tiniid iza ve tapakur ghiit pa taan to ye igham pait. 
Maaron izala ina to ghamuuŋ pooz ve ineep tonowe. Tovenen tavuur itaŋtaŋ, ve tamtoghon tilolool toman lolodi poia. 
Ambou, ambou! Ambou ve apait Maaron! Ambou ve apait kinik toit iza! 
Pasa Maaron, ye kinik tiina. Tamtoghon tisob to taan tineep ila samba. Tovenen ambou mbouŋ, ve apaiti! 
Maaron ineep ila ina patabuaŋ to ghamuuŋ pooz, ve iŋgin ndug tisob. Tamtoghon tisob tineep ila samba. 
Daba to ndug ndug tilup toman iit to tambesmbees pa Maaron to Abaram, ve itiŋa tapait iza. Pasa, pooza tisob to taan tineep ila nima. Tapait iza izala le izala kat.