Mbouŋ to Yes Israela.
136.
Lolomim poia pa Yoova ve apaiti. Pasa, ye poia le poia kat. 
Lolomim poia pa Maaron ve apaiti. Pasa, ye ilib pa ndimaronŋa tisob. 
Lolomim poia pani ve apaiti. Pasa, ye Maaron Tiina To Ilib Pa Ndimaronŋa Tisob. 
Ye moghon to ighamgham mbeb gharatooŋadi to tintina kat. 
Muuŋ, ye ighur mbeb tisob to tineep ila sambam paroŋania. Uraat toni tonowen, ye ighami toman ŋgar le ivot kat. 
Ye ighur taan izala te pogho. 
Ve ighur mbeb tintina tineep ila sambam paroŋania, leso tigham ndug ighazooŋ. 
Ye ighur ndag, leso ighaaz pa ndag. 
Ve ighur kaiyo ve pitum, leso tisul pa mboŋ. 
Ye to irab yes Isipa ndinatudi aidaba. 
Ve igham yes Israela tipul yes Isipa ve tivot. 
Sawa tonenen, ye ipatooŋ tapiri tiina ivot ighazooŋ. 
Ye ivalag te le pida ila pa ŋas, ve pida ila pa waan, ve taan mamaasa ivot. 
Ve ighereb yes Israela, ve tilaagh ila taan mamaasa to ineep bodbodaaŋ to te, ve tivool tila pa dige ite. 
Ve igham Te Kaviaaŋa itatab kinik to yes Isipa toman ndaaba toni, le tisob tighun te ve timatmaat. 
Ye imuuŋ pa tamtoghon toni, ve yesŋa tilaghlaagh izi ndug balim. 
Ye irab kinik to tapiridi tintina timatmaat. 
Kinik to izadi tintina, ye irab di timatmaat. 
Ye irab Sihon to kinik to yes Amora imaat. 
Ve irab Og to kinik to Basan ne paam. 
Ve igham taan todi inim yes Israela ledi. 
Ye igham taan tonowen pa yes Israela to mbesooŋa toni ne, leso tineep pani itaghoni taghoni gha ila. 
Sawa to koiaad titatan ghiit le tawaghamgham, Maaron lolo imaagh pait maau. 
Ye igham mulin ghiit ila koiaad nimadi. 
Ye ipanpan iit tamtoghon toman mbeb tisob to matadi iyaryaar. 
Tovenen lolomim poia pa Maaron to sambam, ve apaiti pa poia toni!