1-2 O sigwey, taninuways tammwayas wanawoud pwa̱mug-o, Yowbad isen wakunuwtes lov imgwayes, o igaw Yol Bwabwel isilbwed siked, isiws wanuwan, ineis, isaps palatan. Mamagin ibapta̱yses Moses waseg, lov waskawan o yol wanuwan, peinan itams Moses nakaleiwag waseg.

3-4 O siyas babaw nikamkoums liba̱lab kan-nen, nimwamoums liba̱lab sipinen; mtowen sisiy ineis yagan Kelis, mamagina dakul ibwabwab yevagam, peinan yam babaw kululuwes imwamoums liba̱lab sipinen, towen Kelis iwmwamwes kululuwes tasiyas.

5 Tage Yowbad nag ikalin nuwan tasiyas babaw, mapun ikanka̱nigs; wous tasiyas ikatigayays wanawoud, ven makaw, waseg.

6-7 Youd tasiyas ilivatus adsinaps silma̱nin, va̱gan bikatimlakeids, mo bitakawes adsinaps bwein; awoum sivinads sinap kalbaleb ma̱wan tasiyas; awoum bitayousis yowbad tobwag ma̱wan tasiyas niyousis. Peinan kweiboug niva̱ges ma̱wan, liva̱nen nises Bukitab waseg, mamagina, “Isinis kid beikams kan, o beimoums; wankuyeim mo itamanaws kalimwa̱saw silma̱nin, iwliwals sisiyas. E, iwliwals tobwag yowbad silma̱nin.”

8 Awoum takanavaysa mav, ma̱wan tasiyas kweiboug, yam katanok waseg mo ikabalamats singay babaw tawsans, sinawey kweitoun tawsan gamag imta̱mats ikous.

9 Awoum tayakwanes daGuyaws, ma̱wan tasiyas ivtokes livan, kan silma̱nin; wankuyeim mo isekes mwatet ibsibas tasiyas, ikanka̱nigs wanawoud.

10 Awoum tavtokays livan, ma̱wan tasiyas ivtokays livan, mo ikayeb tawayin gamag, iwaweiys gamag tasiyas, imats.

11 Ilouvats youd tasiyas kalbaleb, va̱gan kid ya̱kids-vak mo bitakakins sinap bwein; peinan kweiboug sinap babaw mo ilivatuds, nagein, nakabiyokous tut waseg.

12 Kukin kal idok ansinap tawtoun, kadiloka bivnas, mata ge bikalouw, sinap kalbaleb waseg.

13 Aveiyag talivatus biyakwaneids, kweiboug niyakwanes gamag babaw wasigeis. Yowbad gog mounid bo bilabeids, nag beitam sinap kweitan biyakwaneids va̱gan bibinak wouds, nag. Dakabiyokons towen, magina dakul silupouy; talivatus wabwanit; Yowbad gog bikatimlakeids aniked mo bitalavays; mamagin bitatawtouns waseg dakabiyokons, kweitan kweitan.

14-16 E sigwey, kuninuways. Kadiloka kupiyaves yowbad tobwag. Peinan tassinap yakamiy, kukwakins agulivan mounid. Kelis nakwa̱vig towen nisiwyoubuds waseg; o kalin nuwads silma̱nin; e, tamwamoums mamagina buya̱vin tonen. Sods Kelis, mo tamlavags katanoka bod ya̱kids. Ma̱wan kan towen takivis takams, mamagina won Kelis tonen, tamlavags katanoka bod ya̱kids, peinan tala̱tans sods Kelis.

17 Peinan kan katanok-wan mamagina bled katanok, o ya̱kids babaw gamag takams kan towen katanok-wan, mo tamlavags katanoka bod ya̱kids, peinan kads katanok-wan.

18 Kuninuways min-Yisleil asisinap. Tasiyas tanuwgwes-lun iwaweiys lun bulukwan, mwasanin igabus wakabeilun, mwasanin isemos kaeis beikams; mamagina bo ila̱tans waseg Yowbad nakabeilun.

19-20 Taninuways kan imgwavis tobwag yowbad silma̱nin, iyyaweids-wan; o yowbad tasiyas iyyaweids-wan. Tasiyas igaw dadub nag beiluns waseg Yowbad, tage iluns waseg baloum. Awoum bukula̱tans simiyas baloum.

21-22 DaGuyaws nakabninuway kwa̱vig-nen nises; baloum nakwa̱vig nises. Nag kadilok kwaviy bukumoum. Nag kadilok bukukwams daGuyaws napwa̱siw waseg, mo bukukwams baloum napwa̱siw waseg; awoum. Bitava̱ges ma̱wan mo bikamliweids Yowbad. Awoum bitasilkodes daGuyaws, mata bigeg nanon. Ta-ma̱wan bitatawtouns waseg.

23-24 Kadilokeids sinap babaw bitakow, tage sinap mwasanin nag bilabeid, va̱gan bitatawtoun, nag. Kadilokeid kan babaw bitakams, tage kan babaw nag bilabes sidayas. Kadiloka beivag sivinad sidayas sikamnabwein, dakamnabwein tatoneid awoum.

25 Kadilok bukukwams kana babaw. Viniyoun aveiyag kugimwel bweina kukwam. Igaw bukugimwal, awoum kukwatugan, kulana, “Viniyon towen imgwavis? o nag?” Kukin teitan bilivan, “Viniyon towen bo imgwev kid,” adok bo bigeg nanoum.

26 Bweina tatagouwaw yak kukwama mav; peinan, “Tanuwagan ven watinow daGuyaws; mtowen tanuwagan youda babaw nisesus waseg.”

27 Magat soum nag isimounid Yeisuw waseg, o bilana, “Kum kukwam,” o sivinam bukukwam, bweina kukwam. Awoum kwatugwan, kulana, “Kan towen kumgwev tan, ne?” Awoum! Deisa kukwam-wan.

28 Tage kukin gamag teitan bilivan, “Viniyon towen bo imgwavis siyowbad silma̱nin”; awoum kukwam kan towen. Bukukwam mo bigeg soum nanon.

29-30 Nanon soum bikaleiwag, nanoum ya̱koum nag. Awoum ge soum bigeg nanon. Adok kulana, “Ampalawen sivinag bweina ba̱noy. Aveiyag sivinag bweina ba̱kam. Aveiyag wawun nanon soug bikaleiwag? O magat bikalin nuwag kan towen ba̱kam, aveiyag wawun bivtokeigs livan, gamag mwasanin?” Awoum bukulivan ma̱wan.

31 Awoum! Kadiloka bukuva̱ges youda babaw yakawanan Yowbad silma̱nin. Kan aveiyag bukukwams, o aveiyag bukumoums, kadiloka kuva̱ges va̱gan gamag biya̱kawns Yowbad waseg.

32 Awoum bitava̱ges kid aveiyag mo bigeg ninous sidayas; takinew sidayas min-Yudiy, o takinew tobwag ven gimgilis, o takinew natayakelesiys Yowbad. Awoum bitava̱ges kid aveiyag mo bigeg ninous sidayas.

33 Nanoug yey, bo bavag va̱gan beibwein ninous babaw gamag. Nag ivag sivinag gunavavag babaw; nag. Sivinag kid aveiyag mo bilabes sidayas, va̱gan Yowbad bikatinabwes tasiyas, mo bimwa̱saws kid.