1 Kadiloka bukusiwa̱youbs singay. Kadilok beivag sivinamiy kululuwamiy wuliyougwan bwanabwein, o singay sivinamiy bukupalopisays Yowbad anilivan.

2 Kukin gamag kweitan kaeig waseg bilivan, anilivan nag idibek gamag wasigeis; Yowbad gog iligen livan towen, peinan ikakin silawun. Gamag babaw nag biliganes. Kululuwan waseg ilivan. Gamag babaw nag bikakins silawun anilivan bo ikawumen-wan.

3 Kukin bukugeiguy Yowbad anilivan, gamag mwasanin biliganes, bukwatimweisis tasiyas, va̱gan kid biwotets bwein, mo beitaw nuwes.

4 Kukin gog kal kweitan kaeig waseg bilivan bo tonena ansinap bikatimweis; tage kukin kal bigeiguy Yowbad anilivan mo bikatimweisis tayakelesiys babaw.

5 Sivinag babaw yakamiy kaeig kweitan kweitan wasigeis bukullivans, o singay sivinag bukupalopisays, peinan wotet towen singaya bwein. O magat teitan bilivan kweitan kaeig waseg bo bisunasun ninous gamag; o magat teitan bikativin anilivan towen mo bidumwal ninous, mo bikatimweisis tasiyas tayekelesiys.

6 O sigweyas, nagein gog, magat bawekeimiy mo kweitan kaeig waseg balivan, balabeimiy-tan? Adok nag. Misinak bakamat sinapun Yowbad, o balivnek Yowbad nanon, o bakatimlakeimiy sinap bwein, mo balabeimiy yakamiy.

7 O kukin gamag teitan makava bivkek a̱len, pikolel o git, mamagina biwawaya mav, nag beivag wous, gamag nag bikanuwels o nag bisilasals; nag.

8 O magat teitan biyik bwa̱gig, o nag biyik bwein, gamag nag bidumwal ninous, nag bikatunags naviy silma̱nin; nag.

9 Ma̱wan-vak ya̱koum, bukulivan kweitan kaeig waseg, gamag nag bidumwal ninous, nag bikakins aveiyag kulivan; mamagina kullivana mav.

10 Wadaban pwepway kaeig singaya babaw, kweitan ven ages kweitan, kweitan ven ages kweitan. Silawun gamag tasiyas misikesa-yay ikakins.

11 Magat teitan gamag aygan kweitan, o yey nag bakakin aygan towen, igaw bakalivan amateiyun-wan, anilivan towen limwelem waseg yey, mapuna aygag yey limwelem waseg gamag towen.

12 E, sivinamiy wuliyougwan kululuwamiy bwanabwein. Singaya kadilok beivag sivinamiy kululuwamiy wuliyougwan va̱gan bikatimweisis tayakelesiys babaw.

13 O towen kweitan kaeig waseg bilivan, kadiloka binitoug Yowbad waseg, va̱gan bikamtel anilivan silawun, mo bika̱mat babaw gamag wasigeis.

14 Magat kweitan kaeig waseg banitoug Yowbad waseg, misinaka kululuwag binitoug, tage nanoug nag.

15 Aveiyag bavag? Adok banitoug nanoug waseg, sona kululuwag. E, wous bakanuwel nanoug waseg, sona kululuwag.

16 Magat tobwag gamag nises wasigeis takayelesiys yakamiy, igaw bukuyakawen Yowbad, kululuwam ya̱koum waseg bukulivan kweitan kaeig waseg, mogo nag bikakin silawun amlivan, tobwag gamag towen, nag beitam bilana, “Mounid”; nag. Peinan nag bikakin.

17 Ya̱koum kuya̱kawn bwein, mogo towen nanon ta-bukwatimweis.

18-19 O, kalin nuwag Yowbad, peinan singaya allivan kweitan kaeig waseg, o yakamiy kukuyeims; tage sigwey tayakelesiys yakamiy sivinag agulivan misinaka kweinim, kamnat, nanoug waseg; bukuliganes, mo bakatimlakeimiy sinap bwein. Awoum kweitan kaeig waseg, agulivan singay babaw tawsan, peinan nag sinap kweitan bakatimlakeimiy, nag.

20 O sigwey yakamiy, awoum beivag ninoumiy ma̱wana gamagal. Kadiloka kusinaps bwein va̱gan gog bimatuw amisinap. Tage kadiloka bukutagouwaws sinap kalbaleb waseg.

21 Bukitab kaleiwag-nen nises mamagina:

22 Magat kweitan kaeig bukutay, mamagina naman mulin Yowbad, silma̱nin tasiyas nag isimounids Yeisuw waseg; nag silma̱nin tasiyas tasimounids. Tage bukulivnek Yowbad nanon bukulabes tasiyas tasimounids Yeisuw waseg, tobwag gamag nag.

23-25 Igaw bukwatuyouns tayakelesiys yakamiy, kaeig kweitan kweitan wasigeis bukullivans, o teitan beiw, tobwag gamag o kavel nag isimounid Yowbad waseg, adok bilivan, bilana, “Kwabala̱weins yakamiy”; tage beiw biligen kulivnakes Yowbad nanon babaw yakamiy, bo bigeg nanon peinan ansinap kalbaleb aveiyag nisowum wananon mo bikamat wananon gamag towen, mo bikalivatow bikantukov binitoug Yowbad waseg va̱gan bileb, peinan ansinap kalbaleb; e, bilivan, bilana, “Mounid Yowbad nises wasigeis yakamiy.”

26 Livan towen nalivan kuliganes. Igaw kwatuyouns yakamiy, tapwa̱loul silma̱nin, teitan anawous bikanuwel, teitan bikatimlakay sinap, sinap ka̱wum nikamat teitan waseg mo bisek, o teitan bilivan kaeig kweitan waseg, o teitan bikativin livan towen. Youd babaw kuva̱ges va̱gan bikatimweis amisinap yakamiy tayakelesiys babaw yakamiy.

27-28 Tasiyas tallivan kaeig kweitan kweitan wasigeis, deisa asteiy o asteitoun. Awoum bibabaw. Teitan bimug, teitan bikuyeim. Kadilok teitan bikativin asilivan. Kukin takativinin livan nag, awoum kweitan kaeig waseg billivans, tapwa̱loul waseg; misinaka wananon billivan, asteiy son Yowbad biliganes.

29 Tasiyas talivnakeins Yowbad anilivan, asteiy o asteitoun bilivans, tage tababaws yakamiy kwatukins asilivan, aw-sinap bwein, aw-sinap makaw.

30-31 Igaw teitan bisin tapwa̱loul waseg, biligen-wan, Yowbad mo bikatimlakay ansinap kweivaw; kadiloka bitamanaw bika̱mat ansinap towen; tageiguy tonen bika̱pay. Kadiloka babaw yakamiy bukulivnakes Yowbad nanon, siva̱tan teitan bilivnek, ikous, siva̱tan mo teitan bilivnek, va̱gan bukulabes gamag babaw, mo bikakins sinap babaw, va̱gan bitawtouns.

32-33 Talivnakeins Yowbad anilivan ikaleiwags wasigeis kululuwes tatineis, peinan Yowbad nag bikaleiwag makaw; tage bwein-wan.

34 Kadiloka vinay ven babaw mitapwa̱loul waseg bika̱pays; awoum bilivans, awoum bikatimlakes tawaw. Biliganes-wan. Moses nakaleiwag ma̱wan; o tayakelesiys babaw dakaleiwags ma̱wan.

35 Magat vin na̱tan sivinan kweitan sinap bikakin, kadiloka bikatugwan waseg namwan wasibunatum tatineis. Magat vinay bilivans tapwa̱loul waseg, bo beivag admwasins.

36 Awoum kwaypamwes sinap yakamiy, mamagina Yowbad anilivan nakabsilamaw o nakabiyokous wasigeis yakamiy, awoum. Awoum kudokes ven mwasanin gimgilis tatagouwaws tasiyas.

37-38 Kal yak kudok palopit ya̱koum? O kal yak kudok Yowbad Kululuwan wuliyougwan nises waseg ya̱koum? Kadiloka kukwakins kaleiwag towen nalel, milet towen waseg, daGuyaws nakaleiwag tatonen. Kukin kal yak nag bukusimounid, bo bukusesuna tatagouwaw ya̱koum.

39 O sigweyas, livan towen kuninuways, kuneves amisinap va̱gan gog bukugeiguys. O tasiyas tallivans kaeig kweitan kweitan wasigeis, awoum kusilbwades.

40 Youda babaw didumwal-wan kuva̱ges tapwa̱loul waseg, kadilokena beibwein amisinap yakamiy.