1 Enang aaꞌ diiꞌ niiꞌmaikororiꞌ niiꞌke diiꞌ pia-antararampimaang unampampiri tee-koo Ovoring Jiisuuꞌ napoꞌ diiꞌ niiꞌkoo barerariaing teeꞌ diiꞌ tampaꞌ otoriainaꞌ Kumponing dotu-antaveri teeꞌ eeꞌnaꞌ enang nkoverimang, nka baruꞌ aaꞌnaꞌ nkoveriaing. 2 Aꞌnooꞌ tee noruꞌeri otong tee botonanka naurarampiruꞌnung tee-koong Ovoring Jiisuuꞌkoo kuunge. 3 Tee tee eeꞌnara pia Ovoring bakaang, diiꞌ poterariri meekaꞌantarariiꞌnaang tee-koo aarumo kaukauro nko-koong. 4 Teeꞌkoo diiꞌke tampaꞌ noruꞌeriaing koontoꞌ narunge baka baꞌaang masikani nampuainaꞌ meekaꞌantarariri toosirariri otoriainaꞌ. 5 Tamung karaaꞌdeerima siong-antareeriaukaꞌ Kumponing noruꞌaavaing-pinaꞌ. 6 Niiꞌnung naninge baꞌmaikoꞌ pariꞌuaukaꞌnunge aung kapooꞌkoo. Ovoringe tee temuriiꞌ kapooꞌ ootukunung makuꞌantavumaung, teeꞌ tero koono-antararampiri naurarampiruꞌnaꞌ. 7 Aiꞌ Kumponinge diiꞌ kuꞌmiꞌkoo miruꞌduriaꞌ, teka kiiroraaꞌdariri otoꞌkoo miruꞌduruꞌnung. 8 Teeꞌkoo tee naning aung kara masikung dimpaꞌuaing deekoꞌ, naning dimpaꞌuaꞌ, Kumponing eeꞌnara dimpaꞌuing, tee Tanuaang Meekung arurimaung.

9 Tee-koo piaa, namaiaꞌ piaareerimaung-koo, Kumponinge tero bareruruꞌnung piaareeriiꞌnaang kapooꞌ daari-koo makosi otoaꞌ. 10 Eeꞌnaꞌ ootukuning diiꞌmaikoriꞌ Masedoniaꞌnameensiꞌnupoong piaaverererimaung, masikaꞌ. Nka enang niiꞌke iriꞌmori unantarampimaang eeꞌ: Diikaang aarumo piaa-koong pankaꞌantaveriaing. 11 Eeꞌnoko toꞌbii-antarariri kaꞌduuroꞌnuka otoriiꞌnaang niiꞌning biikaang nko-nkonanka-koo papuraankaꞌantaverereriaukaꞌ, teka diiꞌka diikaang, kakeꞌiirariri mintoontariai diiꞌka diikaning birenge, botorarampiruꞌnaꞌ. 12 Teeꞌ nariꞌ akoviturie tee-koo masikaꞌantaraariaing. Niiꞌnung-koo arooꞌdari ataꞌ naniaukaꞌ.

13 Enang tee diiꞌ niiꞌmaikororiꞌ teing Karistooꞌ bakaning boorouꞌning-koo tampaꞌ naurarampiiꞌnaang piamorimang diiꞌ orarun-sirariaukaꞌnaꞌ, teeꞌ niiꞌning nkoarimanaꞌ Karistooꞌkoo nempariaꞌ otoromaing. 14 Niiꞌke masikaꞌantavampiri otong Jiisuuꞌ tee booꞌparara napoꞌ daaꞌaruꞌ. Teeꞌkoo teeꞌ noruꞌampiri otong Kumponinge Jiisuuꞌ bakaning boorouꞌning napoꞌ tee ninka nariꞌ tavoꞌantavuriaing. 15 Ovoringe tutung naumuriko diiꞌ nariꞌ naurarampimaang: Niiꞌ teing booroma siꞌmaaruꞌning Ovoring poainaꞌmung-koo damaꞌdue biꞌmariaing boorouꞌning-koo. 16 Aiꞌ Ovoring eeꞌnara paning-eta siarama aaꞌnaꞌ bokumuriaing koosinung pankaing-pinaꞌ bokuma, Kumponing-etaing tuuviri karoi otoko. Eeꞌnoko Karistooꞌ bakaning boorouꞌning eeꞌnamuꞌ daaꞌariaing tutung. 17 Teka tenang niiꞌ booroma siꞌmaaruꞌning deto baramuriaing teing ninka kamoꞌkoo kuneꞌkoo tee Ovoring auviꞌaua. Teeꞌ nariꞌ tapoꞌmeerira Ovoring ninka oꞌnoriaing. 18 Enang tee dunsirunsi˜antareeriaing aunge karai.