1 Yam mwasanin ikous mo bisagals, Kaltuwon Sigeilin. Sagal towen nag ikams bled son yist tage makava bled ikams.

2 Tasiyas tanuwgwes lun sisiyas takatimlakeins kaleiwag iyokons ama̱wan beiweiys Yeisuw bikatimates. Ta-ma̱wan, peinan iwenes gamag babaw.

3 Seitan nanon mo isiw wanuwan Yudas, yagan Iskaliyot, Yeisuw navamul teitan. Navamul babiweis sinawatan asteiy.

4 Seitan nanon isiw Yudas wananon; Yudas isap, inoun, inekes tasiyas tanuwgwes lun sisiyas tulals, sisiy illivans, ama̱wan bisilkod Yeisuw va̱gan tasiyas mo biyousis.

5 Tasiyas iliganes anilivan, imwa̱saws, ilivans money kid bisekes Yudas, maysan nawotet towen.

6 Mtowen Yudas itam, iyokon ama̱wan bisilkod Yeisuw. Sivinan gamag babaw bigayays, mo Yeisuw biba̱nes anmwa̱net, biyousis.

7 Yudas ikayamat ee... anayam waseg ikams makava bled, o beiweiys aleis la̱miy Yowbad wanbunatum, silma̱nin Kaltuwon Sigeilin.

8 Yam towen Yeisuw mo ikayabes Pita son Yon bineis waven, ilana, “Kuneis kuva̱ges Kaltuwon Sigeilin; bitakams ya̱kids.”

9 Iweis tasiyas, ilansa, “Avanuy bakavag kan?”

10-11 Ilana, “Bukunounas, bukusaps waven, taw teitan ikokew kunasoup bilivatumiy, mo bein, beisiw wabunatum. Kwabkunis, kudibakes tanuwagan bunatum, kulansa, ‘Datakatimlakays ilana: Avanuy bwabwal yakamey mabunatum waseg bakakamkwam Kaltuwon Sigeilin, sigwey gunavamul?’

12 “Kulivans ma̱wan mo bikamtilakeimiy bunavakaein wanakaew wanbunatum nises, son kabanen. Towen waseg kuva̱ges kads.”

13 Iliganes, ineis, iba̱nes ma̱wana nilivnek; mo iva̱ges kan silma̱nin sagal towen beikams.

14 Anatut beikams, Yeisuw isinis siney tasiyas takaweins anilivan.

15 Idibakes, ilana, “Singay sivinag sigwey yakamiy bitakams sagal towen, peinan bo balivet mamayuy.

16 “Nag vayuwein ba̱kam sagal towen oko anatut sagal towen wuta̱lan beikous Yowbad nakabkaleiwag waseg.”

17-18 Ilivan ikous, mo ikow kwa̱vig, ikalin nuwan waseg Yowbad ikous, ilana, “Kukwawes kwa̱vig towen kumoums tatanok tatanok yakamiy, peinan igaw nag ba̱moum gleip sipinen ee... Yowbad nakaleiwag mo bisilamaw.”

19-21 Wankuyeim mo ikow bled; ikalin nuwan ikous, ikivis, ivvagein, isekes, ilana, “Woug towen, tage mtowen tasilkodeig sidayas nitakamkwams.

22 “Peinan Gimgilitoun yey gunaked Yowbad bo ikaluweg. Ked towen ba̱noy ban, tage mtowen tasilkodeig mo bilivet kalbaleb.”

23 Navamul tasiyas mo illivans sisiyas wasigeis, idokes kavel bisilkod Yeisuw.

24 Ikous, tasiyas-wan kamniman kweitan iva̱ges, peinan idokes kal bimlavag astamumug.

25 Yeisuw mo idibakes, ilana, “Ven tasiyas igaw dadub siking ikalawages tasiyas, o ilansa, ‘Amatakaleiwag ilabemas.’

26 “Tage yakamiy awoum ma̱wana tasiyas. Kadilok amitamumug bimlavag ma̱wana gwad, o mitovek ma̱wana mitouwat.

27 “Kal imug? Towen isin wa̱keb ikamkwam? O adok towen natouwat isek kan ikam? Nag, towen isin wa̱keb tamumug. Tage yey wasigeis yakamiy, ma̱wana mitouwat yey.

28-30 “Sigwey yakamiy nukulabeigs gunamouvit waseg. Mapuna bakaluweg abamiy beibwein tut wanakougwaw silma̱nin. Tamag bo ikaluweg a̱bag o gunakabkaleiwag bwanabwein, ma̱wan-vak akaluweg abamiy bwein, sigwey yakamiy mo bitakams bitamoums gunakabkaleiwag waseg, o bukusinis wamikabkaleiwag mamagina guyawun Yisleil yakamiy, bukwaleiwags wasigeis asikum sinawatan kweiy.

31 “Ya̱koum Saymon kuligen agulivan. Seitan bo sivinan bikaweimiy va̱gan biyakwaneimiy ma̱wan tata̱yins wit iwaweiys mo anagin iba̱nes.

32 “Tage bo anitoug waseg Yowbad va̱gan bukusimounid beibwein; awoum kukwalouw. Ikous, mo bikanavin nanoun ikous, kadiloka kulabes budam bitawtouns.”

33 Iw to Pita, ilana, “Tamwey, kukin bilaveims bukun wa̱deil o bikatimateims, soug yak bitases.”

34 Yeisuw ilana, “Adibakeim Pita, nagein bukwaya̱neig siva̱toun mo beigel kolkolek.”

35 Yeisuw idibakes navamul, ilana, “Kweiboug akayabeimiy, kuta̱vins ven babaw, amikaw nag, kunamiy nag, amisandol nag, tabta aveiyag ika̱bwag wasigeis yakamiy?”

Ilansa, “Nag.”

36 Idibakes, ilana, “Tut gog towen kal sam anakaw, bweina bikow, kwanan ma̱wan. O kukin kal nag ivag napulut, bweina biyamiyis anpwa̱lum, maysan bikow mo bigimwel napulut.

37 “Adibakeimiy, bo bikamat liva̱neig nilivnek Bukitab waseg mamagina, ‘Mtowen siney takalbalebs idokes ma̱wana tasiyas.’ Peinan liva̱neig nilivnek, bo bikamat ma̱wan.”

38 Iweis tasiyas, ilansa, “Tamwey, kukin pulut siyas akweiy.”

Yeisuw ilana, “Bo deis!”

39 Ilisow ven, inoun in koy yagan Oliv ma̱wan angulagul yam babaw. Navamul ikabwa̱kuns waseg.

40 Isaps ven towen nimsikes-yay, idibakes, ilana, “Kunitougs waseg Yowbad. Mata ge Seitan biyakwaneimiy.”

41-42 Ilisow navamuls, inay-o tana̱ban-o, mo ibasin kitatun, initoug, ilana, “Tamag, magat sivinam, bukukow agkwa̱vig kwaviwen; awoum ba̱moum, singay yayan. Tage awoum nanoug yey. Nanoum yak kuvag ma̱wan.”

43 Initoug ikous, mo Yeisuw ikin wamatan gum-liba̱lab bo ileb, ikimtuw.

44 Singay Yeisuw nanon igeg, ikulul, initoug avakaein, anpulikas avakaein mamagina buya̱vin iwta̱wout wawepway.

45 Initoug ikous, itamanaw, inekes navamul bo imasis, peinan ninous igeg.

46 Iba̱nes, idibakes, ilana, “Aveiyag wawun kummasis? Kukits, kunitougs; mata ge Seitan biyakwaneimiy.”

47 Igaw ilivan, gamag babaw isaps. Taw towen yagan Yudas, Yeisuw navamul teitan, bo imgwayes tasiyas babaw. Isineikik inek Yeisuw, bimulouls son.

48 Yeisuw ilana, “Yudas, bukumuloul waseg Gimgilitoun yey va̱gan bukusilkodeig? Oo-ne!”

49 Tasiyas nitomos walasin Yeisuw ikakins gamag babaw biyousis Yeisuw, ilansa, “Tabta bakawaweiys tasiyas mapulut waseg?”

50 Ilivans ikous, mo teitan itamnow napulut tanmunum iweiy teitan tanuwgwes lun sitovek natouwat, ibob teigan.

51 Iwa̱ge Yeisuw, ilana, “Deisa!” mo ikabkwen teigan, ivag ibwein.

52-53 Yeisuw mo idibakes tasiyas tanuwgwes lun sisiyas tulals tasiyas nimtakavates Yowbad nabunatum, sisiyas tammwayas, peinan bo nimeis biyousis Yeisuw; ilana, “Bo nukumeis, mipulut minew kukokews, bukuyousigs ma̱wana tavveinaw yey? Yam katanok katanok sigwey yakamiy nitasesus Yowbad wanbunatum, nag kuyousigs. Nagein gog bukuyousigs, peinan imitut dadub kaleiwag waseg.”

54 Ituts, iwekes, iyousis Yeisuw, inawes tanuwgwes lun sitovek wanbunatum. Pita ikikun kadiveiyov.

55 Tawaw tasiyas ivla̱kes sikov tanuwgwes lun sitovek wanven, isinis wadadan kov. Pita siney tasiyas isinis.

56 Pita isin, kov imteil magin, na̱tan nakubukwab ikin bo ikabunik, iwtus, ilana, “Bo akin taw towen son Yeisuw.”

57 Pita ikayan, ilana, “Nag! Nag akakin taw towen.”

58 Isesus ee... teitan gamag ikin Pita, ilana, “Ya̱koum Yeisuw nagamag yak, ne?”

Iwa̱ge Pita, ilana, “Yey nag.”

59 Isesus ee... imwemway nen, tatounun anilivan tawtoun, ilana, “Mounid taw towen son Yeisuw nisesus, peinan gum-Galiliy.”

60 Iwa̱ge Pita, ilana, “Nag! Nag akakin aveiyag kulivan.” Igawa illivan, bo igel kolkolek.

61 Yeisuw mo itouvin ikin Pita wamatan. Pita inuw Yeisuw anilivan mamagina: “Nagein bukwaya̱neig siva̱toun mo beigel kolkolek.”

62 Pita inuw Yeisuw anilivan, isap in watoulan ven, iva̱lam, singay igeg nanon.

63 Tasiyas niyousis Yeisuw mo isiba̱wes, iwaweiys.

64 Kweim waseg ilumwes matan, ikatiga̱nes, ilansa, “Kulivnek ma̱wana palopit ya̱koum. Kal to iweim?”

65 Asilivan babaw ikika̱nes Yeisuw, itawyages.

66-69 Iyam ga̱boug, tammwayas katuyouns imimeis, tasiyas tanuwgwes lun sisiyas takatimlakeins kaleiwag. Itokes Yeisuw inawes silma̱nin ya̱tal, ilansa, “Kukin ya̱koum Kelis ya̱koum, kadiloka kudibakem ma̱wan.”

Iw to Yeisuw ilana, “Kukin badibakeimiy, nag bukusimounids. O kukin bakatiga̱neimiy, nag bukwatimapus agulivan. Tage nagein Gimgilitoun yey mo bassin Yowbad wanaka̱tay, va̱gan bakaleiwag.”

70 Iweis tasiyas, ilansa, “Tage ya̱koum Yowbad Natun, ne?”

Yeisuw idibakes, ilana, “Bo nukulivans ma̱wan.”

71 Tasiyas mo ilivans, ilansa, “Nag sivinads gamag bikamtilakeids ansinap kalbaleb, peinan nitaliganes anilivan kalbaleb, tatonena ikamumwan.”