1 Karistooꞌ tee niiꞌ unaa-antamuruꞌ dotumariiꞌnaang unaamori. Teeꞌkoo naurampimang, imaꞌdariri donkoniriai, eeꞌnoko doonko napoꞌ kinkiniriaukaꞌ daiꞌnisinuka ninka nariꞌ pakeꞌdeeri.

2 Enang ninge Paulaꞌke bakei naurampimang, diiꞌ teing Kumponing ninka naroontariiꞌnaang piarorima dopaꞌ totoꞌdarima boto sionavung arooꞌerima deekoꞌ, Karistooꞌnavung siperimaang pakururipeuꞌnavung. 3 Napoꞌ unantampiri nauramping ninge diiꞌ, ookara dopaꞌ totoꞌnavung arooꞌeriaining diiꞌ tee ootukunung boto Moosesi-nung pukeveri siong-koo daiꞌdariri otoriaining. 4 Aaꞌnooꞌnaang, Karistooꞌketa teeꞌ totoꞌdariiꞌnaang diiꞌ eeꞌning Kumponing-ankoi koontoꞌnuka deentariiꞌnaang piarorimaing tee boto siomperima, eeꞌnoko duaꞌdaririning-pinaꞌ otoriiꞌnaang bakaang avusiroꞌari mooꞌnavung-eta. 5 Teka tee Tanuaang Meekunge pakumurioꞌ baitomarima teꞌmung koontoꞌnuka taaꞌniꞌmoriainaꞌmung-koo nemariri oꞌnoring. 6 Niiꞌ Jiisuuꞌ Karistooꞌkoo kuung oꞌnoritaaꞌ dopaꞌ totoꞌ eeꞌnoko totoꞌ deeaung kapooꞌ deeaꞌ, teka teie baitoi deekoꞌ piaa ninka nkoaramaung. 7 Diiꞌ tee deikooꞌkoo tero tampaꞌ kuaꞌdarikoꞌning-pinaꞌ otoruꞌning, enang baie napoꞌ totoꞌantarurioꞌ tee kara masikung sionavung siperi? 8 Tee temuriiꞌ kara diiꞌ daang arooꞌantaruruꞌnaare tee diiꞌ bokururuꞌnung bakaang kara deeaꞌ. 9 Tee-pinaꞌ kapooꞌ okiꞌnooꞌ deraꞌke ootukunung deraꞌantavupeuꞌnaꞌ teie naninge diiꞌ nko-antaruruꞌnung. 10 Masikaꞌ noruꞌansi otong Ovoring-koo oꞌnoi, diiꞌke nkaang noruꞌkoo taapoꞌke niiꞌnaꞌ noruꞌeriaukaꞌnung eeꞌnoko baa tee naning diiꞌ orari-antarurinung tee kiimata nkavuaing aaꞌnung tee ninge noruꞌampaꞌ. 11 Ee mmaikoriꞌ, niiꞌninge aaꞌmaamaung, “Paulaꞌke dopaꞌ totoꞌnavung daankivumaung.” Nka teeꞌ deeaꞌ, aiꞌ ning aming-koo orakaꞌ nkomaamang tevung boto sionavung-koo baukoreeꞌnukai? Ninge teeꞌ daankiansi dei tee daang-antavampeuꞌ tee doorenang Jiisuuꞌke niiꞌ domaang mooꞌmuruꞌnung-koong, aaꞌbarataꞌkoo booꞌpari boto bakaang taretare bakevura, eeꞌnoko teinge Juꞌnupoonge tooꞌdempaavarupeuꞌ. 12 Maikoꞌ teing dopaꞌtotoꞌ siompaama diiꞌ poreꞌantaraarimaing avitoitoi-koo biiꞌka biikaang mono totototoꞌparipeuꞌnung.

13 Diiꞌ mmaikoriꞌ unaarori otoꞌkoo bokururuꞌning, teka unaarori otoꞌkoo otori diikaang mono bakaang pia narung siong-koo tauraꞌdariaukaꞌ, teka piaareerima pakureeriai diiꞌ niiꞌning-koo botovotonaaꞌnuka noruꞌdariri. 14 Ookara botonanka Moosesi-nung tee nanaare-koo dupeari otong eeꞌ minkuvumanaare-koo:

16 Teka enang aaꞌdampimang, Tanuaang Meekunge naururiainaꞌ siomperiai eeꞌnoko mono bakaang pia siomperiaukaꞌ. 17 Aiꞌ mono bakaang piai tee Tanuaang Meekung tooꞌdempui otong eeꞌnoko Tanuaang Meekung bakaang piai mono tooꞌdempui otong, aiꞌ anaanka tee turampeeremanaanka eeꞌnoko dake kapooꞌ daka nkovepeuꞌnung otoaꞌ tenaanka-koo narung taaravearura. 18 Dake Tanuaang Meekung taaravera siompeaing deekoꞌ daꞌ tee boto-koo kuung otoaꞌ. 19-20 Mono bakaang nko-nko eeꞌpinaꞌ siraꞌpari otong: nampeesi orari, kaukauro-nko, noruꞌ kuꞌmiꞌ, maimaiaꞌnaꞌ nko, kumponing tositosinanka siong, dopa-nko, orakaꞌ noruꞌ, turang-nko, orarunsi ninka munteꞌ, iira bauko, mosiiꞌ, kara-koo tataꞌ, siivenkeꞌ, mamairontoꞌ, purintoꞌnaruꞌke kanuꞌ, tooreere dovang; 21 Ninge enang tautaurampimang tero tautaurampiruꞌnaꞌ: Teing teeꞌ oroꞌnanka aarumo nkoaamaing Kumponing bakaang muuꞌ aarenaavaukaꞌnung barenku oko-koo. 22 Teka tee sinang Tanuaang Meekung-etaing aung eeꞌ oroꞌ: piaa, doturotu, mooa, daꞌdeng iira deeaung, tampaꞌ nko, avusiroꞌ, masikaꞌanta, banainge otoꞌ, eeꞌnoko baka pinkaꞌari otoꞌ; 23 Aing pote-koong boto otoaꞌ bakei. 24 Eeꞌnoko teinge nantoong Jiisuuꞌ Karistooꞌ bakaninge tee biikaang mono-aapenaꞌ noruꞌ aaꞌbarataꞌkoo taakavauꞌ teing bakaning karakaraaꞌnanka domange etuvurimaing ninka. 25 Tanuaang Meekung-koo kuunge domamariri oꞌnorimaung deekoꞌ, teeꞌ nariꞌ Tanuaang Meekung ninka nariꞌ nanampimaatoaing siompampiri. 26 Niiꞌ kirokainku-pinaꞌ oꞌnoriaukaꞌ, ereanameereaukaꞌ eeꞌnoko mamairomeeriaukaꞌ.