1 Nka enang tasiꞌpeai aung: Doong asiraning-koo tavoꞌkuaing batei arikananka. 2 Aꞌnooꞌ eeꞌ oroꞌnanka otoroaing: nantoong biiꞌka piaavarimaing, mooniꞌ piaavaamaing, biiꞌka daangamparimaing, daang pankaing-pinaꞌ noruꞌnanka, kara oreng minkunuka, taarapii-kananka biumaraang-koo, kapooꞌkoo tampara minkuaavaing, meekaꞌpariaing, 3 nantoong baaꞌpinaꞌ noruꞌaarimaing, pinau noruꞌaavaing, miring orari-antananka, tooreerenuka, irinsianuka, tampara aarumo tavaamaing, 4 tooꞌde-nupoong, tutung tampara noruꞌ uraantavaavaing, kirokainuka-pinaꞌ noruꞌarimaing, biiꞌka tampaꞌ deeꞌanta-koo nariꞌ piavoroma Kumponing tampaꞌ deeꞌanta-koo piavoroaing, tang dootuuꞌarimaing nka Kumponing daang-antavaakooꞌ; 5 Temuriiꞌ nantoong-eta tontaꞌdari otoaing. 6 Teing-koo niiꞌnariong tee pavanankai tamung koinaamaung manikuꞌ aruaruꞌnanka biikaang kara-koo biꞌantavaariiꞌnaang, manikuꞌ orara aarumo ninka mankiꞌoromaing, noruꞌ avitoitoi eearimaing kapooꞌnanka amutemuriiꞌ karaaꞌaama. 7 Bane arera naning arekeeꞌ oroꞌ poko tee taaravaapeuꞌ, nka tasiꞌpaavarupeuꞌ kapooꞌ masikung. 8 Tero tee Janis naankai Jampiris turampurekoꞌ tee Moosesi, eeꞌnoko teeꞌ nariꞌ teinge tooꞌdempaamaung ookara kapooꞌ masikananka. Teing donkaang tunsi deraꞌnukai eeꞌnoko baito tosiroꞌkoong otoꞌevoroining. 9 Eeꞌnoko Janis naanka Jampiris namuꞌke duaꞌaretuꞌnaꞌ teeꞌ nariꞌ napoꞌ teing tamung apupoꞌ basiarira duaꞌariaing nantoong ookarai ooaarioꞌ.

10 Enang tee dake ning noruꞌmeing apeꞌ: kara nauarankoꞌnaꞌ, nkomaramanaꞌ, nkaang domang toꞌbii-antamaramanaꞌ, nkaang masikaꞌanta, kapuumari oꞌnomanaꞌ, nkaang piaa, eꞌmanansi oꞌnomanaꞌ, arikananka kuneꞌamanaꞌ, sisikeera kuneꞌamanaꞌ, napoꞌ orakaꞌ nkomauꞌnaꞌ teka Antiokiꞌka eeꞌnoko napoꞌ Aikoniamiꞌka eeꞌnoko Liisiraꞌka, aremuriau turanturang eꞌmanansi toraꞌpantuꞌnaꞌ; 11 Eeꞌnoko noruꞌei otong ookara teing-eta Ovoringe mooꞌmuuꞌ domamuuꞌnaang. 12 Teeꞌ nariꞌ masikaꞌ ookara Kumponinge marovurimanaꞌ otoꞌkoo piavoromaing nantoonge orakaꞌnko kuneꞌaavaing, teing Jiisuuꞌ Karistooꞌkoo otoromaing. 13 Tenang eeꞌnang oreng nantoong daang Kumponinge botonisinuka tamparimaing aaꞌnaꞌ baruꞌnooꞌ oraruꞌkiaavaing nantoong tosiaarima eeꞌnoko biiꞌka tositosi masikaꞌantavaama. 14 Teka dake siompeaing tee kapooꞌ daꞌ bareraruꞌnung eeꞌnoko ivekaꞌdoi masikaꞌantaveuꞌnung. Dake niiꞌ tampaꞌ noruꞌmeri otong kara naurampiruꞌning. 15 Eeꞌnoko daꞌ tootoꞌnooꞌketa noruꞌeuꞌ Dariraari Meekananka teing daꞌ tampaꞌ nau-anta-kooning noruꞌantarupeuꞌning Jiisuuꞌ Karistooꞌke domantuainaꞌ baitorarako. 16 Ootukunung Daari Meekung Kumponinge amuruꞌnung, Kumponinge uaampuriko daariauꞌnung, eeꞌnoko tee makosi nau-anta-koo, orara aarumo tasiꞌanta-koo, domang koong-anta-koo, eeꞌnoko tampara aarumo siong-koo kakeꞌiiari. 17 Kumponinge teeꞌ karantavurikoꞌ aaꞌnooꞌnaang: Bakaning meekupoong makosininge maantoꞌantavarira amutemuriiꞌ nko-nko tamparananka tavoꞌantavaavaꞌnaang.