16
Swadaka ya kuwasaidiya wenye kwamini wa Yerusalemu
1 Sambi, kuhusu nzuruku uri kucangiwa waperekeriwe watakatifu* “Watakatifu” ndi wenye kwamini wa Yerusalemu., kamba vyanamurire majamati a Galata, nomwe tendani novyo. 2 Suku yakwanza ya sumana† “Suku yakwanza ya sumana” ndi Jumapiri. ifíka yonse, kila munu ature mwanyewe nnyumba nzuruku aba waapatire, ipate panisaka kuja, mwikare wakuritengeza. 3 Nikifika, wamusaka kuwatondola onse, niwatuma pamoja na waraka wakapereke nzuruku wa ncango Yerusalemu. 4 Na ikifãi kuwa nomi novyo nuke, tukuka onse.
Mipango ya kuwawona wenye kwamini
5 Nukuja kwenu‑ko bandi yakupita Makedoniya, kamana nipanga kupita kati ya Makedoniya. 6 Dalili nukuja kwikala nnomwe wakati mmojawapo, anta wakati wa baridi uta kunisingana noko ipate munisaidiye safari yangu kanisakula kuka konse. 7 Omi sisaka kukuwonani na kupunda, ila nitumaini kwikala namwe wakati aba, Mwenye akijanliya. 8 Falakini nikwikala Efezu nokuno mpaka ritendiwe jambo ra Pentekoshiti. 9 Konta iwapo nafasi nyingi yakutenda kazi ngema nokuno, ingawa wawapo wengi wabishana nomi.
Mafunzo a kuwahusu wanu wamojawapo
10 Timotiyu akifika eko, ntendereni piya ariwone kutafitiwa vyema, kamana kamba vya niri omi, na iye novyo kankutenda kazi ya Mwenye. 11 Kwa javyo, musimwase munu anta mmoja kunfezeyi. Mwenendeseni salama ipate aludi anisingane, kamana nankunrindira pamoja na wanduzangu wengine.
12 Sambi, kuhusu nduyetu Apolu, nintafadali aje akuwoneni umwe pamoja na wenye kwamini wengine. Fala iye aasaka kuja sambi‑pa, ila akiwa na nafasi, akuja.
13 Tengemanani, olokani nkati ya kwamini, rimbani myoyo, na komalani. 14 Piya vyamutenda, tendani na pendo.
15 Sambi, wanduzangu, nukutafadalini umwe kuhusu Eshitefanu pamoja na jamaa zake. Mukwijiwa kuwa ewo ndi wawére watanzi wakunfulata Insa‡ Kigeregu: “visumo vitanzi”. inti ya Akaya, newo warilavya mainsha awo wawatumike watakatifu. 16 Wasikirizeni ewo pamoja na wengine wari kutumika na kutenda kazi javyo. 17 Niwa radi pakulu kuwa wanduzetu wáfika kuno salama Eshitefanu na Furtunatu pamoja na Akayiko. Kamana ewa wanifãi pamutowire kuwepo umwe, 18 konta wanirimbisa moyo pakulu, kamba vyawakutendireni umwe. Kwa javyo, wasikirizeni sana-sana wanu kamba ewo.
19 Jamati za Aziya zukuperekerani salamu. Akila na Pirisila pamoja na wenye kwamini wajumunanga kwawo‑wo, newo novyo wakuperekerani salamu nyingi. 20 Wenye kwamini piya wakuperekerani salamu. Komazanani nkati ya pendo ra Almasihi.§ Kigeregu: “Kukomazana na beju takatifu.”
21 Nukuperekerani salamu za kwandika na nkono wangu, omi Paulu. 22 Ikiwa kawapo munu saampenda Mwenye, eyo munu‑yo alaniwe. Maranata* “Maranata” nkiaramaiku mana ake: “Njo Mwenye”.! 23 Rehema ya Mwenye Insa iwe namwe. 24 Nukuperekerani pendo rangu piya-mwe mulungane na Almasihi Insa.