1 Enang napoꞌ diiꞌ niiꞌmaikororiꞌ naurampimang niikaang Ovoring Jiisuuꞌ Karistooꞌ napoꞌ toroaravaing-koo eeꞌnoko tee niikaang naronaroꞌ tee, kuneꞌampiaing-koong. 2 Aaꞌnaꞌ pia-antararampimaang diiꞌ niiꞌmaikororiꞌ paapaaꞌdarima domang puraaniriaukaꞌ niiꞌnamuriiꞌ kara tavoꞌarako, Ovoring bakaang doong tavoꞌkuing, poing, tampaako, bane Tanuaang Meekunge karantanuka˜ tamparima aiꞌ daankiarima minkuaako dootuuꞌkoo aiꞌ karavoto-koo˜ minkuaako ning-etaing tampaama. 3 Teeꞌ avutevuꞌai tosiraariko masikaꞌantavereriaukaꞌ. Eeꞌ noruꞌeriai, kenaanka kapooꞌ nkoaravaruko Ovoring bakaang doong tavoꞌkuaukaꞌnung, aaꞌnoko tutung mmauꞌke Kumponing-eta bereꞌarima tooꞌdempaavai eeꞌnoko tee naning Kumponing-nung Boto Meekung daang-anta-koo piavoainung oroꞌparavaing, teenooꞌ tee mosianung kuuntuꞌuaing. 4 Tee eeꞌnara naning taarapiika deto basi tamparavaing ookara ovontung-koo nantoonge boontuaarimaing-koo. Ovontung turampuriainge bera dootuuꞌnava pankava Kumponing-nava koinuraiꞌnange baꞌnamparara eeꞌ minkuvuaing: “Ning tee Kumponing.” 5 Aung kara tero naurampiruꞌ diiꞌ ninka oꞌnoritaaꞌ, aiꞌ ampaꞌdoruꞌnunge? 6 Diiꞌke tee noruꞌeri otong tee doomoꞌui otomaung. Teie doomoꞌui otooꞌnaang bera tee bateinang Kumponinge tauraꞌpuko oroꞌparavainaꞌmung. 7 Aꞌnooꞌ tee taarapiika aarumo enang makensiꞌnaꞌ nko-nkoaramang doomoꞌuioꞌ bera Kumponinge tee doomoꞌui otomaung daateꞌuainaꞌmung. 8 Karistooꞌ eeꞌnara aaꞌnaꞌ araka-poꞌnung tavoꞌkura paroꞌuuꞌnaang bakaang domaange karang-eta, eeꞌnoko teka bake-antavuai bakaang aarumo.

9 Enang napoꞌ naurampiaing tee-koo naning taarapiika Kumponing-nung Boto Meekung daang-anta-koo piavoainung-koo; 10 Sietaniꞌke eeꞌnarai tee taarapiika tavoꞌantavuuꞌnaang tee ninka bakaang iriꞌ amutemuriiꞌ taaꞌniꞌanta tositosi-koong, taꞌnimpaariiꞌ, eeꞌnoko amutemuriiꞌ aarumo orarananka tosi-koong duaꞌanta-koo teing paaꞌarimaing kasiaavaruma tee kara masikung domampuripeuꞌnung. 11-12 Teeꞌkoo, kasiaavaruko Kumponinge tauraꞌpuaing tositosi pankaing teing-koo tavoꞌaraaꞌnaang, daang-koong masikaꞌantavaako ookara kiimata-kooning tampuriainaꞌ, orara aarumo piavoroma kara masikung masikaꞌantavaavaruko.

13 Niiꞌmaikororiꞌ ee, Ovoringe piaaruri otorining, teka niiꞌke tampaꞌ tampampiaing Kumponing-koo diiꞌ eeꞌning-koo. Aiꞌ diiꞌ teing Kumponinge tanturuꞌning tutunaꞌnooꞌketa domantariiꞌnaang Tanuaang Meekunge meekaꞌantarurioꞌ eeꞌnoko diiꞌke kara masikung masikaꞌ antaverima. 14 Kumponinge temuriiꞌ otootoꞌkoo bokururuꞌ tee doorenang tampara daankiampiko diiꞌkoo. Diiꞌ bokururuꞌnung nkaveriiꞌnaang tee meenasi niikaang Ovoring Jiisuuꞌ Karistooꞌ bakaang. 15 Teeꞌkoo diiꞌ niiꞌmaikororiꞌ purintariri tampaꞌ donkoniri otoriai, komperi otoriaing tee kara masikung niiꞌke naurarampiruꞌ ookenge daankimarima eeꞌnoko karavoto-koo daariampima.

16 Tee niikaang Ovoring Jiisuuꞌ Karistooꞌ eeꞌnoko Niuma Kumponing piaamaarimanakang eeꞌnoko biraanke-antamaari domang kuaaꞌanta boturopa amaarinakang, kapooꞌ tampara-koo neng-antamaarima – enang tee tekange eeꞌnakange domang kuaaꞌantaraariai. 17 Diiꞌke ookara kapooꞌ tamparananka minku-koo eeꞌnoko nko-koo iriꞌantaraariaing.