1 Niiꞌnang tee diiꞌ doori otorikoꞌ boto-totoꞌ eeꞌnoko orakaꞌnko nkoverima. Teeꞌ nkoverima kansiꞌkooning biikaang aarumo narung siomperikoꞌ. 2 Sietaniꞌ siomperikoꞌ, ovonturi biikaang boreꞌ auviꞌau-eta bakaang muuꞌ tareaamaing, tee eeꞌnara Kumponing siomeevanuka-koo meuꞌke mintoomparamaung. 3 Niiꞌ ookara teeꞌke tero niikaang orara aarumo-koo amarima karaaꞌ dovange booꞌkoo niikaang mono eeꞌnoko onou piavokoꞌnaꞌ nariꞌ siompampikoꞌning. Tee tee niiꞌ domang orakaꞌ oꞌnorikotaaꞌ Kumponing-nung kiimata kompampiaining akoing-pinaꞌ nariꞌ. 4 Teka teie Kumponinge piaae maantoꞌke aaꞌnaꞌ piaamurikotaaꞌ bane niiꞌ boto totoꞌke moompiri oꞌnoriko domang-antamuruꞌ Karistooꞌ ninka nariꞌ; 5 Tee tee Kumponing bakaang avusiroꞌke teeꞌ domamuruꞌ. 6 Eeꞌnoko domamurira Karistooꞌ ninka nariꞌ napoꞌ daaꞌmuruꞌ nariꞌ tare-nupoong oꞌnoriiꞌnaang tee ninka paninaumariri. 7 Aing ookara kapooꞌnanka tampaꞌ nkomurima tavoꞌantavuuꞌ tee-koo Jiisuuꞌ Karistooꞌkoo damaꞌnavarang nau-anta-koo bakaang avusiroꞌke maantoꞌari otomanaꞌ paaranang-koo makosi deeaung. 8 Aiꞌ Kumponinge avusiroꞌari domang-anta masikaꞌantaveruꞌnooꞌ deekoꞌ domantariruꞌning, diiꞌka deeaꞌ, bautaꞌdurima. 9 Kapooꞌ nkoveriko teeꞌ domanturiaꞌ makuꞌkoo. Maroita, naning daangamparaꞌneeng-koo. 10 Kumponinge tee niiꞌ oꞌnorinaꞌ nariꞌ nkomuruꞌ. Teie Jiisuuꞌ Karistooꞌ bakaning deemuri nkomuruꞌ tampara nko-nko nkoevompimaaꞌnooꞌnaang oꞌnori tero miruꞌmuruꞌnaꞌ.

11 Teeꞌkoo tero orakaꞌ otorikoꞌnooꞌkoo ampaꞌdoriaukaꞌnung. Diiꞌ teroita Juꞌdeeaꞌ, dopaꞌ totoꞌdariarukoꞌning, tamunsiꞌnupoong tantaarikoꞌning, aꞌnooꞌ teing tamung dau naroꞌ dopaꞌ totoꞌke meekaꞌantavarima. 12 Ampaꞌdoriaukaꞌnung tero tee diiꞌ Karistooꞌkoong noruꞌ otoriarukoꞌ, Isireeli-nupoong-eta taapoꞌ otorikoꞌninge, Kumponinge kara maraka-antavui naroompuuꞌnaꞌkoo damisimainkue, kansiꞌkoo naroꞌ biꞌdariri domaang isikung nkanaꞌ noruꞌ otoaꞌ, Kumponing pakurupeuꞌnung otoaꞌ. 13 Teka enang diiꞌ tee teroita Pakoꞌpariꞌniiꞌ domanturira tareruriaing-koong ninka tapoꞌdarira Kumponing-anko poꞌantarurining bakaang erenge tero taapoꞌ isipoꞌ otorikoꞌnooꞌketa. 14 Tee tee Karistooꞌ tee niikaang mooa-nko. Teie tee naroꞌka tapoꞌmuring aaꞌning Juꞌnupoong eeꞌnoko Juꞌ deeaing. 15 Bakaang mono booꞌkoo avaruꞌnooꞌke teie tee tetevaꞌuuꞌ tee kuꞌnung turanturang-koong siivenkeꞌmuri otokoꞌnung niiꞌ. Moosesi-nung boto teka bakevui, mono etu-koong. Aing ookara kapooꞌ eeꞌ oroꞌ nkovuuꞌning nerakariong nkovuriiꞌnaang aaꞌning-eta Juꞌnupoong eeꞌnoko Juꞌdeeaing teie baka naroꞌkavurira pinau-anta-koo. 16 Aaꞌbarataꞌkoo booꞌparuꞌnooꞌ tee turanturang bake-antavuuꞌnaang naroꞌkamurira ookavitura Kumponing-koo navitu-pinaꞌ. 17 Teketaꞌ pora teie karantavurima˜ daankivuuꞌ tee doorenang tampara mooa-poꞌnung ookavitura-koo aaꞌnoko Juꞌdeeaing eeꞌnoko Juꞌnupoong, diiꞌ isipoꞌke taapoꞌke otorikoꞌning-koo eeꞌnoko teing Juꞌnupoong tee-anko dueꞌnupoong-koo. 18 Aiꞌ tee tee teie taung nkomemurioꞌ niiꞌ ookavitura Bauma-anko beꞌkoo makotumpiri otong tee narung Tanuaang Meekung-koo kuunge.

19 Enang tee diiꞌ akoing damisimainku otoriaꞌ, teka diiꞌ osikaiaang deentariri otoring teing ninka niiꞌning bakaning meekupoong ninka nariꞌ, eeꞌnoko Kumponinge tarevurimaing-kooning diiꞌ. 20 Diiꞌ Kumponing-nava kani-nupoong teeꞌ pauꞌdeeri otoring teing-koo kara okovuri nkanuka eeꞌnoko nakaronuka˜koo dau, Jiisuuꞌ Karistooꞌ tee eeꞌnara ookara-koo eꞌmanianareꞌ makosi, tumanung. 21 Tee-koo ootukunung nariꞌ beꞌnuꞌariri otoi kaniari otomaung dootuuꞌnava pankava deempari Ovoring-koo. 22 Eeꞌnoko diiꞌ nariꞌ tee-koo otoritaaꞌ tee-koo kanirariri otoring Kumponing otoꞌdoma deentariri Tanuaang Meekung-koo kuunge.