19
Sakiyus
1 Isap Yelikow, ikatidumwal wavtakon ven, in.
2 Ven towen waseg taw yagan Sakiyus, takaweins ta̱kis sitovek, nawliyoug singay babaw.
3 Mtowen Sakiyus sivinan bikin kal mtowen Yeisuw. Ta-ma̱wan. Gamag singay babaw, o towen Sakiyus takayakus.
4 Mapuna isawl in wanakoug, imwen kay kaytan yagan sikamol va̱gan bikin Yeisuw, peinan beinoy beim ked towen waseg.
5 Yeisuw im, itoun, itamnow matan, iban Sakiyus, idibek, ilana, “Sakiyus, nuwanaw kubus kum, sivinag bamasis wambunatum nagein.”
6 Nuwanaw mo ibus, itam peinan bo anbwabwal towen; imwa̱saw silma̱nin.
7 Tasiyas gog nikines, ivtokays livan, ilansa, “Yeisuw bo inek mtowen takalbaleb wanbunatum.”
8 Tage Sakiyus idibek Yeisuw, ilana, “Guyaw, bo baliv gunwuliyoug, mwasanin basekes tasiyas tasimavs, mwasanin yey. O magat kweiboug basilponay gamags siwliyoug bakwey, bo bayamen mo bakatimweis siva̱toun, mamagina bo bimlavag siva̱vas basekes.”
9-10 Iw to Yeisuw, ilana, “Nagein Yowbad bo ikatinob bunatum towen, peinan taw towen Ebelam delen. Peinan Gimlilitoun yey gunawotet va̱gan banineiv takalbalebs, tasiyas mamagina sip bo nilasisulis ked, mo bakatinabwes.”
Mwasanin iwotets waseg sitovek namoney
(Matiw 25:14-30)
11 Iliganes anilivan towen, mo ankabebay isekes. Silawun kabebay peinan kakita bisap Yelusalem; o tasiyas gog idokes nuwanaw mo bikines Yowbad nakaleiwag. Tage ikakina nag nuwanaw Yowbad bisilamaw nakaleiwag.
12 Mapuna ikabebay, ilana, “Tamwey teitan in kadiveiyov ven va̱gan bimlavag takaleiwag avakaein, mo beiyum beim.
13 “Kakita binoun, idawes natouwats sinawatan, isekes simoney, sinawatan sinawatan, ilana, ‘Mimoney towen mamagina biwotet. Kuymiyises miwliyoug kweitan magin, kweitan magin, mamagina stow waseg gamag bigimwals, va̱gan mimoney mo kwatimweisis bibabaw. Kuvva̱ges ma̱wan ee... mo ba̱yum bam.’
14 “Tage nagamag bo ikamliwes, ikayabes gamag mwasanin wankuyeim, asilivan mamagina, ‘Kapiyev taw towen. Awoum bikaleiwag wasigeis yakamey.’
15 “Ilivans, bo nag. Taw towen imlavag takaleiwag avakaein. Iyum, in wanven, mo idawes natouwat bimeis, va̱gan bikin isimoney akweivin ikatimweisis.
16 “Teitan inek, ilana, ‘Guyaw, money nukusekeig sinawatan bo akatimweis imlavag lakatutan sinawatan.’
17 “Iwa̱ge natovek, ilana, ‘Bwanabwein! Bo kutoukum yak. Peinan nukutoukum waseg wotet kakit bo basekeim mukwaleiwag waseg sinawatan ven.’
18 “Tayuwein inek, ilana, ‘Guyaw, money nukusekeig sinawatan bo akatimweis imlavag sinawanim sinawatan.’
19 “Iwa̱ge natovek, ilana, ‘Ya̱koum-vak basekeim mukwaleiwag waseg kweinim ven.’
20-21 “Tatounun inek ilana, ‘Guyaw, mumoney towena. Bo asumweil asen, peinan bo aweneim, tayakeikay yak, peinan kuninineiv simwey sivavag bukukwey.’
22-23 “Iwa̱ge ilana, ‘Guntouwat kalbaleb yak. Amlivan toneim waseg bakatimlakeim amsinap kalbaleb. Kukwakin tayakeikay yey; aninineiv sigwey sivavag, akwekway. Aveiyag wawun nag kusen gunamoney wanuwan benk va̱gan ba̱yum bam mo bakow son intalest-nen bikatimweis bibabaw.’
24 “Mo idibakes tasiyas nitowas wadadan, ilana, ‘Kukow inamoney, kusek mtowen namoney lakatutan.’
25 “Ikatimapus siguyaw aygan, ilansa, ‘Towen namoney babaw, lakatutan.’
26 “Mounid gog adibakeimiy, kukin kalisiy sivavag, bikatimweisis bibabaw; tage kukin kal navavag nag, bo bikwayes aveiyag idok nises, mo bimlavag tasimav tatonen.
27 “Tasiyas gog nikamliweigs o nipiyaves gunakaleiwag, kumeyes kuweiys wamatag.”
Yeisuw isap Yelusalem waseg
(Matiw 21:1-11; Mak 11:1-11; Yon 12:12-19)
28 Ilivan ikous, imug, ikatulag, in silma̱nin Yelusalem.
29-30 Inoun ee... koy yagan Oliv, kakita mo bisap ven Betipeig son Betaniy, mo ikayabes navamul asteiy, bineis waven, ilana, “Kuneis waven palatan nises, kusaps ven towen mo bukuba̱nes donkiy mwana̱tan, kayon niyawanis vatul; igaw naptabod, nag ikakin gamag bisinis watapwan. E, bukuba̱nes donkiy mana̱wen, kulikus, kumeyes.
31 “Kukin kal bikatiga̱neimiy, bilana, ‘Aveiyag wawun kulikus?’ mo kwatimapus aygan, kulansa, ‘Peinan tanuwagan sivinan.’ ”
32 Tasiyas nikayabes nineis, iba̱nes donkiy ma̱wan nilivnek.
33 Bilikus donkiy mana̱wen, natuwa̱vek ikatiga̱nes, ilansa, “Aveiyag wawun kulikus alem mana̱wen?”
34 Iweis tasiyas, ilansa, “Tanuwagan sivinan.”
35 Ilikus, inawes Yeisuw waseg, iyaves asikweim watapwan; Yeisuw isin.
36 Mwasanin iyeves asikweim wa̱ked, Yeisuw mo inoun.
37-38 Kakita biwloubus koy towen Oliv, inavamul asibabaw bo imwa̱saws, ikavasis Yowbad, peinan bo ikines nawotet tawtoun. Ages avakaein ilansa,
“Kalin nuwem Guyaw ya̱koum; nukum,
Yowbad yagan waseg.
Niwal son kamnat
avakaein, wanakaew, walba̱lab.”
39 Palisiy mwasanin wanuwan babaw gamag mo idibakes Yeisuw, ilansa, “Takatimlakay yak. Kusilbwed asilivan muvamul.”
40 Iw to Yeisuw, ilana, “Magat tasiyas bika̱pays, mo dakul siyas biwkuwaks.”
Ven Yelusalem igaw mo bigulekwes
41-42 Kakita bisap Yelusalem, ikin wunovek, iva̱lam peinan, ilana, “Magat nagein bukukwakins miked silma̱nin niwal. Tage bo isowm; mata ge bukukines.
43-44 “Peinan igaw kweitan tut abamiy bigeg singay. Tasiyas ikamliweimiy bituyes pwepway bimlavag koy watoulan miven, o bidiliwunis watibwelon miven, va̱gan bikalituwanis boul biweis, biwaweimiy, bilaveimiy bukuneis wapwepway, simiyas nitimiyas; mibunatum bigulekwes beikous. Nag kweitan dakul bisesun wakaban. E, binuwakeimiy ma̱wan, peinan Yowbad bo ilakwaneimiy; nag gog, nag kuwtusis, nag kukwakins.”
Ikayabes tasiyas wanuwan Yowbad nabunatum
(Matiw 21:12-17; Mak 11:15-19; Yon 2:13-22)
45-46 Mo isiw in wanuwan Yowbad nabunatum ikikayabes tasiyas taggimwals, idibakes, ilana,
“Yowbad anilivan mamagina: Gunbunatum
silma̱nin nitoug, tage nukuva̱ges kid buntuman veinaw.”
47-48 Yam katanok katanok ikatimlakay Yowbad wanbunatum. Tanuwgwes lun sisiyas takatimlakeins kaleiwag, sisiyas tammwayas Yudiy sivines kid beiweiys Yeisuw. Ta-ma̱wan binuwakes beiweiys, peinan gamag babaw sivines anilivan.