1 Jiisuuꞌke teing nanaiꞌketa kenaankara bakaning barevare-nupoong tee-anko bokuvurira tauraꞌ avuruꞌ makosi-antavurima maꞌnari oreng bataꞌkoong eeꞌnoko napoꞌ siipananka amutemuriiꞌ taare-anta-koonge.

2 Aing teing mirinanka teing nanaiꞌketa kenaankara kara okovuri nkanuka biikaning: Tutunaꞌnung Saimoniꞌ, niiꞌnooꞌ Piita, eeꞌnoko teie baaraꞌmaꞌnung Aanduruꞌ; napoꞌ Jeemisi, tee Siebedi bauring; eeꞌnoko baaraꞌmaꞌnung tee Jooni. 3 Napoꞌ narung Pilipiꞌ, eeꞌnoko narung Baatolomiuꞌ, napoꞌ niiꞌnung Toomasi eeꞌnoko Maatiuꞌ, tee eeꞌnung taakisi nkanuka-koong; napoꞌ niiꞌnung Jeemisi, tee Alopeasi bauring; eeꞌnoko narung Taꞌdeasi. 4 Napoꞌ niiꞌnung Saimoniꞌ, Juꞌ biiꞌka donkong-koo pia-navitu-koong; eeꞌnoko narung Judasi Kerioꞌnara, tee tooka kompui Jiisuuꞌ tauraꞌpuuꞌnung bakaning kare-nupoong-koo.

5 Teing aing nanaiꞌketa kenaankara Jiisuuꞌke botovuruꞌ kara aung ninka tautauvurima, “Juꞌdeeaing biikanooꞌ beriaukaꞌ, napoꞌ Sameriaꞌkooning-koo osi-koo beriaukaꞌ. 6 Teka teing Isireeli-nupoong sipisipiꞌpinaꞌ pooariruꞌning biikanairu-koo beriai. 7 Berira kara aung anaare daankieriai, ‘Tee muuꞌ paninung tee enang dueꞌ poing!’ 8 Eeꞌnoko siipa-nupoong taare-antaverereriai. Napoꞌ booꞌnuka domampereriai. Oramuuꞌpoꞌnupoong kiiroraaꞌantaverereriai. Eeꞌnoko maꞌnari bataꞌereriai. Aung amuriiꞌ iriꞌ tamung arompiring eeꞌnoko diiꞌke napoꞌ teeꞌ tamung pakuereriai tee ninka. 9-10 Aing aaꞌning kapooꞌnanka nkaveriaukaꞌ: mooniꞌnanka kereka-koo kuunga, miku taamang-poꞌnung, niiꞌnooꞌ mononopaꞌ paripariꞌ, eeꞌnoko boonamante˜, napoꞌ donsiꞌ nkaveriaukaꞌ, aiꞌ tee tee pakuereriko diiꞌ napoꞌ teinge pakuraariaing. 11 Aremono-koo diiꞌ beriainamono-koo pankamono-koo deekoꞌ niiꞌnooꞌ osi okiꞌnamono-koo deekoꞌ naning makosi besiꞌeriaing teka, eeꞌnoko tee ninka otoriai bakanava-koo bera tenkeniriainooꞌke basi. 12 Tenang teva-koo tuntarima mooa-antaveriai tee naning. 13 Eeꞌnoko teie tevaꞌkoonge nkaang kara taara-koo arooꞌuaing deekoꞌ tee mooa teke teva-koo otoaing tee ninka, eeꞌnoko arooꞌuaukaꞌnung deekoꞌ tee napoꞌ diikaang mooa diiꞌkoo napoꞌ toroaravaing makosi. 14 Naninge onkeonkeꞌduriaukaꞌnung deekoꞌ eeꞌnoko diikaang kara taaravuaukaꞌ teketa teva-ita, niiꞌnooꞌ osi-eta, tenkenirima temono-koong daꞌmong tankaveriaing diikaang peꞌnaaꞌketa temono Kumponing-koo maarekusiꞌnamono taaꞌniꞌantaveri. 15 Masikaꞌ naurampimang ninge, teꞌmung simpeꞌ nkonaꞌmung kiimata temono-nupoong biikaang koontoꞌ bakei dau basi deemparavaing teing-koo temuꞌnupoong oreng-koo biikaang osi Kumponinge paroꞌuuꞌning-koo, aaꞌnoko Sodom eeꞌnoko Komoraꞌ.”

16 “Aing ee, ninge tee diiꞌ sipisipiꞌnanka-pinaꞌ botorampimang nkaunanka-koo meuꞌke botorampipeuꞌnaꞌ. 17 Teeꞌkoo dontaꞌperi naniriai, aiꞌ diiꞌ teinge nantoonge koompaaraꞌnavitu-koo tavoꞌdaariaing, niiꞌnooꞌ muraꞌdaariainge dootuuꞌarimanairu-koo. 18 Diiꞌ teing ning-koo daiꞌdaarira donkong-antaraariaing ovoꞌmaꞌnuka-koo eeꞌnoko dauraronanka-koo uroꞌkanooꞌ. Teeꞌ nkoaravaing diiꞌ nkaang kara siraꞌkoo miruꞌniiꞌnuka deentariko, teing-koo eeꞌnoko ookara Juꞌdeeaing-koo. 19 Teka teinge teeꞌ tuutunang˜koo beꞌantaraariko kapooꞌ minkueriaining eeꞌnoko minkueriainaꞌ noruꞌerima avitoitoi noruꞌ mankiꞌdoriaukaꞌ. Aiꞌ tenang eeꞌnang niaꞌdaariko Kumponinge naururiaing kapooꞌ minkueriaining. 20 Diiꞌ diiꞌka tee kareriaukaꞌnung, teka tee Tanuaang Meekung Diuma-itaing diiꞌkoo kuunge karoaing.

21 “Napoꞌ aaꞌnoainge: bataatai tooka kompui baaraꞌmaꞌnung tauraꞌpuaing dupisiꞌaavaꞌnaang, eeꞌnoko baumai bauring teeꞌ nariꞌ nkovuai. Napoꞌ biurukaaꞌke biumaraang turampaarima dupisiꞌaari-ainge. 22 Diiꞌ teing ookara nantoonge munteꞌdaariaining ning nkaang miring-poꞌnupoong deentariko, eeꞌnoko naning purimparioꞌ bera asiranaꞌmung basiaravaing deekoꞌ domamparavaing. 23 Tenang diiꞌ mankiꞌantaraariko niiꞌnamono-koo teketa niiꞌnooꞌ napoꞌ kooꞌdariai. Masikaꞌ naurampimang ninge, diiꞌke teing osinanka Isireeli-nupoong otoromaing nanirima operiaruko tee ning Tee Naning-naumpoꞌ Paning-etaing moaing.

24 “Tee naning barevare-nung bakaang nau-anta-koo dau basi deeaꞌ. Napoꞌ teie botovotonaaꞌ bakaang pankaing-koo dau basi deeaꞌ. 25 Teka tee tee naning barevare-nung bakaang nau-anta-pinaꞌ nariꞌ nkoaavaing. Napoꞌ tee botovotonaaꞌ teeꞌ nariꞌ tee-pinaꞌ bakaang pankaing-pinaꞌ nkoaavainge. Ning tee nkanavitu-koo boreꞌ Kopeu tammaama pooreꞌmaamaung deemarako diiꞌ teing nkanavitu baruꞌ aaꞌnooꞌ pooreꞌdaariaining. 26 Teing-koo aroreriaꞌ otoriai, aiꞌ ookara kapooꞌnanka nopaꞌari otoining teing siraꞌparavaining. Eeꞌnoko ookara kara bakuꞌniiꞌ nantoonge ookarai taaravaavainge. 27 Kapooꞌ ninge mutaananooꞌke naurampimaing doonaaꞌ nau-antavereriaing. Kapooꞌ iaantampiko taaraverira deto karerima daankieriaing.”

28 “Aroreriaukaꞌ teing-koo nkaang kara avoꞌaama diikaang mono dupisiꞌaavaining-koo teka diikaang tanuaang dupisiꞌaavarupeuꞌ. Teka Kumponing-koo aroreriai aaꞌnung-koo: baitoveriaruko mono eeꞌnoko tanuaang ookeng duaꞌureai mosianung-koo.

29 “Noruꞌeri otong nantoonge keura barenning okiꞌnarekaꞌ baaveaamaung nau mooniꞌnu-koo, teka bane okiꞌninge, Diumai tauraꞌpuaruko kansiꞌkoo teing-koo nau duaꞌaravarupeuꞌ. 30 Napoꞌ teeꞌke ookara daponanka diikaang boreꞌkoo tee deeruniiꞌnanka otorong. 31 Teeꞌkoo diiꞌ aroreriaukaꞌ, aiꞌ diiꞌ teing baruꞌ deto basinooꞌ noruꞌduri otong bareng okiꞌnarekaꞌkoo. 32 Ookara teing nantoong-koo uroꞌkanooꞌke ning arooꞌmai otoing siraꞌpariko ninge teeꞌke tee Mmaꞌkoo uroꞌkanooꞌke teke paning-koo nkaning tamparampaing. 33 Teka baa tee naning ning penkemuaing nantoong-koo uroꞌkanooꞌke ninge tee teeꞌ penkempampaing Mmaꞌkoo uroꞌkanooꞌke teke paning-koo.”

34 “Eeꞌ noruꞌeriaukaꞌ ning kansiꞌkoo mouꞌnung turanturang bake-anta-koo. Turanturang bake-anta-koo moaꞌ, teka siivenkeꞌ nkoaraaꞌnaang mouꞌnung. Aaꞌnoaing, narionge ning masikaꞌantamaavai eeꞌnoko niiꞌnarionge masikaꞌantamaavaukaꞌ. 35 Eeꞌnoko teeꞌ nkoarama naning bauma-koo turaniꞌ deemparavai eeꞌnoko baurang napoꞌ bauko-koo turaniꞌ deempaaravaing, eeꞌnoko napoꞌ baampuruꞌnaang bakaampo-koo. 36 Naning bakaning kare-nupoong teing eeꞌning bakanava-kooning. 37 Eeꞌnoko baa tee naning baumararing aaꞌnaꞌ piaavuremaung ning divuꞌmui ning siong-koo makotuaꞌ. Eeꞌnoko napoꞌ baa tee naning baurukaaꞌ aaꞌnaꞌ piaavurimaung ning divuꞌmui tee tee ning nkaang naning deempari otoꞌkoo makotuaꞌ. 38 Eeꞌnoko baa tee naning ning siong-koo baike aaꞌbarataꞌkoo˜ kuneꞌkoo tauraꞌparavarupeuꞌnung tee makotuaꞌ nkaang naning deempari otoꞌkoo. 39 Baa tee naning bakaang domaang baka tarearamaung tee bakaang domaang tee paaꞌaravaing, eeꞌnoko baa tee naning ning siomuma bakaang domaang duaꞌuaing tee teie napoꞌ daaꞌuaing tee domaang.

40 “Baa tee naning diiꞌ onkeonkeꞌduriaing teie tee ning onkeonkeꞌmuaing, eeꞌnoko baa tee naning ning onkeonkeꞌmuainge teie tee Naning onkeonkeꞌuaing ning botomuuꞌnung. 41 Eeꞌnoko baa tee naning tee Kumponing bakaang nakaronung onkeonkeꞌuaing tee Kumponing bakaang deemparako teie tee bakaang nakaronung-pinaꞌ nariꞌ Kumponinge mooꞌuaing. Eeꞌnoko baa tee naning tee naning koontoꞌ onkeonkeꞌuaing koontoꞌ deemparako, teie tee tee-pinaꞌ koontoꞌpinaꞌ nariꞌ mooꞌ nkavuaing. 42 Eeꞌnoko ninge masikaꞌ naurampimang, baa tee naning aing okiꞌnarekaꞌkoo narung ntonaruꞌ avuaing kaꞌmatonaruꞌ tee eeꞌnung nkaang barevare-nung deemparako teie tee koontoꞌ divuꞌuaukaꞌ tee bakaang mooꞌ; nkavuaing.”