18
Babiloŋ kəsa gəɗakani ni àmbəɗkaba
1 Eslini nìpi məslər nahaŋ naŋ àbu asləkabiya a huɗ melefit ba, njəɗa àfəŋ dal-dal, aslaɗay məlaŋ dal-dal daya. 2 Àzlah kay kay, àɗəm :
« Babiloŋ kəsa gəɗakani ni àmbəɗkaba, àmbəɗkaba besek-besek !
Nihi ti ègia məlaŋ manjəhaɗ ge seteni a, məlaŋ ga *məsuf magədavana.
Eɗiɗiŋ ya tàhəpəɗ tay do, tàwayay tay do ni tanjəhaɗ eslini daya.
3 Babiloŋ àmbəɗkaba besek-besek ti aɗaba naŋ akaɗa wal ya àvia vu gayaŋ ana hala dal-dal ni.
Magudar zlam gayaŋ ni èviyikaba ahàr ana mis ga duniya na ɗek akaɗa ga zum na.
Bəbay ga haɗ ni ɗek tàgrakabá hala akaba naŋ a :
ndam məsəkumoru zlam a duniya bu ɗek tə̀ŋgətkabá elimeni
àna zlam gayaŋ dal-dalani ya tigi eri ana mis na. »
4 Eslini nìci dəŋgu ga maslaŋa nahaŋ àhəndabiyu e melefit bu, àɗəm :
« Lekʉlʉm ndam goro ni sləkumkiba ka ndam ga kəsa hina, hərumaya ;
nahkay ti ahar gekʉli àkibu ka magudar zlam gayaŋ ni bi,
daliya ya amagray ni amacay kʉli do daya.
5 Hərumaya, aɗaba magudar zlam gayaŋ ni kay dal-dal,
akaɗa ga zlam maŋgaskabani diliz, àdoru e melefit vu ni.
Nahkay Melefit àsəra tʉwi gayaŋ ya agray ni ti tʉwi ge jiri do.
6 Ere ye ti àgri ana mis ni ti tə̂grivu bilegeni.
Tʉwi gayaŋ ya àgray ni ti tə̂grivu sak cʉ.
Àgria daliya ana mis a, tə̀caka akaɗa ge mis ya tìsia zum a na ;
tə̂grivu daliya sak cʉ ti mîsi akaɗa ge ergi ni.
7 Ahaslani naŋ àbu àna njəɗa dal-dal, azum zlam sulumani dal-dal daya ;
nahkay grumi daliya dal-dal akaɗa njəɗa gayaŋ ya ahaslani dal-dalani ni,
grumi tuway dal-dal akaɗa zlam sulumani gayaŋ ya àzum ahaslani dal-dalani ni.
Aɗaba mam, àɗəm : “Nu bay, nu wal madakway do, enitʉwi ɗay-ɗay do.”
8 Gayaŋ ya ti àɗəm nahkay ni ti
daliya gayaŋ ya amacakay a vaɗ bəlaŋani bu ni nday hi :
kisim, tuway, lʉwir, akaba aku ga məzumaba naŋ a.
Aɗaba Bay ya ti agrafəŋa seriya kà naŋ a ni ti Bay Melefit geli ;
naŋ ti njəɗa-njəɗani. »
9 Bəbay ga duniya ya tàgray hala akaba naŋ akaba tə̀zumkabu zlam sulumani ni etipia azək ga aku ya azumaba naŋ a ni ti etitʉwi, atəndav kuɗa. 10 Eticik driŋ driŋ akaba naŋ aɗaba aŋgwaz aməwərfəŋa tay kà daliya ye eslini na. Atəɗəm :
« Aw ! Aw !
Babiloŋ kəsa gəɗakani, njəɗa-njəɗani ni àmbəɗkaba besek-besek,
aɗaba Melefit àgrafəŋa seriya a huɗ ge njemdi bəlaŋani ba ! »
11 Ndam məsəkumoru zlam ya a duniya bu ni titʉwi, təndav kuɗa azuhva naŋ. Tagray nahkay ti aɗaba maslaŋa ya ti asəkumfəŋa zlam kà tay a ni àbi va bi. Zlam gatay gani ya təsəkumoru ni nday hi : 12 gru, ara ga siŋgu, akur sulumani akaba ebirsli ; azana ndize-ndizeni akaba azana sulumani gərgərani ndahaŋ ; ɓiyem sulumani ya ezi akaɗa ge tersel ni, zlam ya tàgraya tay àna aslər ge mbeli a akaba àna ɓiyem sulumana ni ; zlam ndahaŋ ya tàgraya tay àna ara, ndahaŋ àna evirzegena, ndahaŋ ti ni àna akur sulumana ni ; 13 tersel gərgərani akaba haf gərgərani ya tazəbay ti ezi àcər ni ; zum, amal, humbu akaba *alkama ; slasla, təmbəmbak, pililis akaba seret gatayani. Təsəkumoru mis akaba sifa ge mis daya. 14 Nahkay tə̀hi ahkado :
« Zlam ya tigʉk eri ni ɗek tàsləkafuka, tàdəgoru driŋ,
elimeni gayak akaba zlam sulumani ya kəzum ni tə̀fuk va bi,
atəŋgət tay ɗay-ɗay va do ! »
15 Ndam məsəkumoru zlam ya tə̀ŋgət elimeni àna məsəkumoru zlam a kəsa nani bu ni eticik driŋ driŋ akaba naŋ, aɗaba aŋgwaz aməwərfəŋa tay kà daliya ye eslini na. Etitʉwi, atəndav kuɗa, 16 atəɗəm ahkado :
« Aw ! Babiloŋ kəsa gəɗakani ni asay cicihi timey !
Ahaslani naŋ məbakabu azana ndize-ndizeni akaba azana sulumani ndahaŋ.
Naŋ meŋgʉleɗveni àna zlam ga gru, àna akur sulumani akaba àna ebirsli.
17 Zlam gayaŋ ni ɗek àgədava a huɗ ge njemdi bəlaŋani ba timey ! »
Ndam ya tə̀bu àna *slalah ga yam ni, nday ya tagaray ni, nday ya təhəlvù tay ni akaba ndam ya təŋgət zlam azuhva dəluv ni tìcik driŋ driŋ akaba kəsa ni. 18 Tìpia azək ga aku ya azum kəsa na. Tàra tìpia ti tə̀zlah kay kay, tə̀ɗəm : « Kəsa gəɗakani akaɗa kəsa hini ti àbi ɗay-ɗay bi ! » 19 Tə̀ndav kuɗa, tìtʉwi, tàbakabiyu haɗ ka ahàr, tə̀zlah kay kay, tə̀ɗəm :
« Aw ! Aw ! Kəsa gəɗakani ni asay cicihi !
Ndam ya tə̀bu àna slalah ga yam gatay tə̀ŋgət elimeni ti a kəsa nani bu.
A huɗ ge njemdi bəlaŋani bu zlam ga kəsa nani àndava ɗek. »
20 Lekʉlʉm ya e melefit bu ni mərumvu aɗaba aku àbu azum kəsa ni ! Lekʉlʉm ndam ge Melefit, lekʉlʉm ndam *asak akaba ndam mahəŋgaray *pakama ge Melefit ni mərumvu ! Mərumvu aɗaba Melefit àgrafəŋa seriya, àpəliva zlam magədavani ya àgri ana kʉli na. 21 Eslini məslər nahaŋ njəɗa-njəɗani àzay akur gəɗakani akaɗa avar, àdəviyu a *dəluv gəɗakani vu, àɗəm ahkado :
« Babiloŋ kəsa gəɗakani ni atəgri ti ga njəɗa akaɗa nani,
etipi kəsa gani nani ɗay-ɗay va do. »
22 Àɗəm keti :
« Ndam mivi tindʉ, ndam midi limis,
ndam mivi cicek akaba mezlelim atələbi afa gayak va bi.
Etici daɗay ga araŋa afa gayak va do.
Etipi ndam mələm zlam a kəsa gayak bu va do,
etipi ndam mihi humbu a kəsa gayak bu va do daya.
23 Ceŋgel atəslaɗay məlaŋ a kəsa gayak bu va do,
ataday wál va do, atagray wuməri gani a kəsa gayak bu va do daya.
Zlam nday nani ɗek ti atagravu va do
aɗaba ahaslani ndam ga kəsa gayak ya təsəkumoru zlam ni
tə̀tama ndam məsəkumoru zlam ndahaŋ ga duniya na ɗek,
tàgosakaba mis a ɗek àna matak gatay na daya. »
24 Melefit àtraɓ Babiloŋ ti aɗaba ndam mahəŋgaray pakama gayaŋ ya tàbazl tay ni, ndam gayaŋ *njəlatani ya tàbazl tay ni, akaba ndam ndahaŋ ya tàbazl tay a duniya bu ni ɗek ti ndam ga kəsa gani tàbazl tay, mimiz gatay ni àdəgaya a kəsa gani nani ba.