Mbouŋ To Yes Israela.
136.
Lolomim poia pa Yoova ve apaiti. Pasaa, i poia le poia kat. 
Lolomim poia pa Maaron ve apaiti. Pasaa, i iliiv zimaronŋa tisov. 
Lolomim poia pani ve apaiti. Pasaa, i Maaron tiina tau iliiv zimaronŋa tisov. 
I mon ta ighamgham gabua ŋgeretazi tau tintiina kat. 
Muuŋ, i ighur gabua naol isov tau tighenaar ila sambam saamba. Uraat tooni tawe, ighamu toman ŋgar le ivot kat. 
I ighur taan izala te paavo. 
Ve ighur gabua tintiina tigheen ila sambam saamba to tigham nugh ighazooŋ. 
I ighur aaz, leso ighaaz pa mataaz. 
Ve ighur kaiyo ve pitum, leso tisul pa mboŋ. 
I ta iravuur yes Isipa natuzŋa aidabazŋa. 
Ve igham yes Israela tipul yes Isipa ve tivot. 
Saawe tana, i itotoi tapiri tiina ivot ighazooŋ. 
I ivalagh te, gha sirivu ila pa ŋas, ve sirivu ila pa tapir, le taan gorgori ivot. 
Ve igherev yes Israela, gha tilaagh ila taan mamaasa tau igheen bodbodaaŋ to te na, ve tila tivool ziige ite. 
Ve igham Te Siŋsiŋai itav kinik to yes Isipa tomania zaaba tooni, le tisov tighun te gha timataar. 
I imuŋmuuŋ pa tamtamon tooni gha yesŋa tilaghlaagh izi nugh ŋginaaŋa. 
Ve irav kinik tau tapirizi tiina na timatmaat. 
Kinik tau ezazi tintiina na, i irav zi timatmaat. 
I irav Amora kinik toozi Sihon imaat. 
Ve irav Og tau kinik to Basan na paam. 
Ve igham taan toozi imin yes Israela lezi motot. 
Igham taan tawe pa yes Israela tau besooŋa tooni na, leso tileep pani taghon taghon gha ila. 
Saawe tau koiaanŋa titatan ghiit le tavaghamgham, Maaron loolo iveegh pait mako. 
Igham mulin ghiit ila koiaanŋa nimazi. 
I ta ipanpan iit tamtamon tomania gabua naol isov. 
Tauvene lolomim poia pa Maaron to sambam, ve apaiti pa poia tooni!