1 Mapuna itouws wa̱wag, ikuks, iyums, ineis Yeisuw wanven.

2 Gamag mwasanin mo imeyes taw teitan ankatoun avakaein, immasis wakaban, ta-ma̱wan binoun. Yeisuw ikakina tasiyas inamis va̱gan bileb, mapuna idibek takatoun towen, ilana, “Kalin nuwag ya̱koum; amsinap kalbaleb bo awid.”

3 Takatimlakeins kaleiwag mwasanin bo ikatilutegs, sisiyas illivans, ilansa, “Anilivan waseg ikaypom Yowbad ansinap; singay kalbaleb!”

4-5 Tage Yeisuw ikakin ninous, mapuna idibakes, ilana, “Aveiyag wawun ninoumiy kalbaleb? Bweina balivan, balana, ‘Bawid amsinap kalbaleb beikous,’ o bweina balivan-vak balana, ‘Kutamanaw kunoun.’ Wotet akweiy gagab waseg yey.

6 “Kadiloka kukwakins Gimgilitoun yey, o gunakaleiwag nises ven watinow va̱gan bawid gamag asisinap kalbaleb, mapuna badibek taw towen bitamanaw binoun.” Yeisuw idibek, ilana, “Kutamanaw, kukow, a̱bam, kunoun kun wambunatum.”

7 Taw towen iligen, itamanaw, inoun in wanbunatum.

8 Gamag babaw ikines, igoulus Yeisuw, iya̱kawns Yowbad waseg, peinan bo isek kaleiwag towen wasigeis gamag.

9 Yeisuw inoun in, ikin taw teitan yagan Matiw, isin wakaban, gamag isita̱kis ikokew; Yeisuw idibek, ilana, “Kukikun waseg yey.” Mtowen iligen, itamanaw, ibukun Yeisuw.

10 Wankuyeim ikamkwam wanbunatum, takalbalebs babaw imeis, tasiyas takaweins ta̱kis sisiyas takalbalebs mwasanin ikaypuls sisiy Yeisuw siney navamul.

11 Tasiyas Palisiy ikines, idibakes navamul, ilansa, “Aveiyag wawun mitovek ikamkwam siney takalbalebs sisiyas tasiyas takaweins ta̱kis? Bo igak!”

12-13 Yeisuw iligen asilivan, ilana, “Misinaka takatouns sivines doket, toubweins nag. Kadiloka kukwakins silawun Yowbad anilivan mamagina:

14 Yon navamul mo inekes Yeisuw, idibakes, ilansa, “Yakamey kapsapos, tasiyas Palisiy ipsapos; tage mivamul ipiyaves pos. Aveiyag wawun?”

15 Yeisuw ankabebay isekes, ilana, “Kukin kal beivays son nakwav, o taliven bineis biva̱ges kan silma̱nin inakamkwam; bimwa̱saws-wan; ta-ma̱wan biva̱lams, nag. Tage tutan anadouw waseg, taw towen binoun, mo biva̱lams taliven, beipos.”

16 Ankabebay kweitan isen mamagina, “Kweim sigsa̱gob ta-ma̱wan bitabweil waseg kweim kweivaw; bitabweil bo bitadud avakaein.”

17 Kwayuwein ankabebay mamagina. “Awoum bitavgog kunasoup kweiboug, waseg wayn kweivaw; igaw beilol, bitavis kunasoup, biyamkwen wayn; tage kunasoup kweivaw bwein, bitavgog wayn kweivaw waseg, bo bisesun bwein, peinan tawtoun.”

18 Igawa igeiguy wasigeis, takaleiwag teitan im, ikulul wamatan, ilana, “Natug kuda̱vin mwana ikanig, kum kusen namam wa̱won, va̱gan bukuyamov.”

19 Yeisuw itamanaw ibukunis taw towen sen navamul.

20-21 Igaw inounas, vin na̱tan isap watibwelon, buya̱vin iwta̱wout yam babaw, bweilim sinawatan akweiy nag beibwein. Nanon ilana, “Bo bakabkwen Yeisuw anakweim, mo ba̱bwein;” mapuna watibwelon Yeisuw ikabikon anakweim matan.

22 Yeisuw itouvin, ikin, ilana, “Kalin nuwag ya̱koum. Nukusimounid waseg yey mapuna bo kubwein.” Mo ibwein tut towen waseg.

23 Yeisuw inoun in takaleiwag towen wanbunatum, ikin taykiyiks pikolel iykiyiks, tavva̱lam ivva̱lams, butus gamag singay avakaein.

24 Yeisuw ikin, ilana, “Kunounas. Nag imat gwad towen, immasis-wan.” Tasiyas gog isiba̱wes, idokes kid Yeisuw takabala̱wein. 25 Tage Yeisuw ikayabes, ineis watoulan, mo isiw wabunatum, iyous gwad towen naman, mo itamanaw.

26 Butun inawotet towen inganegs ven towen avakaein waseg.

27 Yeisuw inoun in, tawaw asteiy ibukunis, ikaw mites, iwkuwaks ilansa, “Ya̱koum Deibid tabun ya̱koum, kusiwyoubum.”

28 Isiw wabunatum, tasiyas inekes. Yeisuw ikatiga̱nes, ilana, “Tab kusimounids guntawtoun silma̱nin wotet towen?” Ilansa, “E, ma̱wan, peinan guyaw yak.”

29 Yeisuw mo ikabkwen mites, ilana, “Peinan nukusimounids waseg yey, mapuna bo bukubweins.”

30 Mo ilal mites. Anilivan tawtoun isekes, ilana, “Awoum kwamteles sinap towen.”

31 Tasiyas gog, mo inounas ika̱mats, vena babaw wasigeis.

32-33 Yeisuw siney navamul inounas ineis, gamag mwasanin mo imeyes taw teitan takakon, bwagaw neiweiy anilivan wadadan. Bwagaw towen Yeisuw ikayeb mo ikilev, gamag towen mo ilivan bwein. Gamag babaw ikines, bo isom ninous, ilansa, “Sinap kweitan-wan. Kweiboug nag takines wadavanuys, min-Yisleil ya̱kids, peinan kweivaw sinap towen, tawtoun.”

34 Tasiyas gog Palisiy, ilansa, “Natawtoun, peinan Seitan ileb, Seitan siyas bwagaw sitovek. Seitan ileb mo ikayabes bwagaw.”

35 Yeisuw ita̱vin ven katanok katanok wasigeis, sisinagog wasigeis ikatimlakes gamag, Yowbad nakaleiwag bwanabwein liva̱nen issekes tasiyas, o takatouns katanok katanok iva̱ges mo ibweins.

36-38 Ikin gamag singay babaw mo inok nuwan, peinan kululuwes isiwsawoul, peinan bo ilassulis ked, ma̱wana sip; o ta-kal bimgwayes. Mapuna idibakes navamul, ilana, “Kan babaw bo imatuw, asteiyuy bitayoys; kunitougs daGuyaws Yowbad va̱gan kid bikayabes tawwotets bilabeids kid mo bitatayawes inabag towen.”